Abigira i Gikondo muri Kaminuza y’u Rwanda bashobora kwimurirwa i Huye

Yanditswe na Mugabo Jean d’Amour
Kuya 21 Nyakanga 2018 saa 08:29
Yasuwe :
0 0

Bamwe mu banyeshuri biga muri Kaminuza y’u Rwanda ishami ry’Icungamutungo n’Ubucuruzi (CBE) riherereye i Gikondo mu Mujyi wa Kigali, bavuga ko bumvise amakuru yo kubimurira mu ishami riherereye mu Karere ka Huye ariko nta buyobozi burayabatangariza ngo bamenye aho bazerekeza ubwo bazaba batangiye umwaka w’amashuri utaha uzatangira muri Nzeri uyu mwaka.

Aba banyeshuri basabye ko niba hari umugambi wo kubimura babimenyeshwa hakiri kare kugira ngo bitegure kwimuka.

Umuyobozi wungirije wa Kaminuza y’u Rwanda ushinzwe Iterambere, Dr Muligande Charles, yemereye IGIHE ko uyu mugambi uhari ariko ukiganirwaho kandi ko mu gihe gito bazatangaza umwanzuro.

Yagize ati “Haracyari ibiganiro muri kaminuza kuri iyo ngingo, nta cyemezo kirafatwa, umunsi cyafashwe tuzakimenyesha abanyamakuru.”

Abajijwe niba abiga muri porogaramu y’amanywa muri CBE ari bo bazajya kwigira i Huye naho abiga nimugoroba bakaguma i Kigali nk’uko bivugwa, Dr. Muligande yagize ati “Yee, gusa na byo biracyaganirwaho. Tuzabamenyesha mu minsi mikeya.”

Abanyeshuri bavuga ko bivugwa ko kwimurwa byaba bitewe no kuba i Gikondo hari abanyeshuri barenze ubushobozi bw’inyubako zihari mu gihe i Huye hari inyubako zisaguka zidakoreshwa. Ku rundi ruhande hari abavuga ko inyubako nini bigiragamo i Gikondo batazi ibigiye gukorerwamo kuko babona ikorwamo impinduka mu myubakire y’imbere.

Mu mezi atatu ashize, iyi Kaminuza yatangaje undi mugambi wo gusubiza i Huye, Ishuri ry’Itangazamakuru ryakuweyo mu 2011 rikimurirwa i Nyarugenge ahazwi nka ‘Camp Kigali’ rikongera kwimurirwa i Gikondo mu Karere ka Kicukiro muri Gashyantare 2017. Abiga itangazamakuru na bo bavuze ko bakiri mu gihirahiro kuko nta cyemezo kiratangazwa niba umwaka utaha bazawutangiria i Huye.

Mu bashobora kwimurirwa i Huye harimo bamwe mu bagera kuri 600 bageze muri CBE mu mpera z’umwaka wa 2016 bakuwe i Huye, aba bakavuga ko guhora bimurwa bibagiraho ingaruka mbi.

Bizimana Matheus, umunyeshuri ushoje umwaka wa gatatu mu Icungamutungo, yavuze ko nubwo bakigera i Kigali bagowe n’ubuzima, uyu munsi bahishimiye kuko haboneka amahirwe menshi y’imirimo kandi ko gusubira i Huye byabateza igihombo by’umwihariko kubera ibikoresho bimwe badashobora kwimukana, bakagomba kugura ibindi bageze aho bimukiye.

Yagize ati “Ibyo bintu byo kwimuka ntabwo bidushimisha. Ubushize batwimura nigaga mu mwaka wa kabiri, twaje i Kigali tutabishaka, ibikoresho byo mu nzu tubigurisha duhendwa, ibyo bataguze tubisigayo kuko ntitwari kwikorera ibiryamirwa, amasafuriya n’imbabura. Ubuzima bwo muri Kigali bwabanje kutugora kuko inzu n’ibindi dukenera birahenze kurusha i Huye ariko twagiye tuhamenyera, tuhabonera amahirwe menshi by’umwihariko kuri twe turimo gusoza amasomo kuko tubona akazi cyangwa ibiraka.”

Bizimana yavuze ko kwimurira i Huye abanyeshuri bari mu mwaka wa nyuma ari ukubasubiza inyuma ku bijyanye no kubona akazi maze asaba ko mu gihe haganirwa kuri uyu mugambi, harebwa uburyo abasanzwe bigira i Gikondo by’umwihariko abimukira mu mwaka uzosa bahaguma maze abatangira mu mwaka wa mbere bagatangirira i Huye.

Gisèle Ishimwe, umunyeshuri watangiriye muri CBE, nawe yavuze ko kwimuka bibagora kubera ubushobozi buke ndetse ko hari benshi bigaga ku manywa bateganya gusaba kwiga nimugoroba mu gihe icyemezo cyaba gifashwe cyo kwimurira i Huye abiga ku manywa, ariko akagaragaza impungenge z’uko guhindurirwa bitakorohera abafashwa na leta.

Kaminuza y’u Rwanda yashinzwe mu 2013 ikaba ifite koleji esheshatu hirya no hino mu gihugu harimo eshatu ziri mu Mujyi wa Kigali, izindi eshatu zikaba mu turere twa Huye, Musanze na Kayonza.

Abigira i Gikondo bashobora kujyanwa i Huye
Dr Charles Muligande asobanura ko bari mu biganiro byo kwimura abigira mu ishami rya Kaminuza y'u Rwanda riri i Gikondo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza