Kwamamaza

Abasora baciriritse baracyabangamiwe no kutamenya ibyiciro RRA yabashyizemo

Yanditswe kuya 6-10-2016 saa 20:11' na Niyonsenga Schadrack


Abasora baciriritse mu Rwanda basabye Ikigo cy’Igihugu cy’Imisoro n’Amahoro(RRA) kujya kibaha amakuru ajyanye n’ibyiciro bashyizwemo kugira ngo babikorere ubugororangingo.

Ibi babitangarije mu nama yahuje abasora bari bahagarariye ibigo by’ubucuruzi na Kompanyi z’abikorera na RRA kuri uyu wa Kane, tariki ya 6 Ukwakira 2016 yiga ku buryo serivisi zo kwaka umusoro no kuwutanga zarushaho kunozwa.

Ikigo cy’Igihugu cy’Imisoro n’Amahoro cyatangaje ko hari inzego zitandukanye cyabashyizemo bitewe n’uko bitabira imisoro. Abasora ndetse n’Urugaga rw’abikorera basabye iki kigo kujya kibamenyesha izo nzego cyabashyizemo kugira ngo babashe kwikosora cyangwa kwisobanura niba hari aho babeshyewe.

Umuyobozi Mukuru Wungirije mu Rugaga rw’Abikorera mu Rwanda, Mukarwema Yvette yavuze ko kuba RRA yaba ifite amakuru y’uburyo abasora bahagaze mu kwitabira gutanga imisoro ariko ntiyabagezeho bishobora kuba intandaro yo kutumvikana hagati y’impande zombi.

Yagize ati “Kuba hari amakuru bagufiteho wowe utazi nibwo cya gihe ujya kubona ukabona bakoherereje inyemezabwishyu kandi wari uzi ko nta deni ubarimo, ukabona bohereje ibaruwa ikubwira ko hari amafaranga runaka ugomba kwishyura kandi wowe wari uzi ko biri ku murongo.”

RRA itangaza ko kuba abasora bamaze kumenyera kwitabira inama bagirana n’iki kigo ku bwitabire bwo hejuru ari ikimenyetso ko abanyarwanda bamaze gusobanukirwa impamvu basora.

Ibyiciro RRA yashyizemo ibigo na Kompanyi zisoreshwa birimo icy’abasora neza bibwirije, icy’abari hagati babanza kwibutswa no kwishyuzwa n’icy’abadasora banyereza umutungo wa Leta.

Abasora bavuga ko kutamenya ibyiciro baherereyemo bishobora kubateza akaga kuko byatuma bisanga bari kwishyuzwa amadeni y’imisoro batigeze bamenya bitewe n’uko RRA ibafiteho amakuru atari yo ntibababwire ngo bisobanure cyangwa bigaterwa n’uko bashobora kwibagirwa.

Komiseri Mukuru wa RRA, Richard Tusabe yavuze ko izi mbogamizi abikorera bagaragaza zifite ishingiro anatangaza ko iki kibazo cyabo kigiye gukosorwa vuba bidatinze.

Yagize ati “Ni icyifuzo cyiza cyane, kuvuga ngo ndi mu cyiciro cy’abadasora ariko wenda amakuru wakoresheje ashobora kuba atanoze, bakavuga bati ’ese wampa umwanya nkakwereka ishusho yayo makuru?’ Twebwe rero tubifashe nk’inama nziza igiye kutwubaka, tugiye gushaka ukuntu dukoresha ikoranabuhanga tubagaragarize ibyiciro barimo n’impamvu ndetse aho baba bakemanga tukahakosora.”

Komiseri Mukuru wa RRA yatangaje ko abasora banini n’abaciriritse bafite uruhare rugera kuri 80% by’umusoro wa buri mwaka iki kigo cyinjiza.

Kugira ngo umusoreshwa ajye mu cyiciro cy’abasoreshwa banini agomba kuba afite igicuruzo kiri hejuru ya miliyari imwe, abaciriritse baba bafite igicuruzo kiri hagati ya miliyoni 400 na miliyari imwe mu gihe abasigaye bose bafatwa nk’abasoreshwa bato.

Umuyobozi Mukuru wungirie w’Urugaga rw’Abikorera mu Rwanda, Mukarwema Yvette yasabye RRA guha abasora baciriritse amakuru y'ibyiciro babarizwamo
Komiseri Mukuru wa RRA, Tusabe Richard avuga ko ibibazo byagaragajwe bigiye gushakirwa umuti
Ikigo cy'Igihugu cy'Imisoro n'Amahoro cyishimiye ubwitabire bw'abasora baciriritse mu kwiyubakira igihugu

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 8 Ukuboza 2016
Copyright © 2009 -2014 - IGIHE Ltd - All Rights Reserved