ADEPR igiye kwandika igitabo kivuga ku mateka ya Jenoside yakorewe Abatutsi

Yanditswe na Kwizera Emmanuel
Kuya 16 Gashyantare 2018 saa 08:31
Yasuwe :
3 3

Itorero rya ADEPR mu Rwanda rigiye kwandika igitabo kizibanda ku mateka yariranze mu gihe cya Jenoside yakorewe Abatutsi muri Mata 1994, igahitana abasaga miliyoni mu gihe cy’amezi atatu.

Abayobozi bakuru ba ADEPR n’abakozi mu nzego zinyuranye barebeye hamwe ku hatambutse h’itorero ryabo banemeza ibyo kwitaho mu gihe kizaza birimo kwandika igitabo gikubiyemo amateka ya Jenoside mu Itorero ADEPR.

Ibi biganiro byabereye muri Dove Hotel byahuje abayobozi ba ADEPR n’inzego bwite za Leta zirimo Urwego rw’Igihugu rw’Imiyoborere (RGB) na Komisiyo y’Igihugu yo kurwanya Jenoside (CNLG) mu guhuriza hamwe ibitekerezo ku hazaza h’itorero n’ah’igihugu.

Umunyamabanga Nshingwabikorwa wa CNLG, Dr. Bizimana Jean Damascène, yakomoje ku ruhare rw’amadini n’amatorero mu kurwanya ingengabitekerezo ya Jenoside na gahunda yo kwibuka ku nshuro ya 24 abazize Jenoside yakorewe Abatutsi.

Yashimye ko ADEPR iri mu murongo wo kwandika amateka yayiranze, ati “Aya mateka yandikwe ashyirwe ahagaragara kugira ngo abazayabona bazabone aho igihugu cyari cyarageze n’aho kigeze ubu cyiyubaka. Utazi iyo ava ntamenya iyo ajya. Amadini y’Abaporotesitanti icyo arusha andi ni uko bibiliya ibana namwe, ni iya buri mukirisitu wese. Ariko aho nakuze nsengera ho Bibiliya ni iy’umwigisha gusa, umukirisitu ntayirebaho. Ariko ni byiza ko n’aya mateka abakirisitu banyu babana nayo nk’uko na Bibiliya ibana nabo.”

Dr. Bizimana yasabye abayobozi ba ADEPR kuvugisha ukuri kuri Jenoside yakorewe Abatutsi, kwigisha abakirisitu amateka yaranze igihugu, gukomeza kwibuka abazize Jenoside no kubaha agaciro bambuwe, kubungabunga ibimenyetso bya Jenoside, guhumuriza abacitse ku icumu, gukangurira abayoboke kwerekana ahaba hakiri imibiri y’abazize Jenoside yakorewe Abatutsi batarashyingurwa mu cyubahiro no guhangana n’abakwirakwiza ingengabitekerezo ya Jenoside.

Yaberetse ko bakwiye no gufasha abandi kwigira ku bikorwa bya bamwe mu bayoboke b’amadini banze kwijandika mu bikorwa bya jenoside bagakiza abahigwaga no gushyigikira gahunda ya Ndi Umunyarwanda.

Umunyamabanga Mukuru w’Itorero ADEPR, Rev. Ruzibiza Viateur, yatangaje ko bagiye kwihutisha gahunda yo kwandika igitabo ku mateka yaranze ADEPR mu gihe cya Jenoside yakorewe Abatutsi.

Yagize ati “Dukeneye gushyira ubushakashatsi ahagaragara mu itorero ryacu. Dufite urutonde rw’abakoze Jenoside banahamwa n’icyaha, bakoze ibintu bibi by’umwanda. Muri ADEPR dufite abantu 53 bagize uruhare mu kurokora abantu abo nabo turabashima. Muri izi ngamba, icyo tutaragerageza gushyiraho akaboko ni ukwandika amateka n’ubushakashatsi ariko tugiye kubishyira mu bikorwa. Itorero ryacu ubu rifite imyaka 78, rifite amateka akomeye cyane.”

Igikorwa cyo kwibuka ku nshuro ya 24 Jenoside yakorewe Abatutsi muri ADEPR kizabera i Kibeho mu Karere ka Nyaruguru.

Umuvugizi wa ADEPR, Rev. Karuranga Euphrem yatangaje ko itorero rimaze kugera kuri byinshi bituma rihagaze neza birimo kuba abantu bakomeje kwakira agakiza.

Mu 2017, ADEPR yabatije mu mazi menshi abizera bashya barenga ibihumbi 57, yanakoze ibiterane byinshi byahembuye abakirisitu.

Umuyobozi Mukuru w’Ishami rishinzwe Imitwe ya Politiki, amadini na Sosiyete Sivile muri RGB, Kangwagye Justus yasabye itorero gukomeza uruhare rwaryo mu miyoborere myiza no gushyigikira gahunda y’imyaka irindwi ya Perezida Paul Kagame.

Yagize ati “Uyu munsi ibyo dukora byose, ibyiza dushaka kugeraho tubishingiye kuri iyi myaka irindwi iri imbere Perezida Paul Kagame atuyoboye neza. Turashima ko ADEPR muri iki gihe yashyize imbere gahunda y’ivugabutumwa ariko inahindura n’ubuzima bw’Abanyarwanda, tujya dushima ibikorwa byinshi byiza mukora ariko turifuza ko mukomeza kugendera muri uwo murongo.”

Abayobozi ba ADEPR biyemeje gukomeza gushyira imbaraga no kurushaho kunoza ingamba zatuma iterambere ry’Abanyarwanda rigerwaho.

Umuvugizi wa ADEPR, Rev. Karuranga Ephraim yatangaje ko itorero rimaze kugera kuri byinshi
Umunyamabanga Nshingwabikorwa wa CNLG, Dr. Bizimana Jean Damascène, yashimye ADEPR iri mu murongo wo kwandika amateka yayiranze
Uhereye ibumoso: Umunyamabanga Mukuru wa ADEPR, Pasiteri Ruzibiza Viateur; Ushinzwe Imari n’Ubutegetsi, Umuhoza Aulerie; Umuvugizi Wungirije, Rev. Karangwa John n'Umuvugizi wa ADEPR, Karuranga Ephraim
Umuyobozi Mukuru w’Ishami rishinzwe Imitwe ya Politiki, amadini na Sosiyete Sivile muri RGB, Kangwagye Justus, yasabye ADEPR gukomeza uruhare rwayo mu miyoborere myiza
ADEPR yashimwe uruhare igira mu bikorwa biteza imbere Abanyarwanda
Umunyamabanga Mukuru w’Itorero ADEPR, Rev. Ruzibiza Viateur, yatangaje ko bagiye kwihutisha gahunda yo kwandika igitabo ku mateka yaranze ADEPR muri Jenoside yakorewe Abatutsi
Umushumba w’Itorero ry’Akarere ka Gasabo, Rev. Ruyenzi Erneste
Abayobozi mu nzego zitandukanye za ADEPR bitabiriye ibiganiro
Itorero rya ADEPR rigiye kwandika igitabo kivuga ku mateka ya Jenoside yakorewe Abatutsi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza