Abiga UTB basabwe kwirinda imyitwarire nk’iyaranze urubyiruko rwijanditse muri Jenoside rwarize

Yanditswe na Evariste Nsengimana
Kuya 18 Gicurasi 2018 saa 09:13
Yasuwe :
0 0

Abanyeshuri n’abayobozi ba Kaminuza y’amahoteli, ubukerarugendo n’ikoranabuhanga n’ubucuruzi (UTB) bibutse ku nshuro ya 24 Jenoside yakorewe Abatutsi muri Mata 1994, basabwa kwirinda imyitwarire mibi nk’iyaranze urubyiruko rwijanditse muri Jenoside kandi rwari rujijutse.

Muri uyu muhango wabaye ku mugoroba wo kuwa Kane tariki ya 17 Gicurasi 2018, abanyeshuri, abarimu ndetse n’abayobozi bayo, babanje gukora urugendo rwo kwibuka, rwahereye ku cyicaro cyayo, rugera ahahoze ari ishuri rya ETO Kicukiro basobanurirwa ubwicanyi bwakorewe Abatutsi bari bahahungiye.

Urugendo rwakomereje ku Rwibutso rwa Jenoside rwa Nyanza ya Kicukiro, aho babanje gushyira indabo ku mva zishyinguwemo imibiri y’Abatutsi bazize Jenoside nyuma yo gutambagizwa ibice bitandukanye byarwo, babona kugaruka ku cyicaro cy’iyi kaminuza ari naho indi mihango yakomereje.

Umuyobozi w’ishami rishinzwe guteza imbere uburezi mu Nama Nkuru y’Amashuri Makuru na Kaminuza (HEC), Dr. Théoneste Ndikubwimana, yababwiye ko kwibuka no kwiyubaka bifite igisobanuro gikomeye bijyanye n’amateka yaranze u Rwanda, cyane cyane mu gihe cy’abakoloni baciyemo ibice abanyarwanda, bisakazwa n’abayobozi bagiye bayobora igihugu bikaza kuganisha kuri Jenoside.

Ati "Ingengabitekerezo ya Jenoside yagiye yigishwa mu mashuri, mu nama zakorwaga. Yarigishijwe, Ni uburezi bupfuye, bugoramye bwigishijwe ariko dufite amahirwe duhabwa na Leta yacu y’ubumwe, y’uburezi bwiza budaheza, bufite indangagaciro. Birakwiriye rero ko nk’abanyeshuri, urubyiruko twiga ibikwiriye. Iyo mvuga kwiga ibikwiriye, ntabwo twibagirwa ya mateka ariko twige amazima [...] Jenoside yakozwe, yateguwe n’abahanga bize bazi ubwenge, bafite impamyabushobozi zihanitse ariko umuhanga nk’uwo yabaye umuswa.”

Uyu muyobozi yatanze urugero ku bize kurengera ubuzima (kuvura) barangiza ntibabashe kurengera ibinyabuzima, abize kubyaza, barangiza bakavutsa abandi ubuzima n’abandi. Avuga ko nta ndangagaciro bigeze bigishwa, abwira abanyeshuri ko bakwiye gutandukana nabo, n’abazabakomokaho bakazaba bafite indangagaciro zitandukanye n’iz’abakoze Jenoside.

Uwashinze UTB, Mukarubega Zulfat, yabasabye kwigira ku mateka yaranze u Rwanda kugira ngo babashe kurwubaka.

Ati "Ni nayo mpamvu nk’urubyiruko mugira Imana ko mufite urugero rwiza mureberaho kandi namwe amateka yaranze igihugu cyacu mabi ntabwo ariyo atugenga nitwe tuyagenga, nitwe tugomba guharanira kubaho neza twabigizemo uruhare.”

“Mugomba guharanira ko ari mwe mwubaka igihugu kandi ntibigarukire aha, bikarenga Afurika bikagera ku Isi yose, mukaba intangarugero, mugatanga amakuru mabi yaranze igihugu cyacu ariko kandi muyubakiraho, ari nayo abatera imbaraga zo kuvuga ngo Jenoside ntizongere ukundi."

Uyu muyobozi yakomeje asaba abafite umutima ukunda kandi ugira impuhwe kwita no gufasha abana b’abagize uruhare mu kubohora igihugu no guhagarika Jenoside yakorewe abatutsi bakanaburiramo ingingo z’umubiri, avuga ko bazibuze kugira ngo barokore abanyarwanda, ko abana babo bakwiye gufashwa kwiga.

By’umwihariko, uyu muyobozi yatangije gahunda yo gufasha kwiga abo bana mu 2013, afasha abari hagati ya babiri na batanu buri mwaka, ariko uyu mwaka utaha akaba azafasha abagera kuri 14.

Umuyobozi ushinzwe ibikorwa byo kugorora muri RCS, ACP Kabanda Jean Bosco, yatanze ikiganiro kigaruka ku nzira y’inzitane y’urugamba rwo kubohora igihugu, avuga ko byakozwe n’urubyiruko nk’abo banyeshuri, ababwira ko bikwiye kubabera urugero rwiza bakarangwa no gukorwa ibyiza, bakitandukanya n’ikibi.

Kaminuza ya UTB yatangiye mu 2008 yigisha iby’amahoteli n’ubukerarugendo ariko ubu ikaba ifite amashami atandukanye mu ikoranabuhanga n’ubucuruzi.
Ifite amashami abiri, rimwe riri i Rubavu n’irindi riherereye i Kigali mu Karere ka Kicukiro ari na ho hari icyicaro gikuru.

Iki gikorwa cyateguwe mu rwego rwo kwibuka imiryango y’abanyeshuri n’abakozi b’iyi kaminuza n’abandi batutsi bishwe bazira ubusa mu gihe cya Jenoside yakorewe Abatutsi muri Mata 1994.

Umuyobozi Mukuru wungirije ushinzwe Amasomo, Ubushakashatsi n'Imyigire muri UTB, Prof Dr. Tombola Gustave acanira abnyeshuri urumuri rw'icyizere
Umuyobozi ushinzwe ibikorwa byo kugorora muri RCS, ACP Kabanda Jean Bosco, yatanze ikiganiro kivuga ku nzira y'inzitane yo kubohora u Rwanda
Umuyobozi muri Kaminuza y'Ubukerarugendo n'ubucuruzi (UTB), Dr Kabera Callixte acanira abanyeshuri urumuri rw'icyizere
Umuyobozi w'ishami rishinzwe guteza imbere uburezi mu nama Nkuru y'Amashuri makuru na Kaminuza (HEC), Dr. Théoneste Ndikubwimana
Umuyobozi Mukuru akaba ari nawe washinzwe UTB, Mukarubega Zulfat, acanira abanyeshuri urumuri
Uwashinze UTB, Mukarubega Zulfat

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza