Abashoferi b’amakamyo bibukijwe ko badafite uburenganzira busumba ubw’abandi bakoresha umuhanda

Yanditswe na Hakizimana Jean Paul, Mukwaya Olivier
Kuya 22 Gicurasi 2019 saa 03:44
Yasuwe :
0 0

Polisi y’u Rwanda ikomeje ubukangurambaga bwa Gerayo Amahoro hirya no hino mu mihanda no ku mipaka ihuza u Rwanda n’ibihugu by’abaturanyi, hagamijwe gukangurira abakoresha umuhanda kurushaho kwirinda impanuka.

Iburasirazuba iyi gahunda yabereye ku mupaka wa Rusumo uhuza u Rwanda na Tanzania ndetse akaba ari nawo mupaka unyurwaho n’amakamyo manini menshi, aho nibura ku munsi haca ari hagati ya 170 na 200.

Umuyobozi wa Polisi mu Ntara y’Iburasirazuba ACP Emmanuel Hatari yavuze ko bajyaga bakora ubukangurambaga bumara icyumeru kimwe cyangwa ukwezi bukagabanya impanuka ku kigero cyo hejuru, bahitamo kubikora umwaka wose.

Yakomeje asaba abashoferi kutirara mu muhanda mu gihe batwaye amakamyo.

Ati “Murabizi mugenda urugendo rurerure kuva Dar es Salam, Mombasa n’ahandi, rero turagira ngo tubibutse kujya mugendera ku muvuduko uringaniye, rimwe na rimwe hari igihe iyo muri mu muhanda mutita ku bandi bantu ariko turabibutsa ko umuhanda buri muntu wese uwugendamo afite uburenganzira bungana n’ubw’undi, nta muntu ufite uburenganzira bwo kurenza umuvuduko no gutsikamira abandi.”

Yakomeje asaba abatwara amakamyo kutanywa ibisindisha mu gihe batwaye imodoka.

Ati “Iyo wanyoye ibisindisha ugatwara imodoka uba ushyira mu byago wowe ubwawe ndetse n’abandi bantu bari gukoresha uwo muhanda, mwirinde kandi gutwara imodoka mu gihe munaniwe mujye mubanza muruhuke neza mubone gukomeza urugendo. Ibi nimubyubahiriza muzagera iyo mujya amahoro.”

Uwihaye François atwara amakamyo mu bihugu by’u Rwanda, Tanzania, Uganda na Sudani yavuze ko iyi gahunda nabo ubwabo ibahwitura.

Ati “Iyi gahunda ni nziza cyane hari igihe abashoferi dutwara tukagera inaha twananiwe ku buryo tutagize umuntu udukangurira ibintu by’umutekano wo mu muhanda wasanga twiraye impanuka zikaba nyinshi, turashimira polisi kubwo kutwibutsa kuko uko babitubwira cyane ni nako impanuka zigenda zigabanuka.”

Uretse i Burasirazuba, mu Burengerazuba mu Karere ka Rubavu naho habaye igikorwa nk’iki, aho umuyobozi wa Polisi muri iyo Ntara, CP Rutikanga Rogers yeretse abashoferi batwara amakamyo yambukiranya umupaka amwe mu makosa bakunda kugaragaraho, abasaba ko bayirinda.

Ati “Iyo urebye imihanda yacu irimo amakorosi menshi, harimo ahazamuka n’ahamanuka, harimo rero ugira uburangare ntamenye ko agiye kwinjira mu ikorosi yakata ikamyo ikamubirindukana, hari abavugira kuri terefoni, hari abasinzira kuko baba bakoze urugendo rurerure ibyo byose ni byo tubasaba kudufasha mukabyirinda.”

Yavuze ko ubukangurambaga nk’ubu bwagabanyije impanuka z’amakamyo yagongaga ibitaro bya Gisenyi agerageza kwinjira mu Mujyi wa Rubavu, kubera imiterere y’aho biherereye.

Uwayo Adrien utwara ikamyo zica ku mupaka munini zigiye muri RDC, yashimiye gahunda ya polisi kubegera yizeza kubahiriza amabwiriza

Gerayo Amahoro ni ubukangurambaga bwatangijwe na Polisi y’u Rwanda buzamara ibyumweru 52, bwitezweho kugabanya impanuka zikorerwa hirya no hino mu mihanda ndetse bukanasobanurira abaturage n’abatwara ibinyabiziga amategeko bakwiye gukurikiza hagamijwe kurwanya impanuka zo mu muhanda.

Abatwara amakamyo bibukijwe gukoresha neza umuhanda bakirinda kubangamira abandi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza