Abikorera ntibitabira kujya mu rugaga rw’impuguke mu gutanga amasoko mu Rwanda

Yanditswe na Evariste Nsengimana
Kuya 6 Nyakanga 2018 saa 07:34
Yasuwe :
0 0

Ubuyobozi bw’urugaga rw’impuguke mu gutanga amasoko mu Rwanda, bwatangaje ko abikorera bakigenda biguru ntege mu kurwiyandikishamo, ko mu banyamuryango 383 rufite muri bo 350 bose baturuka mu bigo bya Leta.

Itegeko no 011/2016 ryo ku wa 2 Gashyantare 2016, rigenga umwuga w’itangwa ry’amasoko mu Rwanda riteganya ko uwemerewe gukora umwuga wo gutanga amasoko nk’impuguke ari uwanditse ku rutonde rw’impuguke mu gutanga amasoko, rushyirwaho n’urugaga rumaze imyaka hafi ibiri rukora.

Nubwo rukiri mu nzira zo kwiyubaka, uru rugaga rufite inshingano zirimo iyo kongerera ubumenyi n’ubushobozi abanyamuryango kugira ngo barusheho gukora kinyamwuga no kwirinda amakosa akorwa mu itangwa ry’amasoko, ruvuga ko kugeza ubu abikorera barugana ari bake, bikaba byatuma rutagera ku ntego zabwo.

Mu kiganiro n’abanyamakuru kuri uyu wa Kane, Perezida warwo, Kayiranga Rukumbi Bernard, yavuze ko kumenya abakora akazi ko gutanga amasoko mu bikorera bigoye kuko hari ibigo byinshi n’ibivuka buri munsi ariko ko bateganya gukora ubukangurambaga.

Ati “Utekereze ibigo biri mu gihugu, uwo mubare ntabwo tuzi n’ikigo gikoresha bangahe? Mu bikorwa duteganya gukora, ni ukunyura aho hose tumenya abahari tunabashishikariza kwinjira mu rugaga kuko nabo bazaba babifitemo inyungu. Ntabwo twabicukumbuye ariko niba tugiye kurengera umuntu ukora umwuga, tuzamurengera ari uko arurimo.”

Uretse kongerera ubushobozi n’ubumenyi abanyamuryango, urugaga rushobora no kubarengera mu gihe bujuje inshingano z’umwuga uko bikwiye, abandi bakabifata nk’amakosa, bikaba ngombwa ko babiregerwa n’ibindi.

Umuyobozi w’ishami rishinzwe kongera ubushobozi mu kigo cy’igihugu gishinzwe gutunganya amasoko ya leta (RPPA), Sibomana Célestin, yavuze ko abakora mu bigo bya Leta aribo baba bazwi kuko ari itegeko kuba muri urwo rugaga.

Ati “Imibare y’abantu batanga amasoko abo tuzi ni abo muri Leta kuko utanga amasoko agomba kuba azwi muri RPPA. Mu nzego 150 zitanga amasoko dusanga hari abakozi 350, abo bandi basaga 30 ni abakora mu bikorera cyangwa n’abandi nk’abanyeshuri bajemo batarabona akazi.”

Kuri ubu, kwinjira mu rugaga rw’impuguke mu gutanga amasoko, bisaba kuba umuntu yarize amasomo yo gutanga amasoko cyangwa yarabihaweho amahugurwa yihariye, akishyura ibihumbi 10 Frw yo kwiyandikisha n’umusanzu w’ibihumbi 50 Frw ku mwaka mu gihe yamaze kuba umunyamuryango.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza