Kwamamaza

Abayisilamukazi basabwe gukumira iterabwoba birinda gukurikira indonke mu mahanga

Yanditswe kuya 5-09-2016 saa 15:17' na Thamimu Hakizimana


Umuryango w’Abayisilamu mu Rwanda, RMC wasabye abakobwa b’Abayisilamu batuye mu Ntara zitandukanye z’igihugu kudakurikira indonke z’abagabo bo mu mahanga kuko ngo zishobora kubashora mu mitwe y’iterabwoba.

Ibi babisabwe kuri iki Cyumweru tariki ya 4 Nzeri 2016, ubwo basozaga amahugurwa y’urubyiruko rw’abayisilamu yo kurwanya iterabwoba yari afite insanganyamatsiko igira iti “ Ikoranabuhanga n’ingaruka zaryo” bari bamazemo iminsi ibiri mu Mujyi wa Kigali.

Ubuyobozi bw’Umuryango w’Abayisilamu RMC buvuga ko bwahisemo gushishikariza cyane abana b’abakobwa kwirinda gukurikira indonke z’abagabo bo mu mahanga ngo kuko zishobora kubashora mu iterabwoba nyuma y’uko mu bantu bafashwe bakurikiranyweho ibikorwa by’iterabwoba harimo n’abakobwa.

RMC igaragaza ko abakobwa hafi ya bose baba bashaka kujya mu mitwe y’iterabwoba baba bagiye kuba abagore b’abagabo bayibarizwamo.

Imamu w’Umujyi wa Kigali, Sheikh Musa Sindayigaya yagize ati “Nibyo koko abantu nka bariya ntibavangura kuko batwara abahungu n’abakobwa, bitewe n’uko iriya mitwe y’iterabwoba ifata abasore kugira ngo bayifashe mu mirwano, mu gihe abakobwa bafatwa ngo bajye kuba abagore b’abo bagabo baba bari muri iyo mitwe cyangwa se kujya kubitaho.”

Umuyobozi wungirije wa RMC,Sheikh Nshimiyimana Saleh we yabwiye IGIHE ko aya mahugurwa y’urubyiruko bayateguye ahanini bashingiye ku kuba ari rwo rugaragara mu bikorwa by’iterabwoba cyane.

Yagize ati “Ni ukugira ngo tubagaragarize indwara cyangwa se icyaha cy’ubuhezanguni kiri kugaragara mu rubyiruko.Mu minsi ishize mwumvise ibyabereye mu Bugarama aho abana batandatu bari bihishe mu nzu ahantu bahamaze ukwezi, bikaza kugaragara ko bari mu migambi mibi y’ubuhezanguni n’iterabwoba.”

Ingabire Shadia w’imyaka 23 utuye mu Murenge wa Nyakabanda mu Karere ka Nyarugenge we yemeza ko aya mahugurwa ari ingirakamaro cyane cyane kuri bo nk’abana b’abakobwa.

Yagize ati “ Inyigisho twahawe zizadufasha cyane kuko murabizi nk’abana b’abakobwa hari igihe abantu badushuka bashingiye ku mbaraga nke zacu ariko amasomo twahawe tugiye kuyabyaza umusaruro twigisha na bagenzi bacu ibyiza by’ikoranabuhanga n’ububi bwaryo cyane cyane ko banatugaragarije ko abantu benshi bajya mu mitwe y’iterabwoba ari ryo bakoresha.”

Urubyiruko rugera kuri 210 nirwo rwitabiriye aya mahugurwa agamije kurwanya iterabwoba aho bahawe ibiganiro bitandukanye byagarutse ku mateka y’idini ya Islam mu Rwanda, inkomoko y’imitwe yiyitirira ubuyisilamu ndetse banagaragarizwa na Polisi uburyo ikoranabuhanga rikoreshwa mu gukwirakwiza ibikorwa by’ubutagondwa n’ibindi.

Abayobozi bo mu muryango w'Abayisilamu mu Rwanda mu batanze ibiganiro
Abagera kuri 210 nibo bitabiriye amahugurwa y'iminsi ibiri yiga ku guhashya iterabwoba
Ingabire Shadia ashimangira ko amasomo bahawe azabafasha kurwanya iterabwoba bivuye inyuma
Imamu w'Umujyi wa Kigali, Sheikh Musa Sindayigaya
Umuyobozi wungirije wa RMC Sheikh Nshimiyimana Saleh
Abitabiriye amahugurwa bari bagabanyije mu matsinda atandukanye

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Tuesday 27 September 2016
Copyright © 2009 -2014 - IGIHE Ltd - All Rights Reserved