Kwamamaza

Abinubiraga n’abashidikanyaga ku butabera bw’u Rwanda bahumurijwe

Yanditswe kuya 28-09-2016 saa 19:33' na Niyonsenga Schadrack


Minisitiri w’Ubutabera mu Rwanda ahamya ko urwego rw’ubutabera mu gihugu rufite ubushobozi buhagije bwo kuburanisha imanza izo ari zo zose bikuraho iby’aboherezwa kuburanishwa bakavuga ko batabona ubutabera bunoze.

Bamwe mu bagaragaje ibibazo nk’ibi mu gihe baburanishwaga ku byaha bya Jenoside, barimo nka Bernard Munyagishari, Pasiteri Jean Uwinkindi na Dr Leon Mugesera, aba bagaragazaga ko badafashwe neza mu buryo butandukanye ndetse bakanagaruka ku bibazo bijyanye n’ubwunganizi mu mategeko.

Ubwo yatangizaga inama ngishwanama hagati y’iyi Minisiteri na Ministeri y’Ubutabera n’Umutekano mu Buholandi, Minisitiri w’Ubutabera akaba n’Intumwa Nkuru ya Leta y’u Rwanda, Johnston Busingye, udahakana ukuri kw’ibyavugwaga n’aba baburanyi, yemeza ko byaterwaga n’uko byari imihini mishya ku Rwanda kuburanisha imanza zikomeye, icyakora ngo kuri ubu nta muburanyi ushobora kubona icyo anenga ubutabera bw’u Rwanda.

Ati “ Bafite uburenganzira bwo kuvuga ibibazo bahura nabyo natwe dufite inshingano ziteganywa n’amategeko mu byo tugomba gukora. Kuva batangira kuzamura ibyo bibazo, twagiye dukomeza gushaka uburyo bwo kubikemura. Urugaga rwacu rw’abanyamategeko ubu rufite abarenga 1300 ntabwo ntekereza ko haburamo umwavoka umwe wunganira umuntu cyangwa babiri.”

"Twari dufite ikibazo kirebana n’ingengo y’imari cyo kubahemba, icyo nacyo leta yashyizeho amafaranga yo guhemba abo bunganizi, ngira ngo ntabwo mugikunze kukibona ubu mu itangazamakuru."

Minisiteri y’Ubutabera yemeza ko kuva hatangira kugaragazwa ibi bibazo yakomeje gushaka uburyo bwo ku bikemura harimo no kongera abanyamategeko kuko ngo kuri ubu mu rugaga rw’abanyamategeko bamaze kugera ku 1300, muri aba ngo harimo abavoka b’umwuga 60 bahuguwe.

Busingye ati “ Ntabwo byongeye kutugora, ubu abantu bose baraburanye, twari dufite ikibazo kirebana n’ingengo y’imari yo kubahemba ariko icyo na cyo leta yashyizeho amafaranga yo guhemba abo bunganizi.”

Akomeza avuga ko ibi byari ibibazo Leta y’u Rwanda yagombaga guhura na byo bitewe n’uko byari ubwa mbere ibihugu by’amahanga byohereza abanyabyaha ngo baze kuburanira mu Rwanda.

Ati “Mu mwaka wa mbere twari tubizi ko hazavuka ikibazo hano cyangwa hariya tugafatanya kubishakira ibisubizo nk’uko twabigenje.”

Ibi Minisiteri y’Ubutabera yabitangaje mu gihe hari bamwe bajya bafatirwa mu mahanga bashinjwa ibyaha bya Jenoside ariko bakanga koherezwa mu Rwanda ngo abe ari ho baburanishirizwa kuko baba bagaragaza kutizera ubutabera bw’u Rwanda, ibintu rimwe na rimwe binahabwa umugisha n’inkiko z’ibihugu baba barahungiyemo.

Urugero ni nk’urw’abanyarwanda batanu bakekwaho ibyaha bya Jenoside batuye mu Bwongereza, barangajwe imbere na Vincent Bajinya, Charles Munyaneza, Emmanuel Nteziryayo, Celestin Ugirashebuja na Celestin Mutabaruka basabye ko batakoherezwa kuburanira mu Rwanda bavuga ko nta butabera buboneye bahabonera, byaje no kwemezwa n’urukiko rwo muri iki gihugu rwateye utwatsi icyifuzo cy’u Rwanda cyo kohererezwa aba bagabo ngo rubaburanishe.

Nubwo bimeze bityo, hari ibindi bihugu byarenze iyi myumvire yo kumva ko nta butabera bonoze butangirwa mu Rwanda, bikohereza abanyarwanda baba bashinjwa ibyaha bya Jenoside kuburanira aho bakoreye ibyaha kandi bakahabonera ubutabera busesuye.

Leta y’u Rwanda na yo ntihwema gusaba amahanga kudashidikanya cyangwa ngo akemange imikorere y’ubutabera bwayo kuko buri ku rwego mpuzamahanga.

Kuri ubu kandi mu karere ka Nyanza hari kubakwa inyubako izakorerwamo n’urukiko rukurikirana ibyaha mpuzamahanga na ndengamipaka, High Court Chamber of International Crimes (HCCIC), ibi byose bikaba bishyira ku rwego rwo hejuru ubutabera butangirwa mu Rwanda.

Minisitiri Busingye ahamya ko kuri ubu ntawabona icyo yongera kunenga ubutabera bw'u Rwanda

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 10 Ukuboza 2016
Copyright © 2009 -2014 - IGIHE Ltd - All Rights Reserved