Abavurirwa Coronavirus mu ngo n’abafite agakoko ka SIDA bagobotswe bahabwa ibiribwa

Yanditswe na Tuyishimire Raymond
Kuya 22 Mutarama 2021 saa 10:21
Yasuwe :
0 0

Urugaga Nyarwanda rw’Amashyirahamwe y’Ababana na Virusi itera SIDA (RRP+) ku bufatanye n’Ikigo cy’Igihugu cy’Ubuzima, RBC, rwahaye inkunga abaturage bo mu Murenge wa Kimisagara mu Karere ka Nyarugenge, bagize ibyago byo kwandura Coronavirus bakarwarira mu rugo n’abasanzwe bafite ubwandu bwa SIDA.

Ni igikorwa cyabaye ku wa 22 Mutarama 2021, ku Kigo Nderabuzima cya COR UNUM Kimisagara gisanzwe gifasha abafite Virusi itera SIDA mu bijyanye n’ubujyanama no kubakurikirana.

Iyi nkunga yagenwe ku miryango 119, irimo ibiribwa nk’umuceri, ibishyimbo, ifu y’igikoma, amasabune ndetse n’udupfukamunwa. Yatanzwe mu gihe Umujyi wa Kigali uri muri gahunda ya Guma mu Rugo washyizwemo nyuma y’imyanzuro y’Inama y’Abaminisitiri yateranye ku wa 19 Mutarama 2021.

Mukantabana Zainabu utuye mu Murenge wa Kimisagara mu Kagari ka Nyagakoki, mu Karere ka Nyarugenge, uri mu bahawe inkunga, yavuze ko igiye kubagoboka cyane mu bihe bibagoye.

Ati “Njye biranshimishishije cyane kuko ibi ngibi ni ibintu umuntu aba atatekerezaga ko byaba. Iyi nkunga iramfasha byinshi kuko bamwe inzara yari yaratwishe. Icyo nababwira ni ukubashimira.’’

Umukozi wa RBC ukuriye Porogaramu y’Igihugu yo kurwanya SIDA , Dr Rwibasira Gallican, yavuze ko iyi gahunda yakozwe mu rwego rwo gukomeza kwita ku bafite ubwandu bw’agakoko gatera SIDA by’umwihariko muri ibi bihe Umujyi wa Kigali uri muri gahunda ya Guma mu Rugo.

Ati “Turi gukorana bya hafi n’abantu bafite virus itera SIDA kugira ngo tubafashe babashe gufata imiti yabo cyane ko byagaragaye ko bagirwaho cyane n’ingaruka za Coronavirus.”

Akomeza ati “Iyo indwara ibafashe igafatirana n’ubudahangarwa buba bwaragiye hasi kubera virus itera SIDA ariko kuko baba bafata imiti baba bakeneye inyunganizi z’ibiribwa kugira ngo babashe gufata imiti neza.”

Umunyamabanga Nshingwabikorwa w’Urugaga rw’abafite Virusi itera SIDA, Semafara Sage, yavuze ko iyi gahunda yakozwe mu rwego rwo gushyigikira gahunda ya leta yo gufasha abagizweho n’ingaruka za Coronavirus bakaza gutakaza akazi.

Ati “Iki gikorwa twagikoze by’umwihariko mu Mujyi wa Kigali kuko hari abantu benshi babeshwaho n’akazi ari uko bakoze. Niyo mpamvu twahisemo guhita dutera intambwe muri gahunda ya Leta yacu irimo gukora yo gutanga ibiribwa mu baturage.”

Akomeza ati “Natwe twabikoze kugira ngo tugire aho twunganira abafite virus itera SIDA,kandi bakaba baranduye na Coronavirus n’imiryango idafite akazi muri iki gihe.”

Usibye kuba RRP+ yahaye inkunga abaturage bo mu Murenge wa Kimisagara, ifite gahunda yo kuzayitanga no ku bandi bangana 3000 bo mu Mujyi wa Kigali.

Ikigo Nderabuzima cya CORONUM giherereye mu Murenge wa Kimisagara
Iyi nkunga yageze ku bantu 119 bo mu Murenge wa Kimisagara
Usibye kuba hatanzwe ibiribwa, hanatanzwe n'udupfukamunwa tuzafasha abaturage kwirinda COVID-19
Abahawe inkunga bishimiye inkunga bahawe kuko ubuzima bwari bugoye kubera ingaruka za Coronavirus
Ibiribwa bitandukanye birimo umuceri n'ifu ni bimwe mu byatanzwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .