Abikorera ntibanyurwa n’ibihano bihabwa imodoka ifashwe itwaye magendu

Yanditswe na Twarabanye Venuste
Kuya 13 Ugushyingo 2019 saa 03:18
Yasuwe :
0 0

Bamwe mu bikorera barasaba ko igihano cyo guteza cyamunara ikinyabiziga cyafashwe gitwaye magendu, cyasubirwamo kuko hari igihe bikorwa n’umushoferi nyiri imodoka nta ruhare yabigizemo ugasanga abihombeyemo.

Itangazo ikigo cy’imisoro n’amahoro cyashyize ahagaragara ku wa 25 Nyakanga 2019 rivuga ko mu rwego rwo kurwanya no gukumira ibikorwa bibi bya magendu “ikinyabiziga kizafatwa gitwaye ibicuruzwa mu buryo bwa magendu n’ibindi byose bitwawe mu buryo butemewe n’amategeko, ibyo bicuruzwa n’ikinyabiziga kibitwaye bizafatirwa burundu kandi bitezwe cyamunara hakurikijwe amategeko abigenga”.

Rivuga ko by’umwihariko umushoferi uyitwaye azajya acibwa ibihumbi bitanu by’amadolari ya Amerika.

Abikorera bo mu Ntara y’Amajyaruguru, basanga muri byinshi ikigo cy’imisoro n’amahoro cyakemuye mu rwego rwo korohereza abacuruzi nacyo cyazamo bakigana ubushishozi iryo tegeko rikavugururwa.

Ntibahakana ko hari umushoferi ushobora gutwara magendu yabisabwe n’umukoresha we, ariko ngo hari igihe umushoferi ashobora kubikora abyibwirije ndetse yibwira ko umukoresha we atabimenya ariko akaza gufatwa imodoka igatezwa cyamunara.

Bavuga ko umushoferi ashobora gucibwa amande nyuma akajya gushaka akazi ahandi ariko nyiri imodoka agahomba.

Turatsinze Straton uhagarariye abikorera mu Karere ka Musanze agira ati “Iyo urebye magendu bakunze kuyifatira mu modoka zacu n’iza bagenzi bacu ariko ugasanga abashoferi bacu ni bo bayitwara twe nta ruhare tubifitemo”.

Akomeza agira ati “Turasaba ko [umushoferi] yahanwa by’intangarugero wenda bamufashe bakamwambura uburenganzira bwo gutwara mu gihugu nk’imyaka 10 adateje igihombo shebuja.”

Mukanyarwaya Donatha uhagarariye abikorera mu Ntara y’amajyaruguru nawe yemeza ko ari ikibazo abikorera bagaragaza muri rusange.

Ati “ Byaragaragaye ko magendu ziza mu modoka, cyane cyane abashoferi babigizemo uruhare, ugasanga nyiri imodoka arahagwa. Twagira ngo rero icyifuzo cyacu, ni uko bariya bashoferi bafatirwa igihano gikomeye kigaragara, bikajya bitangazwa no mu binyamakuru bati umushoferi runaka yafatanywe magendu ari we bikomotseho ndetse natwe abacuruzi ntitwongere kumuha akazi."

Ikigo cy’igihugu cy’imisora n’amahoro gikora ibishoboka ngo cyorohereze abacuruzi mu kazi kabo, gitangaza ko nubwo itegeko ryasohotse, iyo imodoka ifashwe babiganiraho, bakareba igipimo cyo kugambirira gutwara iyo magendu hagati y’umushoferi n’umukoresha.

Komiseri mukuru wungirije mu Kigo cy’Imisoro n’amahoro, Kanyangeyo Agnes, agira ati "Twabyumvise kandi dusanzwe tubyunguranaho ibitekerezo, biterwa n’uburemere bw’icyaha, iyo turebye ikigero cyo kugambirira, ibitekerezo washyizemo ujya gukora icyo kintu, natwe turashishoza dufite urwego rwicara rukareba ntabwo tujya dupfa gufata ngo ni agatebo kamwe”.

Atanga urugero niba ari imodoka yafashwe ubona ko yateguwe gutwara magendu kumwe bashyiramo ibyumba, iyo ngiyo yo nta nubwo iba ikwiye gusubira mu muhanda, irafatirwa burundu n’iyo yatezwa cyamunara ikabanza igasenywa.

Komiseri Kanyangeyo akomeza avuga ko nk’imodoka irimo ibaro imwe y’imyenda hari igihe bashishoza bagasanga ari igikorwa cy’umushoferi.

Ati "Hari ubwo dusanga nka Fuso yikoreye ibicuruzwa runaka ugasanga umuntu yajugunyemo akabaro kamwe ka caguwa, uwo ubona ko atari nyiri imodoka wakora akantu nk’ako, icyo gihe natwe turareba ese iyi modoka tuyifata kenshi, turashishoza bigatuma dushobora koroshya ibihano."

Amakuru mashya IGIHE yakuye mu biro bishinzwe gasutamo, yerekana ko Ibinyabiziga 79 bimaze gufatirwa muri magendu mu mezi atatu ashize, birimo imodoka 47, na moto 32 hakiyongeraho n’amagare 61.

Imodoka ifatanywe magendu irafatirwa ndetse hakishyurwa n'amande

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza