ADEPR yitandukanyije n’umupasiteri ufunzwe azira gushaka gukubita nyirabukwe

Yanditswe na Uwishyaka Jean Louis
Kuya 6 Mutarama 2017 saa 09:23
Yasuwe :
0 0

Itorero rya ADEPR ryitandukanyije n’umupasiteri witwa Hakizimana Stephen wafunzwe azira gushaka gukubita nyirabukwe ivuga ko ari umuyoboke wayo.

Mu ijoro ryo ku wa Gatandatu tariki ya 24 Ukuboza 2016, nibwo Hakizimana yatawe muri yombi na polisi nyuma y’aho yari ashatse gukubitira nyirabukwe mu rusengero rwo mu Murenge wa Kanombe mu Karere ka Kicukiro.

Ubusanzwe ngo Hakizimana yabanaga n’umuryango we muri Uganda ariko baza kunaniranwa maze umugore acikana abana agaruka mu Rwanda; ubwo uyu mugabo yashakishaga umugore we yageze aho nyirabukwe yari arimo gusengera ari kumwe n’abana be bagirana amakimbirane ashaka kubatwara.

Itorero rya ADEPR ryahakanye ryivuye inyuma ko Hakizimana ari umupasiteri waryo nkuko byatangajwe.

Pasiteri Niyitanga Salton uhagarariye ishami ry’ivugabutumwa mu Itorero rya Pantekote mu Rwanda, yavuze ko ayo makuru atari ukuri kuko uwo wiyita Umupasiteri wa ADEPR ntaho agaragara, kandi ko nta hantu na hamwe hazwi yaherewe izo nshingano mu Itorero.

Ati “Amakuru yavugwaga ko Hakizimana Stephen ari umupasiteri wo muri ADEPR ni ibinyoma. Navuga ko twayamenye nk’abandi banyarwanda bose basoma ibinyamakuru byo mu Rwanda. Nta hantu na hamwe yanditse mu bitabo by’Itorero nk’umupasiteri.”

Itorero rya ADEPR rirakangurira buri wese kuba maso kuko hari abagenda baryiyitirira kandi rimwe na rimwe batanaririmo.

Umuvugizi wa Polisi mu Mujyi wa Kigali, SP Emmanuel Hitayezu, yabwiye IGIHE ko Hakizimana yatawe muri yombi afungirwa kuri sitasiyo ya Polisi ya Nyarugunga ndetse idosiye ye ikaba yaranamaze gushyikirizwa ubushinjacyaha.

Pasiteri Niyitanga Salton uhagarariye ishami ry’ivugabutumwa muri ADEPR yavuze ko uyu mupasiteri ntawe bazi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza