Kwamamaza

Abubatsi batakambiye RRA ku bihano bihanitse bafatirwa kubera ubukererwe mu gusora

Yanditswe kuya 1-09-2016 saa 19:16' na Mukaneza M.ange


Mu minsi ishize Ikigo cy’Igihugu gishinzwe imisoro n’amahoro,RRA cyanenze urwego rw’abubatsi kivuga ko bacumbagira mu gutanga imisoro aho mu 2015 binjije asaga miliya 11.8 z’amafaranga y’u Rwanda mu isanduku y’imisoro.

Nubwo badahakana uku gucumbagira mu gutanga imisoro, abubatsi bavuga ko bahura n’imbogamizi nyinshi zituma batubahiriza inshingano zabo zirimo n’ibihano bihanitse bahabwa na RRA ndetse bagasaba ko bishobotse byakoroshywa.

Mu nama yahuje abubatsi na RRA kuri uyu wa 1 Nzeli 2016, hagaragajwe bimwe mu bibazo biri muri uru rwego bituma rudatanga imisoro neza harimo gucura inyemezabwishyu, ubukererwe ndetse no kunyereza umusoro ku nyungu.

Umuyobozi w’Ihuriro ry’abubatsi mu Rwanda, Alexis Nsengumuremyi, yavuze ko ikibazo cyo gucurisha inyemezabwishyu gihari kandi na bo kibababaza ariko ahanini gituruka ku misoro iremereye baba bagomba gutanga ugasanga igihe cyo gusora kigeze amafaranga ataraboneka.

Ati” Akenshi bituruka ku kuba umuntu aba arwana n’ibihano, umusoro si wo umuremerera cyane. Ikiremera cyane muri ibyo ngi byo ni ibihano byateganyijwe mu mategeko bitangira gushyirwa mu bikorwa igihe itariki ntarengwa yageze, noneho agashaka kugira ngo agabanye imisoro ari butange akoresheje izo nyemezabwishyu.”

Yakomeje avuga ko akazi bakora badahita bishyurwa nyamara ugasanga barasabwa kugaragaza TVA mu minsi itarenze 30, warenza iminsi 15 utarayitanga ugacibwa amande ya 60% na yo agenda yiyongera.

Abubatsi bari bitabiriye iyi nama basabye ko byibura uwagaragaje TVA agomba gutanga yajya adohorerwa ntahite atangira kubarirwa amande ahubwo agahabwa igihe cyo kuba yamaze kwishyura.

Banagarutse kandi ku kibazo cy’amafaranga 15% baba bagomba gufatira igihe baguze ibikoresho n’abantu badatanga umusoro ku nyungu, bagaragaza ko bakwiye kudohorerwa ku birarane babariwe mbere ya 2014 ubwo RRA yatangiraga gushyira abacukura umucanga mu bakwiye gusora.

Paul Mubiligi ukora muri MP Ltd yavuze ko amafaranga batabashije gufatira ari bo baba bagomba kuyishyura, bikaba bikomeje gushyira bamwe mu kaga karimo no gufunga bakareka gukora.

Komiseri ushinzwe imisoro y’imbere mu gihugu, Kayigi Aimable yavuze ko 90% by’abacura inyemezabuguzi ari abubatsi ndetse iyi akaba ari imwe mu mpamvu yatumye bagirana iki kiganiro.

Ati” Umwe mu myanzuro twagezeho ni uko twavuze tuti ’reka mu bufatanye hagati ya RRA na bo dusuzume ibyo bihano, turebe niba koko byaba bihana umuntu ariko biboneye bibafasha na bo gukomeza gukora.’”

Yanagarutse ku kijyanye n’amafaranga baba bagomba gufatira igihe baguze serivisi cyangwa ibikoresho n’abantu batanditswe ku musoro avuga ko bikorwa kubera ko buri wese afite inshingano yo gusora.

Yagiriye abubatsi inama yo kwandikira RRA cyangwa Minisiteri y’imari n’igenamigambi bagaragaza ko bifuza kudohorerwa ku mafaranga bishyuzwa bagakwiye kuba barafatiriye mbere ya 2014.

Ubushakashatsi bwakozwe na RRA bwagaragaje ko muri sosiyete z’ubwubatsi 3915, 109 zitatanze imisoro neza kandi zihariye 63% by’imisoro yatanzwe n’uru rwego mu 2015.

Ni mu gihe abubatsi bakora ku giti cyabo 40 muri 668 na bo batatanze imisoro neza kandi bihariye 62% by’imisoro yakusanyijwe n’uru rwego mu 2015.

Ibi bigaragaza ko aba bafite ibibazo byo gusora neza ari bo bafite uruhare mu misoro y’uru rwego ku buryo baramutse bakosoye amakosa arimo rwarushaho gutanga umusanzu ushimishije.

Abubatsi bagaragaje ibibazo by'ingutu bituma badatanga imisoro uko bikwiye
Umuyobozi w’Ihuriro ry’abubatsi mu Rwanda, Alexis Nsengumuremyi
Komiseri ushinzwe imisoro y'imbere mu gihugu, Kayigi Aimable yavuze ko bagiye gusuzuma uko ibihano byakoroshywa

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 4 Ukuboza 2016
Copyright © 2009 -2014 - IGIHE Ltd - All Rights Reserved