Abatuye mu bice by’icyaro bya Kigali barasaba kwemererwa kubakisha rukarakara

Yanditswe na Emma-Marie Umurerwa
Kuya 29 Gicurasi 2019 saa 02:04
Yasuwe :
0 0

Kubakisha ‘broque-ciment’ bisabwa abatuye Umujyi wa Kigali, ni ihurizo ku bafite amikoro aciriritse bakomeje gutakambira ubuyobozi basaba ko bakwemererwa no kubakisha amatafari ya rukarakara.

Nyinshi mu nyubako zubatswe mbere y’umwaka wa 2007 mu Mujyi wa Kigali zubakishije amatafari ya rukarakara, hari naho usanga izubatswe mu myaka ya 1970 na nyuma yahoo gato zigihagaze bwuma. Ibi bigatuma abaturage basaba ko bakomorerwa bakongera kubakisha rukarakara.

Ubwo hatangizwaga icyumweru cy’umujyanama mu Mujyi wa Kigali cyatangirijwe mu Murenge wa Masaka mu Karere ka Kicukiro, mu cyumweru gishize, ikibazo cy’abaturage bashaka kubakisha rukarakara cyagarutsweho.

Uwitwa Bizumuremyi Simeon yagize ati “Inkarakara nazo zazanywe n’abazungu ntabwo ari abanyarwanda bazihimbye, twifuza ko nazo mwazigaho mukabiha umurongo, ariko ibyiza by’Umujyi wa Kigali ntibize ngo bitwirukane tubise abafite amikoro.”

Nsanzimana Alphonse wo mu Murenge Ndera mu Karere ka Gasabo, yabwiye IGIHE ko afite inzu yubakishije rukarakara mu 1980 kandi ko igikomeye, akibaza impamvu yangiwe kongera kubaka indi nzu y’ubu bwoko ahubwo agasabwa kubakisha “broque-ciment” kandi isaba amikoro adafite.

Ati “Nibaza impamvu batubuza kubakisha rukarakara kandi ikomera ndetse igasaba ibikoresho buri wese yabona hafi ye. Inzu nubatse mu 1980 irakomeye kurusha izo bamwe bubakisha “broque ciment” ubu. Bareke abafite ubushobozi bucye twubakishe rukarakara ahubwo batwigishe uko twazibumba ku buryo bugezweho.”

Umuyobozi w’Umujyi wa Kigali, Rwakazina Marie Chantal, yabwiye aba baturage ko ivugurura ry’igishushanyo mbonera cy’Umujyi wa Kigali, rigamije kugira ngo umujyi ukomeze uturwe n’abafite ubushobozi butandukanye. Gusa yirinze kwerurira abaturage ko bemerewe kubakisha rukarakara.

Ati “Dushobora kuvuga ngo ntitumwimure, ariko habeho imiturire y’igihe gito bigufasha kwisuganya, gusaba umwenda cyangwa kubiganira mu muryango kugira ngo iyo nyubako ijyanye n’igishushanyo mbonera izaboneke mu gihe runaka twaba twumvikanye.”

Minisiteri y’Ibikorwa remezo, ivuga ko icyemezo cyo guca rukarakara cyafashwe ku neza y’abaturage hagamijwe guca kubaka mu kajagari rimwe na rimwe inzu zubatswe zikaba zahitana ubuzima bw’abaturage.

Mu Ukwakira 2018 mu mwiherero w’abayobozi mu nzego zifite aho zihuriye n’ubwubatsi mu Rwanda basabye ko hakorwa ubushakashatsi ku bikoresho by’ubwubatsi bikorerwa mu Rwanda cyane cyane ibyakoreshwaga mu buryo gakondo kugira ngo ibishobora kongererwa agaciro bikorwe hagamijwe kugabanya igiciro cy’inzu ziciriritse.

Byaje nyuma yo kubona ko kubaka mu mijyi bihenze cyane ku buryo hatagize igikorwa, intego yo kubona inzu zo guturamo kandi zihendutse itazagerwaho.

Icyegeranyo International Construction Market Survey 2017 cyagaragaje ko muri Afurika y’Iburasirazuba, Umujyi wa Kigali uza mu ihenze kuyubakamo kuko nibura kubaka metero kare imwe bisaba Amadolari ya Amerika 1,117.12 (asaga ibihumbi 900 Frw).

Abaturage bafite amikoro aciriritse mu Mujyi wa Kigali barasaba kwemererwa kubakisha rukarakara
Umuyobozi w'Umujyi wa Kigali, Rwakazina Marie Chantal ntiyeruye ngo yemerere abaturage kubakisha rukarakara

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza