Abiga mu mashuri y’amadini barasaba ubuyobozi kubacira inzira ibahesha buruse mu mahanga

Yanditswe na Prudence Kwizera
Kuya 8 Kanama 2017 saa 01:46
Yasuwe :
0 0

Mu Rwanda hagaragara amashuri menshi by’umwihariko ashamikiye ku madini n’amatorero, abayigamo bakaba basanga abayobozi bayo mashuri bakwiye gushyira ingufu mu kubibyaza umusaruro, bagacira inzira abanyeshuri babo bakajya kuminuza mu mahanga no kongera ubumenyi.

Aba banyeshuri babivuga bashingiye ku kuba muri iki gihe hari amwe mu mashuri yo mu Rwanda adatanga ubumenyi n’ubushobozi buhagije ku buryo abayasohotsemo bashobora guhangana ku isoko ry’umurimo, bityo bakifuza ko bajya bahabwa amahirwe yo kujya guhaha ubumenyi mu mahanga biciye mu madini n’amatorero afitanye ubufatanye n’ishuri ryabo.

Bamwe mu banyeshuri biga mu ishuri rikuru ry’Abapolotesitanti mu Rwanda, PIASS, baragaraje iki cyifuzo, ubwo muri iri shuri hateraniraga Inteko Nkuru ngarukamwaka y’ihuriro rya Kaminuza enye z’Abapolotesitanti muri Afuruka.

Bamwe mu banyeshuri bo muri PIASS babwiye IGIHE ko bishimira ko ishuri ryabo ryinjiye muri iryo huriro, ariko nanone rikwiye kubyazwa umusaruro bakajya boherezwa kwiga mu bihugu bitandukanye bakunguka ubumenyi, ubushobozi n’ubunararibonye.

Umuyobozi Mukuru wa PIASS, Prof Elisé Musemakweli, avuga ko iryo huriro baryinjiyemo mu mwaka ushize wa 2016, ariko mu byo bungukiramo ari uguhanahana ubunararibonye, kujya inama ku cyateza imbere ireme ry’uburezi mu mashuri yabo, kandi bagiye no kujya bohereza abanyeshuri kwiga mu mashuri yo mu mahanga hagamijwe gukarishya ubwenge.

Prof Musemakweli ati “Inyungu ya mbere ni uguhana ubunararibonye ku myigire na gahunda zo kwigisha, abarimu babo bakaba bava hamwe bakajya kwigisha ahandi, ikindi ni uko nka Kaminuza zitanga impamyabushobozi ku rwego rwa Masters cyangwa PHD zo muri ibyo bihugu, abanyeshuri bacu bashobora kujya kwigayo”.

Prof Musemakweli avuga kugeza ubu PIASS itaratangira kohereza abanyeshuri kuminuza muri ibyo bihugu kubera ko binjiye muri iryo huriro vuba, ariko akemeza ko ari gahunda izashoboka kuko byaganiriweho.

Ati “Nk’i Kinshasa muri Congo hari Ecole Doctorale mu bijyanye n’ubukungu ndetse n’icungamutungo, naho i Youndé muri Cameroun hari Ecole Doctorale mu bijyanyena Science Sociales. Abanyeshuri baturutse muri izo kaminuza zifitanye ubufatanye babasha kujya kwigayo ku mu buryo bworoshye batiriwe bajya i Burayi gutangayo amafaranga mesnhi kuko nitwe tubaha buruse”.

Kugeza ubu ihuriro rya Kaminuza enye z’Abapolotesitanti muri Afurika ribamo amwe mu mashuri yo mu bihugu bya Cameroun, u Burundi, Repubulika Iharanira Demokarasi ya Congo n’u Rwanda, ariko ubuyobozi bwaryo buvuga ko hari gahunda yo kongeramo n’andi amashuri.

PIASS ni ryo shuri ryo mu Rwanda ryonyine ribarizwa muri iryo huriro kandi na yo yinjiyemo umwaka ushize nyuma yo kubisaba.

Abayobozi ba Kaminuza z'abapolotesitanti muri Afurika mu nteko ngarukamwaka y'ihuriro ryazo
Abayobozi ba Kaminuza z'Abapolotesitanti bitabiriye ihuriro nagarukamwaka ryabereye muri PIASS mu Rwanda

prudence@igihe.rw


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza