Kwamamaza

Kigali: Abiga ubuforomo n’ububyaza beretswe ibyo bazirinda batangiye akazi

Yanditswe kuya 16-09-2016 saa 20:32' na Niyonsenga Schadrack


Kaminuza y’u Rwanda Ishami ry’Ubuvuzi n’Ubuzima yamurikiye abiga ubuforomo n’ububyaza ubushakashatsi bugaragaza amakosa akorwa muri uyu mwuga, ibasaba kujya batanga serivisi zinoze mu gihe bageze mu kazi.

Mu kwezi gushize mu Karere ka Gakenke, Polisi yataye muri yombi umuforomokazi wibye umwana agapfunyikira umubyeyi we igikarito kirimo igipupe n’amabuye abiri, amubwira ko uruhinja rwe rwapfuye.

Ubuyobozi bw’Urugaga rw’abaforomo n’ababyaza mu Rwanda bwanenze iki gikorwa ndetse batangaza ko imico nk’iyi idakwiye kugaragara muri uyu mwuga.

Abarimu n’abanyeshuri biga mu cyiciro cya Gatatu cya Kaminuza mu ishami ry’ubuforomo n’ububyaza ku bufatanye n’Ishami ry’Umuryango Mpuzamahanga wita ku baturage (UNFPA), bamuritse ubushakashatsi kuri uyu wa Gatanu tariki ya 16 Nzeri 2016 mu Mujyi wa Kigali, bwari bugamije kureba ibikeneye gukorwa mu rwego rwo kunoza serivisi z’ububyaza mu Rwanda ndetse no gusuzuma niba amasomo atangwa muri uyu mwuga yaba akoreshwa mu kazi.

Kwiba abana, uburangare butuma abana n’ababyeyi bapfa mu gihe cyo kubyara, umubare muke w’ababyaza babyize n’ababihuguriwe, ni bimwe mu bibazo byagarutsweho muri ubu bushakashatsi bwamurikiwe abarimu n’abanyeshuri mu mwuga w’ubuforomo n’ububyaza mu Rwanda.

Umuyobozi w’agateganyo wa Koleji y’Ubuvuzi n’Ubuzima, Dr Kagwiza Jeanne yayoboye ubu bushakashatsi avuga ko abiga ubuforomo n’ububyaza muri iri shuri rya Kaminuza y’u Rwanda batigishwa ubumenyi n’ubuhanga ahubwo banigishwa imyitwarire iboneye.

Yagize ati “Nyuma yo kubigisha amasomo asanzwe, tunabigisha imyitwarire iboneye y’uburyo bagomba kwitwara mu kazi, ndetse tugiye kubishyiramo imbaraga cyane. Ubundi umubyaza ni umuntu ugomba kuba afitiwe icyizere, igihe umubyeyi ategereje umwana akumva ko ari mu maboko y’umuntu uri bumufashe kwakira impano y’umwana Imana imugenera.”

Dr Kagwiza avuga ko ibibazo byinshi biri mu mwuga w’ubuforomo n’ububyaza mu Rwanda bikunze guterwa n’imyitwarire idahwitse.

Ati “ Byaratubabaje cyane kumva uwibye umwana, ni na yo mpamvu dukora ubushakashatsi nk’ubu. Abaforomo bagomba kumenya neza uko bakwiye kwitwara imbere y’umubyeyi uba yabagiriye icyizere cy’uko bari bumufashe, bakamenya kwita ku mwana wavutse.”

Umuforomo ufatiwe mu makosa ahanwa hakurikijwe amategeko yashyizweho n’inzego bireba.

Umuyobozi w’Urugaga rw’abaforomo n’ababyaza mu Rwanda, Murekezi Josephine yatangaje ko bafite uburyo bwo guhana abarengereye bakarenga ku mahame agenga uyu mwuga.

Yagize ati “Umubyaza ukoze icyaha nk’icy’uwibye umwana agihanirwa mu bashinzwe imyitwarire mu rugaga rw’ababyaza, akanagihanirwa mu mategeko ya Leta.”

Yavuze ko iyo habaye ikibazo kidasanzwe nk’iki bahita basubira guhugura abari muri uyu mwuga bose babasaba kubigendera kure kuko ari igisebo ku muryango Nyarwanda wose muri rusange.

Urugaga rw’ababyaza rutangaza ko ikibazo cy’ubuke bw’abaforomo kiri kugenda gikemuka kuko ku bufatanye na Minisiteri y’Ubuzima hafunguwe andi mashuri atandukanye y’ubuforomo n’ububyaza mu rwego rwo kongera umubare w’ababyaza ukiri ku kigero cyo hasi.

Kuri ubu ngo 60% by’ababyaza bamaze guhugurirwa gukora neza uyu mwuga. Mu Rwanda habarurwa abaforomo n’ababyaza 1380 mu gihe Umuryango Mpuzamahanga wita ku buzima wasabye ko nibura igihugu kigomba kuba gifite abagera ku 3660.

Minisiteri y’Ubuzima ifite intego y’uko nibura buri mubyeyi ugiye kubyara yitabwaho n’ababyaza babiri.

Umuyobozi w’agateganyo wa Koleji y’Ubuvuzi n’Ubuzima, Dr Kagwiza Jeanne
Abitabiriye igikorwa cyo kumurika ubushakashatsi
Abiga ubuforomo n'ububyaza basabwe kwitwararika mu gihe bageze mu kazi

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 25 September 2016
Copyright © 2009 -2014 - IGIHE Ltd - All Rights Reserved