Abikorera 300 b’i Kigali bakoze urugendo rwihariye ruzirikana bagenzi babo bazize Jenoside

Yanditswe na Tombola Felicie
Kuya 9 Mata 2018 saa 08:40
Yasuwe :
0 0

Abikorera 300 bo mu Mujyi wa Kigali bakoze urugendo rwihariye rwo kwibuka bagenzi babo bazize Jenoside yakorewe Abatutsi mu 1994.

Uru rugendo barukoze ku wa 9 Mata 2018, baturuka ku Muhima ahazwi nko kuri Yamaha barusoreza ku Rwibutso rwa Jenoside rwa Kigali ku Gisozi, basobanurwa amateka ya Jenoside, banashyira indabo ku mva zishyinguyemo imibiri isaga ibihumbi 250.

Umuyobozi w’Urugaga rw’Abikorera (PSF) mu Mujyi wa Kigali, Bitwayiki André, yatangaje ko uru ari urugendo rwo kongera gusubiza agaciro abakambuwe ndetse no kuzirikana ibikorwa byiza bifuzaga kugeraho.

Yagize Ati “Twabitekereho kugira ngo duhore twibuka ko hari byinshi bakoze muri uyu mujyi, hari imbaraga batangaga kandi hari na gahunda bari bafite kugira ngo ibyo bifuzaga tuzagerageze natwe kubigereho twubaka igihugu.”

Bamaze gusobanurirwa amateka ya Jenoside yakorewe Abatutsi mu 1994 no gusabwa kwirinda amacakubiri mu byo bakora byose, Umuyobozi mukuru wa PSF mu Rwanda, Bapfakurera Robert, yabasabye gukomeza gukora cyane, baharanira iterambere.

Yagize ati “Ndashimira abikorera kuko mu gufatanya na leta yacu bagira uruhare mu gufasha abasizwe iheruheru na Jenoside yakorewe Abatutsi. Murabizi ko leta yacu yashyizeho gahunda y’imyaka irindwi yo kwivugurura no kwiteza imbere vuba, nkaba nizera neza ko tuzabigeraho nkurikije uko abikorera bashyiraho umwete ndetse n’ibyo bakora.”

Abitabiriye igikorwa cyo kwibuka abikorera bazize Jenoside yakorewe Abatutsi, bagaragaje ko ari icy’agaciro gakomeye.

Kayumba Charles wari uhagarariye Ikigo cy’Imari cya Duterimbere ndetse n’Urwego rw’ibigo by’imari iciriritse AMIR, yagize ati “Kwibuka ni igikorwa cya buri mu nyarwanda kandi Urwego rw’Abikorera narwo rwahungabanyijwe n’amahano yabaye mu Rwanda, aho abacuruzi bishwe n’abandi bacuruzi bagenzi babo, n’abakiriya babo. Ni ikintu cy’ingenzi kwibuka abakabaye bakorera u Rwanda iyo baba bakiriho.”

PSF yatangaje ko kugeza ubu hataramenyekana abikorera bishwe muri Jenoside yakorewe Abatutsi ariko hatangiye ubushakashatsi, aho ubu bigeze ku rwego rw’umurenge, handikwa uwishwe n’icyo yakoraga.

Urugendo rwo kwibuka abikorera rwitabiriwe n'abikorera bagera kuri 300
Umuyobozi mukuru wa PSF mu Rwanda, Bapfakurera Robert
Hazirikanywe abikorera bazize Jenoside yakorewe Abatutsi
Bakigera ku Rwibutso rwa Jenoside rwa Kigali babanje gusobanurirwa amateka ya jenoside
Baganirijwe ku kwirinda amacakubiri ayo ariyo yose
Umuyobozi w’Urugaga rw’Abikorera (PSF) mu Mujyi wa Kigali, Bitwayiki André

Amafoto: Muhizi Serge

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza