Abizigamiye mu kigega Ejo Heza bemerewe gukoresha 40% by’ubwizigame nk’ingwate mu bigo by’imari

Yanditswe na Twarabanye Venuste
Kuya 2 Ugushyingo 2019 saa 05:41
Yasuwe :
0 0

Ikigo cy’ubwiteganyirize (RSSB) gicunga ikigega cy’ubwizigame bw’igihe kirekire "Ejo Heza" cyatangaje ko mu rwego rwo gufasha abanyarwanda gukoresha ku mafaranga bizigamiye muri icyo kigega, ufite ubwizigame bungana na miliyoni enye kuzamura, ashobora gukoresha 40% yayo nk’ingwate mu bigo by’imari, kubaka inzu cyangwa kwiga.

Uwizigamiye agera kuri miliyoni 4 FRW kuzamura atangira kuyakoresha akimara kuyizigamira mu gihe ubundi bwizigame buhabwa nyirabwo hashize imyaka 55 habariweho n’inyungu.

Umuyobozi ushinzwe ‘Ejo Heza’ muri RSSB, Hebert Asiimwe yavuze ko ari impinduka bashyizeho bagendeye ku bitekerezo by’abizigama.

Ati “Ibyo twabikuye ahantu dukora ishusho y’iyi gahunda, umumotari aratubwira ati rero turabinginze ntimuzadufatire amafaranga kugeza tugize imyaka 55 muzaduhe uburenganzira bwo kuba twagira ayo dufataho, niyo mpamvu twashyizemo iyi ngingo. Umumotari cyangwa uwo ari we wese ashobora gufatamo 25% akagenda akiyishyurira moto nshya.”

Akomeza agira ati “Wizigamiye miliyoni kuva kuri enye wakuraho 40% yayo ukaba wakwiyubakira inzu, cyangwa ukajyana umwana wawe ku ishuri tukayaguha muri kashi ukayajyana, tukwemerera kugira ayo ufatamo ibi ntabwo byari bisanzwe. Ushobora no gukuraho 25% y’ubwizigame bwawe, ukaba wakwikorera umushinga.”

Asiimwe avuga ko ufite ubwizigame bwa miliyoni enye adakeneye gutanga ingwate ku yindi mitungo ye.

Ati “Ashobora gufata 40% nk’ingwate hari urupapuro atwara rw’ingwate tumukorera akagenda akajya muri banki akaba yafata inguzanyo. Singombwa kugwatiriza ikibanza cyawe cyangwa ikindi kintu.”

Guhera ku myaka 55 ufite ubwo bwizigame ahabwa pansiyo buri mwaka nk’uko bigenda ku mukozi wa leta wizigamye neza imyaka 15 mu buryo busanzwe.

Ni mu gihe abafite ubundi bwizigame, buri munisi y’izo miliyoni bahabwa ubwizigame bwabo n’inyungu kuko leta isezeranya kuyakoresha neza akazaba yarungutse.

Biteganyijwe ko ejo heza izongera agera kuri miliyari 20 mu myaka itatu ku musaruro mbumbe w’igihugu.

Imibare mishya y’ikigega ‘Ejo Heza’ yerekana ko abanyarwanda barenga ibihumbi 170 bamaze kucyiyandikishamo, muri bo ibihumbi 60 bamaze kwizigamira, aho ubwizigame bumaze kugera mu kigega ari miliyoni zirenga 500 FRW.

Guverinoma y’u Rwanda yihaye intego yo kuzamura urwego rw’ubwizigame bukava ku gipimo cya 10.6% bukagera kuri 23 % mu 2024.

Guteganyiriza izabukuru ku banyarwanda ni bumwe mu buryo bwo kuzamura ubwizigame bw’igihugu no kwizera ko abaturage bakuze bazaba bafite ikibabeshaho.

Abari mu cyiciro cya mbere n’icya kabiri cy’ubudehe Leta ibongerera ku bwizigame bwabo mu kigega Ejo Heza.

Basabwa kwizigama nibura 15,000 FRW ku mwaka leta ikabongereraho andi 18,000 Frw, ni inyongera ya 100%. Mu gihe icya gatatu nacyo gisabwa kwizigama 18,000 FRW cyongererwa 50%.

Abari mu cya kane basabwa nibura kwizigama 72,000 FRW ku mwaka ariko ntacyo leta ibongereraho.

Umaze umwaka atanga neza ubwizigame yiyemeje, iyo agize ibyago ahabwa 250,000 FRW yo gushyingura naho iyo uwizigama ari we witabye Imana umuzungura we ayasaba mu masaha 24.

Umaze umwaka atanga ubwizigame bwe neza anahabwa 1,000,000 FRW y’ubwishinguzi bw’ubuzima igihe yaba agize ikibazo.

Urwo ruhare rwa leta rukazatangwa mu gihe cy’imyaka itatu, uhereye igihe Ejo Heza, yagiriyeho kimwe n’ubwishingizi bw’ubuzima n’ubwo gushyingura.

Umuyobozi ushinzwe ‘Ejo Heza’ muri RSSB, Hebert Asiimwe avuga ko abizigamiye mu kigega Ejo Heza bemerewe gukoresha 40% by’ubwizigame nk’ingwate mu bigo by’imari

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza