Abiga ububyaza muri Mount Kenya bahawe ubumenyi buzabafasha guhangana n’impfu z’abana n’ababyeyi

Yanditswe na Iradukunda Serge
Kuya 8 Kanama 2019 saa 05:37
Yasuwe :
0 0

Abanyeshuri 67 biga ububyaza muri Kaminuza ya Mount Kenya Rwanda, basoje amahugurwa abategura kuzahangana n’ikibazo cy’abana bapfa bavuka n’ababyeyi bapfa babyara igihe bazaba bageze mu kazi.

Aya mahugurwa yatanzwe binyuze muri gahunda ya ‘5000 Happy Birthday Project’ igamije kwibutsa umubyaza wahawe aya mahugurwa ko agomba kwiha intego yo kurokora ababyeyi n’abana 5000.

Aba banyeshuri bahuguwe uburyo bahangana n’ikibazo umubyeyi ashobora kugira kuva asamye kugeza ageze ku munsi wa 42 abyaye.

Amwe mu masomo yatanzwe muri aya mahugurwa ni ayajyanye no gufasha umwana guhumeka mu gihe byamunaniye, gufasha abana bavutse batagejeje igihe ndetse no gufasha umubyeyi wagize ibibazo bitandukanye abyara birimo kuva.

Umwarimu muri Kaminuza ya Mount Kenya akaba n’umwe mu batanze aya mahugurwa, Mukarwego Béatha, avuga ko nubwo impfu z’abana zagabanyutse ariko zitashize burundu nkuko bigaragazwa na raporo zitandukanye, akaba ariyo mpamvu hakwiye gutegurwa amahugurwa nk’aya.

Ati “Tubahugura kubera ko dukurikije raporo tubona muri RBC [Ikigo cy’Igihugu gishinzwe ubuzima] na OMS zigaragaza impfu z’abana n’ababyeyi. Twafashe uyu mushinga kugira ngo duhugure, tugabanye cyane bishoboka impfu z’ababyeyi n’abana kandi biragaragara ko zagabanutse”.

Mukarwego yongeyeho ko ubumenyi abanyeshuri bakuye muri aya mahugurwa buzabafasha mu gihe bazaba bageze ku isoko ry’umurimo kuko bazasanga hari icyo barusha abatarayakoze.

Muri aya mahugurwa abanyeshuri bakoreye imyotozo izabafasha kwita ku babyeyi n’abana ku bipupe no ku bantu bahuguriwe kwigana abarwayi.

Umwe mu banyeshuri basoje aya mahugurwa Byukusenga Nadine, asanga aya aya mahugurwa ari inyongera ku bumenyi baba baherewe mu ishuri.

Ati “Twari twarabyize ariko ibi byaje ari nk’inyongera batwungura ubundi bumenyi bushyashya nko gufasha umwana guhumeka igihe byamunaniye akimara kuvuka”.

Iyi gahunda ya ‘5000 Happy Birthday Project’ ikorerwa mu bihugu 80 birimo n’u Rwanda, ikaba yaratangijwe n’urugaga rw’ababyaza ku rwego rw’Isi.

Umuyobozi w’urugaga rw’ababyaza mu Rwanda Murekezi Josephine, yavuze ko hari byinshi bimaze gukorwa ngo impfu z’ababyeyi n’abana zigabanuke.

Ati “Ubu dufite imodoka zishobora gutwara ababyeyi bafite ibibazo, ubushize nababwiye imibare y’abana n’ababyeyi bapfa ariko turizera ko imibare itaha izaza yararushijeho kugabanuka kandi turimo turagerageza uburyo twagera ku ntego z’iterambere rirambye”.

Mu Rwanda impfu z’ababyeyi bapfa babyara zagabanutse ku kigero cya 77% hagati y’umwaka wa 2000 na 2013 ubu mu bagore 100 000 babyara hapfa abagera kuri 320.

Abanyeshuri 67 biga ububyaza muri Mount Kenya University Rwanda nibo bitabiriye aya mahugurwa
Aya mahugurwa bayahawe nk'inyongera ku masomo yabo
Ubwo basozaga aya mahugurwa kuri uyu wa Gatatu
Bahawe impamyabushobozi z'amahugurwa bahawe
Abasoje aya mahugurwa bitezweho kugabanya impfu z'abana n'ababyeyi
Impamyabushobozi bahawe ziremeza ko bahuguwe
Dr Connie Mureithi, umuyobozi w'agashami kigisha igiforomo muri MKUR na Dr Kamande Mercelline umuyobozi wungirije ushinzwe amasomo n'ubushakashatsi muri MKUR bari mu bitabiriye isozwa ry'aya mahugurwa
Mukarwego Béatha, uri mu bahuguye abanyeshuri asanga aya mahugurwa azabafasha umunsi bageze ku isoko ry'umurimo
Murekezi Josephine yatangaje ko hari byinshi bimaze gukorwa ngo impfu z'abana n'abagore zigabanyuke
Murekezi Josephine, umuyobozi w'urugaga rw'ababyaza mu Rwanda (ibumoso) na Dr Kamande Mercellyne baha impamyabushobozi umwe mu banyeshuli basoje aya mahugurwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza