Abashakashatsi mu by’uburezi basabwe kwandika no kuri Jenoside yakorewe Abatutsi

Yanditswe na Evariste Nsengimana
Kuya 7 Ukwakira 2017 saa 07:36
Yasuwe :
0 0

Umuyobozi wa Kaminuza y’ubukerarugendo, ikorabuhanga n’ubucuruzi (UTB), Dr. Kabera Callixte, yasabye abashakashatsi mu by’uburezi kwandika bakanasohora inyandiko zivuga ku mateka ya Jenoside yakorewe Abatutsi muri Mata 1994.

Uyu muyobozi yagarutseho ku bushakashatsi kuri uyu wa 6 Ukwakira 2017, yari mu nama yigaga ku by’uburezi yateguwe na UTB ifatanije n’Umuryango uharanira kubaka uburezi Nyafurika ndengamipaka bushingiye ku bushakashatsi (ANIE).

Abari muri iyo nama basuye Urwibutso rwa Kigali ku Gisozi, Dr. Kabera avuga ko kurusura ari bumwe mu buryo bwo kwiga amateka y’u Rwanda kandi ko kuzana abashyitsi cyangwa abarimu n’abanyeshuri ari ukugira ngo barebe ibibi u Rwanda rwanyuzemo, bakanafata ingamba zo kubikumira.

Yakomeje asaba ko abo bashakashatsi n’abandi batari aho bakwandika kuri ayo mateka Isi ikayasobanukirwa.

Yagize ati “Iyo babonye amateka nk’aya bibabera intwaro nziza yo kwigisha ahandi bajya, ubushakashatsi bakora bakavuga uko abanyarwanda babashije kubyikuramo bakubaka Igihugu gikomeye, gifite icyizere [...] Ubutumwa naha abashakashatsi nyuma yo gusura aha, ni ubwo kuvuga ngo tubonye ibibi byabaye ku banyarwanda kandi byatewe n’abanya-Politiki babi, ni ngombwa ko ubu butumwa babunyuza mu byandikwa byabo, mu bitabo bandika, mu nkuru bandika noneho ayo makuru iyo ageze ku isi, bifasha abaturage. Ubutumwa ni uko bo bahasuye batabihamana mu mitwe yabo.”

Umuyubozi mukuru w’inama y’ubutegetsi ya ANIE, Prof. Tolly Mbwette, yavuze ko gusura urwibutso ari uburyo bwiza bwo gusobanukirwa amateka.

Yagize ati “Ndatekereza ko gusura uru rwibutso bitanga ubutumwa bufasha abitabiriye iyi nama, birabaha ubutumwa bw’amateka abafasha ko batazigera bareka hari ahandi biba […]. Ndatekereza ku bashakashatsi ko ari uburyo bwiza bwo kumenya u Rwanda.”

Aba bashakashatsi n’impuguke mu by’uburezi basaga 118 bo mu bihugu 23, basoje inama y’iminsi ibiri mu Rwanda igamije kurebera hamwe ibibazo byugarije umugabane w’Afurika mu burezi n’uko byakemuka.

Abashakashatsi batandukanye mu burezi basuye Urwibutso rwa Jenoside rwa Kigali
Umuyubozi mukuru w’inama y’ubutegetsi ya ANIE, Prof. Tolly Mbwette
Umuyobozi wa UTB, Dr. Kabera Callixte, yasabye abashakashatsi mu by'ufuburezi kwandika bakanasohora inyandiko ku mateka ya Jenoside yakorewe Abatutsi
Basuye ibice bitandukanye by'Urwibutso rwa Jenoside rwa Kigali
Aba bashakashatsi mu burezi bavuze ko gusura urwibutso byabafashije kumenya amateka y'u Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza