00:00:00 IGIHE NETWORK KN KINYARWANDA EN ENGLISH FR FRANCAIS

Abayobozi b’inzego z’ibanze basabwe gufasha abaturage gusesengura amakuru y’ukuri n’impuha

Yanditswe na IGIHE
Kuya 11 Nyakanga 2021 saa 08:00
Yasuwe :
0 0

Umuryango RJSD (Rwanda Journalists for Sustainable Development) wasabye abayobozi b’inzego z’ibanze barimo ab’uturere, imirenge n’utugari, gufasha abaturage gutandukanya amakuru abageraho anyuze mu bitangazamakuru bitandukanye n’imbuga za internet no ku mbuga nkoranyambaga.

Uku gutandukanya amakuru abageraho bizafasha guhitamo amakuru y’ukuri abafasha gufata ibyemezo byiza bibafasha mu iterambere ryabo ubwabo no ku gihugu muri rusange.

Umuryango RJSD wemeza ko mu gihe abaturage babashije gusobanukirwa neza n’amakuru abageraho aturutse mu bitangazamakuru bitandukanye, bagahitamo ay’ukuri, bizafasha gukemura ikibazo cy’amakuru y’ibihuha n’ibinyoma, ayobya rubanda kandi akaba akomeje gutangazwa ku nyungu bwite za bamwe, hatitawe ku nyungu rusange z’umuturage.

Umuyobozi wa RJSD, Ngirinshuti Placide, yasobanuye ko hakwiye uburyo buhamye bwo gutanga ayo mahugurwa.

Yagize ati “Muri iki gihe abantu bose babaye abanyamakuru cyane cyane abakoresha imbuga nkoranyambaga. Hari abatangaza amakuru y’ibinyoma n’ibihuha kubera inyungu zabo bwite ndetse hari n’abandi babikora kubera ubumenyi buke.”

Umuyobozi wungirije wa RJSD, Ntawirema Célestin, asobanura ko muri iki gihe abaturage bakwiye kubona uburenganzira bwo kubona amakuru, by’umwihariko bakabona amakuru y’ukuri kandi abafitiye akamaro.

Yagize ati “Ikibazo Isi yose ihanganye nacyo muri iki gihe, ni uko abaturage benshi bari kubona amakuru atandukanye kandi harimo n’ashobora kubayobya. Umuturage ashobora kugirwaho n’ingaruka z’uko yahawe amakuru y’ibinyoma n’ibihuha, bityo tugomba gufatanya n’inzego zose yaba iza leta, imiryango ya sosiyete sivile n’abikorera, tukarwanya amakuru y’ibihuha n’ibinyoma, mu rwego rwo kurengera uburenganzira bw’abaturage.”

Umuryango RJSD usaba ko iki kibazo gikwiye kubonerwa umuti binyuza mu biganiro n’amahugurwa ahabwa abaturage kugira ngo bagire ubushobozi bwo gusesengura amakuru abageraho.

Ni muri uru rwego uyu muryango wateguye ikiganiro rusange kuri iki kibazo, giteganijwe kuba ku wa 27 Nyakanga 2021. Kizahuriza hamwe abayobozi b’uturere n’imirenge byose byo mu gihugu n’abaturage mu rwego rwo kwibutsa abayobozi inshingano zo gufasha abaturage gusesengura no guhitamo amakuru meza abagenewe abafasha kugera ku iterambere rirambye.

Umuryango RJSD ukomeje ibikorwa bitandukanye byo gufasha igihugu kugera ku iterambere rirambye binyuze mu itangazamakuru by’umwihariko mu burenganzira bwo kubona amakuru (Access to information for development).

Ibi bikazafasha Leta y’u Rwanda kugera ku ntego Isi yose yihaye mu 2030 kuko abaturage bafite amakuru meza bihutisha iterambere ryabo n’igihugu.

Mu 2019 ni bwo abanyamakuru bo mu bitangamamakuru byo mu Rwanda no mu mahanga, bishyize hamwe bashinga umuryango wa RJSD bagamije gufasha Abanyarwanda muri rusange kugera ku iterambere rirambye, hifashishijwe uburyo burambye n’uburenganzira bwo kubona no kumenya amakuru kuri buri wese, cyane cyane amakuru agamije iterambere.

Mu bindi bikorwa RJSD iteganya, harimo gukorana n’amashuri makuru na za kaminuza yigisha itangazamakuru n’itumumanaho n’ayisumbuye. Ni mu rwego rwo gufasha abayigamo kubongerera ubumenyi bukenewe muri iki gihe no kubafasha kwinjira mu kazi kinyamwuga.

Abayobozi b’inzego z’ibanze basabwe gufasha abaturage gusesengura amakuru y’ukuri n’impuha

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .