Abiga mu ishuri rya gisirikare muri Zambia bahigiye kwigana ibikorwa bya RDF

Yanditswe na Kanamugire Emmanuel
Kuya 25 Nzeri 2016 saa 06:28
Yasuwe : XX
0

Itsinda ry’abanyeshuri biga mu ishuri rya gisirikare muri Zambia baje kwigira ku Rwanda uko rukora mu bijyanye n’imirimo yo guteza imbere ubukungu bw’igihugu, politiki ndetse n’imibanire n’abaturage.

Aba basirikare basuye Urwibutso rwa jenoside rwa Kigali ruri ku Gisozi kuri uyu wa 25 Nzeri.

Brig.Gen Sitali Alibuzwi ushinzwe amasomo ya gisirikare muri Zambia uyoboye iri tsinda yavuze ko bahisemo gukorera urugendoshuri mu Rwanda bakarwigiraho ukuntu ruyobora ibikorwa byarwo byose.

Bahereye ku mateka y’u Rwanda yose basobanuriwe amateka yo kuva mu gihe cy’abami,mu gihe cy’ubwigenge ubwo hatangiraga Repubulika ari na bwo amateka agaragaza ko hatangiye gutegurwa Jenoside, mu bihe by’intambara yo kwibohora yatangijwe na RPF, mu gihe cya Jenoside ndetse na nyuma yayo kugeza ubu.

Brig.Gen Sitali Alibuzwi yagize ati “Ni iby’agaciro ko ubu u Rwanda ari intangarugero muri Afurika kubera ibyo rwanyuzemo n’uburyo rwabyitwayemo rukabasha kubisohokamo neza ubu rukaba rugeze kuri uru rugero tureba twese, twabonye intambwe ishimishije yatewe mu nzego zose.”

Akomeza agira ati “Ikiruta byose, uru ruzinduko ni ingenzi cyane ku banyeshuri bacu kuko bishimiye ibyo bigiye hano ku rwibutso rwa Gisozi. Batwemereye ko babonye uburyo bakwiye kurinda igihugu nk’uko RDF yabigenje ihagarika Jenoside. Ni ibintu byiza kubona uko bavunitse bakemera bakitangira igihugu kandi by’akarusho ubu bakaba barabashije kuvura ibikomere bakunga abanyarwanda ubu bakaba babanye amahoro nyuma y’aya mahano tubonye hano.”

Brig.Gen Sitali avuga ko nubwo igihugu cye kitarimo intambara cyangwa andi macakubiri y’umwihariko ngo ibibazo ntibijya bibura,ahari abantu hahora n’igongana rya hato na hato, ikaba ariyo mpamvu ahamya ko ubwo aba banyeshuri bazaba bamaze kurangiza amasomo yabo babaye abasirikare bakuru ngo bazabasha gukemura amakimbirane yavuka mu gihugu cyabo ndetse n’ahandi ku Isi bafatiye urugero ku byakozwe n’ingabo z’u Rwanda.

Zambia isanzwe ifitanye umubano mwiza ushingiye ku bucuruzi n’u Rwanda. Urwibutso rwa Kigali ruri ku Gisozi aba basirikare basuye rushyinguyemo imibiri y’abazize Jenoside barenga ibihumbi 250.

Aba basirikare bunamiye abazize Jenoside bashyinguye ku Gisozi
Ubwo bashyiraga indabo ku mva zishyinguyemo abazize Jenoside
Basuye ibice bitandukanye bigize urwibutso rwa Kigali ku Gisozi
Brig. Gen Sitali Alibuzwi, wari uyoboye itsinda ry'abasirikare bo muri Zambia basuye u Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza