Kwamamaza

Aborozi ntibakozwa ibyo gucika ku muco wo kubangurira ku bimasa

Yanditswe kuya 16-09-2016 saa 21:34' na Prudence Kwizera


Ishyirahamwe ry’abavuzi b’amatungo risanga kubangurira inka hifashishijwe impfizi bigomba gucika hagasigara uburyo bwo gutera intanga, ariko ibi ntibabihurizaho n’aborozi.

Abaveterineri bavuga ko aborozi bakwiye kuyoboka uburyo bugezweho bwo guteza inka zabo intanga aho kuzibangurira ku bimasa, kuko ngo bizitera indwara zirimo imitezi, bikaba byanaziviramo kuramburura.

Aborozi b’inka bo basanga hakwiye gushyirwaho uburyo bwo kuvura ibyo bimasa, kuko ubu buryo bwo guteza intanga ngo batabwizeye neza.

Aborozi bo mu murenge wa Kinazi baganiriye na IGIHE, bavuga ko kubangurira inka ukoresheje ikimasa ari byo biborohera kuruta gukoresha uburyo bugezweho bwo gutera intanga.

Niyigena yagize ati "Ubwa mbere nayiteje intanga yanga gufata, ubwo mpitamo kuyijyana ku kimasa ihita ifata, ndumva ibyoroshye ku muntu ufite amikoro make ari ku kimasa kuko haba igihe uteje intanga ikabyara nabi".

Umukozi w’ikigo cy’igihugu gishinzwe guteza imbere ubuhinzi n’ubworozi mu Rwanda (RAB) mu ishami rya Isar Songa, Dr Diane Niwemukiza, avuga ko abakibangurira ku bimasa bakagombye kubicikaho kuko bigira ingaruka zikomeye ku nka nko kuba zakanduzanya indwara zitandukanye.

Ati " Ingaruka zirahari cyane ndetse kandi ni na zo tugenda tubwira aba bavuzi b’amatungo n’aborozi mu mahugurwa tubaha, tubabwira ko iyo ubanguriye ku kimasa bishobora guteza indwara nyinshi zirimo imitezi, ubwo rero aborozi turabakangurira kurinda inka uburwayi ".

Umunyamabanga Nshingwabikorwa w’Urugaga rw’Abavuzi b’amatungo mu Rwanda, Dr Alphonse Nshimiyimana, avuga ko iyi gahunda yatangijwe bagamije gufasha muri gahunda yo kongera umukamo mu gihugu.

Ati “Iki gikorwa cyo guteza intanga kiri muri gahunda za Leta zo kongera umukamo, kigomba kujyana no kubona icyororo cyiza.Niba dushaka kongera umukamo tuba tugomba no gushakisha icyororo cyiza dukoresheje intanga ziteye imbere, kuko icyororo gisanzwe birazwi ko umukamo uri hasi, tugomba kwinjizamo amaraso mashya kugira ngo umukamo wiyongere.”

Urugaga rw’abavuzi b’amatungo mu Rwanda ruvuga ko iyi gahunda yo guteza intanga yatangiye kandi bagenda bayibwira abavuzi b’amatungo n’aborozi mu mahugurwa babaha aho baba baturutse mu bice bitandukanye by’igihugu.

Uyu mwanzuro uramutse ushyizwe mu bikorwa byasaba ko na serivisi yo gutera intanga yegerezwa aborozi kuko magingo aya hari aho usanga utera intanga ari umwe cyangwa babiri mu karere kose, ku buryo kugera ku borozi bose bigorana ndetse ntanabonekere igihe cyose akenerewe n’aborozi.

Aborozi bavuga ko babareka bagakomeza kubangurira inka zabo ku bimasa
Dr Diane Niwemukiza, umuyobozi wa RAB mu ishami rya Isar Songa
Dr Alphonse Nshimiyimana Umunyamabanga Nshingwabikorwa w'urugaga rw’abavuzi b’amatungo mu Rwanda

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 3 Ukuboza 2016
Copyright © 2009 -2014 - IGIHE Ltd - All Rights Reserved