Abayobozi b’ibikorwa bya Gisirikare muri EAC barasura RDF

Yanditswe na Kanamugire Emmanuel
Kuya 17 Ukwakira 2016 saa 01:52
Yasuwe : XX
0

Abayobozi b’ibikorwa bya gisirikare bibyara inyungu mu bihugu bigize Umuryango w’Afurika y’i Burasirazuba(EAC) barasura iby’ingabo z’u Rwanda biteganyijwe kujya mu byasangirwa n’ingabo z’ibyo bihugu.

Gusangira ibyo bikorwa mu ikoreshwa ryabyo bigenwa mu ngingo ya kabiri y’amasezerano ashyiraho EAC ku bijyanye n’imikoranire hagati y’ingabo z’ibihugu biyigize. Iyo ngingo ikaba igena ingengabihe y’ibikorwa hagati ya Nyakanga n’Ukuboza 2016.

Abayobora ibyo bikorwa by’ingabo mu Rwanda, Uganda na Kenya bahuriye mu nama y’iminsi itatu irimo kubera i Kigali, guhera ku wa Mbere tariki ya 17 Ukwakira 2016.

Col Francis Mbindi, ukora mu biro bishinzwe ibikorwa bya gisirikare mu bihugu bigize EAC, yavuze ko baje mu Rwanda mu nama ihuje abo bayobozi ndetse no gusura ibikorwa u Rwanda rwagaragaje ko byajya mu byasangirwa n’ingabo z’ibi bihugu.

Ati “Intego ni ugusangira amakuru ahari ku bijyanye n’ibikorwa bya gisirikare bibyara inyungu ibihugu byatanze no kugena uko byazajya byifashishwa n’izo ngabo muri rusange.”

Ibyo bikorwa ngo byemejwe mu nama iherutse guhuza abo bayobozi i Dar es Salaam muri Tanzania muri Kamena uyu mwaka.

Col Mbindi ati “Ubu turi hano mu Rwanda, ngo tujye kureba ibyo bikorwa byari byasabwe gusurwa ngo bishyirwe muri urwo rwego mu nama yacu iheruka.”

Yavuze kandi ko ingabo z’ibyo bihugu zizajya zihanahana amakuru n’ubunararibonye bw’ibyo bikorwa no guhanahana ikoranabuhanga byifashisha.

Mu Rwanda barasura ibikorwa bitanduakanye nk’uko byatangajwe na Col Haguma Eugene, Umuyobozi mukuru wa Horizon Group, sosiyete y’ingabo z’igihugu ikora ibikorwa birimo ibyo kubaka imihanda.”

Col Haguma yavuze ko ibisurwa birimo Uruganda rusya amabuye yifashishwa mu kubaka imihanda ya kaburimbo( Kinyinya Asphalt and Concrete Plant) ruri i Kinyinya, runubaka imihanda ndetse n’urutunganya ibireti(Agropy) ruri i Musanze.

Ibihugu bya Tanzania, Kenya na Uganda byagiye bitanga ibikorwa bibyara inyungu by’ingabo zabyo bikaba byaramaze no kwemezwa. Nka Tanzania yatanze sosiyete yitwa Nzinga Cooperation, ikora ibijyanye n’intwaro n’ibikoresho bya gisirikare.

Muri iyi nama Tanzania n’u Burundi ntabwo byari bihagarariwe, ariko ngo ntibiyibuza kuba kuko byatangaje gahunda zatumye abo bayobozi b’ibikorwa bya gisirikare bibyara inyungu batabasha kuyitabira, ku buryo baza guhabwa n’imyanzuro iyifatirwamo.

Abasirikare bo mu bihugu bya EAC bahagarariye ibikorwa bibyara inyungu mu nama i Kigali
Col Haguma, Umuyobozi wa Horizon
Umuyobozi uhagarariye ibikorwa by'ingabo bibyara inyungu muri Uganda hamwe na Col Haguma uhagarariye iby'u Rwanda
Abitabiriye iyi nama mu ifoto rusange
Col Mbindi avugana n'itangazamakuru

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza