Kwamamaza

Abasenateri n’umugenzuzi ntibiyumvisha uburyo Minisiteri zitabazwa amakosa y’ibigo zireberera

Yanditswe kuya 21-09-2016 saa 07:53' na Ntakirutimana Deus


Abasenateri bagize Komisiyo y’Iterambere ry’Ubukungu n’Imari mu Nteko Ishinga Amategeko y’u Rwanda n’Umugenzuzi Mukuru w’Umutungo n’Imari bya Leta, bavuze ko batumva neza uburyo Minisiteri runaka igaragazwa nk’iyacunze neza umutungo wa Leta nyamara ibigo ireberera byaragaragayemo amakosa yo kuwukoresha nabi.

Minisiteri zitandukanye zirimo iy’ubuhinzi n’ubworozi, iy’uburezi ibigo bizishamikiyeho byagaragaye mu byakoresheje nabi umutungo w’igihugu binyuze mu kuwusesagura no kuwunyereza mu buryo bunyuranye.

Ubwo kuri uyu wa Mbere tariki 19 Nzeri 2016,Umugenzuzi Mukuru w’Umutungo n’Imari bya Leta, Obadiah Biraro, yaganiraga n’Abasenateri bagize Komisiyo y’Iterambere ry’Ubukungu n’Imari ku byavuye muri raporo y’umugenzuzi mukuru w’imari ya Leta ya 2014/2015, bamujije uburyo byashoboka kuba Minisiteri itagaragaraho gusesagura umutungo kandi ibigo biyishamikiyeho iyo nenge biyifite.

Amakosa y’ibigo bishamikiye kuri Minisiteri

Ikigo cy’Igihugu gishinzwe Ubuhinzi n’Ubworozi, RAB, cyagenze biguru ntege mu kugaruza amafaranga yaguzwe inyongeramusaruro yahawe abahinzi.

Icyo kigo kandi kibarwaho igihombo giterwa n’umuyoboro wo kuhira imyaka mu Karere ka Nyagatare watwaye miliyari 2.9, nyamara ubu ukaba udakora kubera ko wibweho ibikoresho bifite agaciro ka miliyoni 103.6 ariko ntibyasimbuzwa ngo ukomeze.

Ikigo cy’Igihugu gishinzwe uburezi (REB) cyananiwe gushyira mu bikorwa umushinga wa mudasobwa ku mwana (One Laptop per Child) , gucunga no kugenzura amasezerano y’iyubakwa ry’ibyumba by’amashuri.

Ibigo bishinzwe ingufu n’amazi bya REG na WASAC na byo byahombeje leta miliyari 203,3 yagiye akoreshwa mu bikorwa atagenewe.

Ikigo cy’igihugu cyita ku buzima RBC cyahombeje leta miliyari 48,3 yagendeye mu miti yagiye yangirika kubera kubikwa mu buryo butujuje ubuziranenge.

Minisiteri y’Ubutegetsi bw’Igihugu nayo yagarutsweho ku bijyanye n’ibigo, uturere, imirenge n’izindi nzego ziyishamikiyeho zagaragayeho amakosa mu micungire y’imari.

Abasenateri n’Umugenzuzi barashobewe

Senateri Bizimana Evariste ati “Minagri igira raporo ntamakemwa, ariko RAB ireberera ikagira icyo kibazo kandi hagati ya Minagri na RAB hariho inama y’ubutegetsi (Board) igirana imihigo na Minagri.”

Umugenzuzi Mukuru w’Imari n’Umutungo bya leta, Biraro Obadiah yavuze ko na we ajya yibaza ukuntu Minisiteri itagaragaraho ikibazo cyo gukoresha nabi umutungo wa Leta nyamara ikigo kiyishamikiyeho kigifite, akavuga ko ikibazo kikiri ingorabahizi ari icy’amategeko, ariko ko yakigejeje kuri ba Perezida b’imitwe yombi y’Inteko Ishinga Amategeko.

Ati “Buriya nagiye mbisegurira kuko nari nzi ko icyo kibazo gihari, nanakigejeje kuri ba Perezida bayoboye imitwe yombi mu Nteko Ishinga Amategeko, ndetse na ba Minisitiri bamwe njya mbibabaza."

Biraro asanga amategeko aramutse avuguruwe hari ibyahinduka.

Ati” Iyo ibintu bitandukanye bivuze ngo ibiri inyuma y’iki gikuta ntibindeba n’iyo nabona umuturage agongwa n’imodoka, kuko amategeko ntabwo yanyemerera kumureba [...] Igihe bitari byashyirwa mu murongo umwe ako kajijo kazahoraho.”

Biraro asanga Minisitiri ari we muyobozi ku bijyanye na politiki y’ibikorerwa muri Minisiteri n’ibigo biyishamikiyeho bityo ko yagombye kugira igitsure ashyiraho mu guharanira inozwa ry’icungwa neza ry’imari n’umutungo wa leta.

Biraro agira inama ba Minisitiri kujya basinyirwa mu maso inyandiko igaragaza inshingano mu bigo, ndetse akanabaza niba ibirimo byubahirijwe, bikagira n’aho byandikwa kuko ngo igihe icyo kigo cyahamagajwe n’abadepite ngo cyisobanure uko cyacunze umutungo, Minisitiri yakwisobanuza ya nyandiko yanditswe icyo gihe.

Senateri Muhongayire Jacqueline yavuze ko n’ubwo izo nzego zikurikiza amategeko agenga ishyira mu bikorwa ry’ingengo y’imari ya leta, buri rwego rukabazwa ibyo rushinzwe, ngo Minisiteri ireberera ikigo runaka na yo igomba gukurikiranira hafi mu rwego rw’inshingano zayo mu bya politiki.

Muhongayire yakomeje agira ati “Ibyo byose rero bizagenda binozwa, ikintu twishimira ni uko kugeza ubu igihugu gifite uburyo bwo gukurikirana imikoreshereze y’ingengo y’imari ya leta, mbere ntibyahozeho, na kera ingengo y’imari hari n’igihe itanyuraga no mu Nteko ariko iyo ntambwe ni iyo kwishimira, ariko ikosa iryo ari ryo ryose nta kwibohora, nta mpamvu bafite kuko u Rwanda umutungo dufite turawuzi, icyerekezo dushaka kujyamo turakizi.”

Abasenateri bagize iyo Komisiyo bavuze ko bigeze gukomoza kuri icyo kibazo ariko ntibagifatire umwanzuro, nubwo ngo bashobora kuzakigeza ku Nteko rusange ihuza abasenateri bose.

Raporo y’Umugenzuzi Mukuru w’Umutungo n’Imari ya Leta y’umwaka 2014/2015 igaragaza ko inzego 157 zagenzuwe ugereranyije na 131 zagenzuwe mu mwaka wari wabanje. Izigera kuri 50 ni zo zifite raporo idafite amakemwa, ni ukuvuga ko ziyongereye ku kigero cya 36% ugereranyije n’umwaka ushize.

Iyo raporo kandi yerekana ko amafaranga asaga miliyari 12.7 yakoreshwejwe ariko hakabura inyandiko zibyemeza, asaga miliyari 1.7 yo yasesaguwe naho asaga miliyari 3.8 afite inyandiko zigaragaza uko yakoreshejwe ariko zituzuye.

Senateri Muhongayire (ibumoso) na Biraro bavuga ko bitumvikana ukuntu Minisiteri itagaragaraho amakosa kandi ibigo byayo biyafite

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 26 Ukwakira 2016
Copyright © 2009 -2014 - IGIHE Ltd - All Rights Reserved