Kwamamaza

Abayobozi bakoresha nabi gahunda zagenewe abatishoboye basabiwe ibihano bikomeye

Yanditswe kuya 1-11-2016 saa 08:28' na Rabbi Malo Umucunguzi


Raporo y’Umuvunyi Mukuru, Aloysia Cyanzayire y’umwaka wa 2015/2016 igaragaza ko hakiri inyerezwa ry’umutungo wa leta n’ikoreshwa nabi rya gahunda zigenewe guteza imbere abaturage, ugasanga hari amafaranga menshi agihabwa amatsinda ya baringa.

Muri iyi raporo yashyikirijwe abadepite kuri uyu wa Mbere, Cyanzayire yavuze ko igenzura ryakozwe mu turere twa Rubavu, Nyagatare, Gatsibo, Gicumbi, Ngorerero, Muhanga, Nyarugenge, Karongi na Rusizi, ryerekanye ko gahunda za VUP ziri mu zakoreshwejwe nabi.

Ni ibintu byatumye abadepite benshi basaba ko Itegeko Rikurikizwa mu guhana aba abagenda bagaragaraho amakosa.

Iyo raporo hari aho igira iti “Mu Murenge wa Nyakiliba muri Rubavu, miliyoni 19.9 Frw zahawe abantu batazikwiriye naho miliyoni 14.6 Frw zo zihabwa amatsinda atabaho. Mu murenge wa Rubavu miliyoni 13.1 Frw ho zagurijwe amatsinda atabaho. Mu karere ka Rusizi, miliyoni 8.8 Frw zagurijwe abantu 10 batari mu cyiciro kirebwa na VUP mu gihe muri Ngororero ho miliyoni 7.3 zifatiwe n’uwitwa Fidele Nshiragahinda wari Umunyamabanga Nshingwabikorwa w’Umurenge wa Muramba,”

Depite Henriette Mukamurangwa yavuze ko VUP yagombaga kugenzurwa igitangira kugaragazwamo ubujura bumaze igihe, asaba ko hashyirwaho ingengabihe ngo ibyo bibazo bisuzumwe neza.

Ati “Buri gihe iyo dusuye abaturage ikibazo cy’ikoreshwa nabi rya VUP kiragaruka. Iyi gahunda yagakwiye gukemura ibibazo by’abaturage, ariko ibyo tubona muri izi SACCO ni ubujura kumanywa y’ihangu. Ibi bibazo byose by’amatsinda ya baringa bikwiye gukorwaho iperereza.’’

Depite Adolphe Bazatoha yavuze ko biteye impungenge ko gukoresha nabi izi gahunda bitagabanuka kandi bikagira ingaruka ku iterambere ry’igihugu.

Ati “Abantu batangiye kwibaza icyo dukora. Bamwe bavuga ko Komisiyo ishinzwe kugenzura ikoreshwa ry’umutungo wa leta itega amatwi abayobozi basaba imbabazi gusa umwaka ugashira undi ugataha, ariko ntihagire igikorwa.’’

‘‘Hari aho nabonye muri raporo aho Umuvunyi avuga ko tugomba gushishikariza inzego za leta kubaruza imitungo yazo. Ni igihe kingana iki bagomba gushishikarizwa kandi ni gute abantu bashishikarizwa kuzuza inshingano zabo? Ni uko nta ngaruka ziba zihari? Ni uko nta mategeko cyangwa ni uko amategeko atabateganyiriza ibihano?’’

Ibibazo by’akarengane

Nk’uko The New Times yabitangaje, Umuvunyi Mukuru yagarutse kuri bimwe mu bibazo byagiye bigaragazwamo akarengane, nk’uko ari imwe mu nshingano uru rwego rw’Umuvunyi rufite.

Ati “Twakiriye ibibazo 1105, muri byo 657 byarakemutse, 156 byohererezwa izindi nzego bireba, 194 biri gukorwaho iperereza mu gihe 96 bikirebwaho. Muri rusange twakiriye ibibazo byinshi birebana n’ubutaka bingana na 46.7%, naho 19.5 birebana no kutishimira ibyemezo byagiye bifatwa,’’

Urwego rw’Umuvunyi kandi rufite inshingano yo kuba rwasaba ko urubanza rusubirishwamo mu gihe bibaye ngombwa, ndetse hakaba hari ibyakozwe.

Cyanzayire yakomeje agira ati ‘‘Mu 2015/16, twakiriye amadosiye 2635 dusesengura agera kuri 701, muri ayo yose, 73 angana na 10.4% yasabiwe gusubirwamo naho 628 dusanga umwanzuro warafashwe mu buryo bukwiye, 1934 yo yari atarakorwaho ubwo iyi raporo yakorwaga.’’

Cyanzayire yanavuze ko mu rwego rwo kurangiza ibibazo byari bimaze igihe, aho mu 2015/16, Urwego rw’Umuvunyi rwari dufite amadosiye 71 amaze igihe, 58 muri yo arasuzumwa ndetse hanandikwa amabaruwa asaba inzego bireba kurangiza ibibazo.

Umuvunyi Mukuru, Aloysia Cyanzayire

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 5 Ukuboza 2016
Copyright © 2009 -2014 - IGIHE Ltd - All Rights Reserved