Abavoka basabye Perezida Kagame ko leta yajya ikoresha abanyamategeko b’Abanyarwanda mbere y’abanyamahanga

Yanditswe na Rabbi Malo Umucunguzi
Kuya 12 Nzeri 2017 saa 10:33
Yasuwe :
0 0

Umuyobozi w’Urugaga rw’Abavoka mu Rwanda, Me Julien Kavaruganda, yavuze ko abanyamategeko b’Abanyarwanda bamaze kugira ubumenyi buhagije butuma bafasha Abanyarwanda kubona ubutabera bunoze ku buryo bakwiriye kugirirwa icyizere cyose gishoboka.

Yabigarutseho kuri uyu wa Mbere ubwo Perezida Paul Kagame yatangizaga umwaka w’ubucamanza wa 2017/2018, umunsi wabereye mu ngoro y’Inteko Ishinga Amategeko ku Kimihurura.

Urugaga rw’Abavoka mu Rwanda rwatangiye mu 1997 rugizwe n’abavoka 37, ubu bakaba bamaze kuba 1200 bari mu ntara n’uturere twose tw’u Rwanda.

Me Kavaruganda yakomoje kuri gahunda ya ‘Made in Rwanda’, aho leta yiyemeje gushyira imbere ikoreshwa ry’ibintu bitandukanye bikorerwa mu Rwanda kurusha ibiva ahandi ndetse bikaba byaramaze guhabwa umwihariko mu masoko ya leta.

Yagize ati “Twavuga ko gahunda ya ‘Made in Rwanda’ ari gahunda nziza kandi tukaba twifuza ko n’abavoka mu Rwanda bagirirwa icyizere muri serivisi batanga no mu bumenyi bafite mu mategeko. Ni muri urwo rwego dusaba ko inzego za leta n’abikorera bajya bagisha inama abavoka babo mu Rwanda mbere yo kwitabaza abo hanze.”

Me Kavaruganda yavuze ko Urugaga rw’abavoka, buri kwezi rutegura amahugurwa ahuza abavoka ngo bungurane ibitekerezo ku mategeko kandi banoze imyitwarire yabo.

Yavuze ko urugaga rwabo rwanatangiye kwakira abavoka bo mu karere bifuza gukorera umwuga wabo mu Rwanda, ariko agaragaza ko ibindi bihugu byo mu Muryango wa Afurika y’Iburasirazuba bigishyiramo amananiza ku banyarwanda bashaka gukorera mu karere.

Yakomeje agira ati “Nyakubahwa Perezida wa Repubulika, muhuye n’abandi bayobozi mu karere mwadukorera ubuvugizi kugira ngo n’abavoka b’Abanyarwanda bajye bemererwa gukorera muri ibyo bihugu.”

Mu bikorwa by’abavoka mu mwaka ushize, Me Kavaruganda yavuze ko mu gufasha abatishoboye mu by’amategeko, urugaga rwafashije abarenga 2893, bashyize mu mibare, ubufasha bwatanzwe n‘urugaga bukaba bufite agaciro ka miliyari imwe na miliyoni 486 Frw.

Hari ibindi byasabwe Umukuru w’igihugu

Muri uyu muhango wo gutangiza umwaka w’ubucamanza, Ubushinjacyaha na bwo bwagaragaje ko hari byinshi bwakoze, ariko hari bimwe bikigorana kandi bifasha mu gukurikirana ibyaha.

Umushunjacyaha Mukuru, Jean Bosco Mutangana yagarutse ku kibazo cya laboratwari ifasha mu gupima ibimenyetso by’abahanga, ahanini byifashishwa mu gukurikirana ibyaha birebana n’ihohoterwa rishingiye ku gitsina.

Yagize ati “Mu rwego rwo gushaka ibimenyetso by’abahanga muri ibi byaha, dufitanye umubano na Kaminuza ya Hamburg mu Budage, aho mu mwaka ushize twoherejeyo ibyo twifuza ko badupimira bigera kuri 93 ngo badupimire ibizamini bya DNA, byifashishwa cyane mu byaha by’ihohoterwa rishingiye ku gitsina.”

“Ariko Nyakubahwa Perezida wa Repubulika dusanga hakwiye gushyirwa imbaraga mu kuranagiza laboratwari y’u Rwanda, kugira ngo ibimenyetso bikomeye muri izi manza byihutishwe ndetse bigabanye n’igiciro bitwara ndetse binagabanye n’umwanya bifata bijya mu Budage binagaruka.”

Ibi bikorwa remezo byitezwe ko bizatwara miliyari 7 Frw byagombaga kuba byuzuye bitarenze 2015, ariko uyu mushinga nubu uracyategerejwe ngo utange umusanzu mu gukurikirana ibyaha bisaba ibimenyetso by’abahanga.

Mutangana yavuze ko mu gukurikirana ibyaha by’ihohotera rishingiye ku gitsina, mu mwaka w’ubucamanza ushize, Ubushinjacyaha bwakiriye amadosiye 3130, hafatirwa umwanzuro amadosiye 3086. Mu madosiye y’ibyo byaha yaburanishijwe, hasomwe amadosiye 1772, muri yo Ubushinjacyaha butsinda amadosiye 1488, ni ukuvuga ari ku kigero cya 84%.

Me Julien Kavaruganda mu muhango wo gutangiza umwaka w'ubucamanza
Umushinjacyaha Mukuru wa Repubulika, Mutangana Jean Bosco
Perezida Kagame ni we watangije ku mugaragaro umwaka w'ubucamanza wa 2017/2018
Perezida kagame mu ifoto y'urwibutso n'abayobozi b'inzego zitandukanye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza