Kwamamaza

Abasenateri bemeje ishingiro ry’umushinga w’itegeko rikura ubugenzacyaha muri Polisi

Yanditswe kuya 2-11-2016 saa 07:35' na Hagengimana Philbert


Abagize Inteko Ishinga Amategeko, Umutwe wa Sena bemeje ishingiro ry’umushinga w’Itegeko rigena ububasha, inshingano, imitunganyirize n’imikorere bya Polisi y’u Rwanda, ari na wo ukura Ubugenzacyaha n’Iperereza mu bubasha bwa Polisi y’Igihugu bikegurirwa Ikigo cy’Igihugu gishinzwe Iperereza (RIB).

Iryo tegeko ryari ryaratowe n’Inteko Ishinga Amategeko, ariko Perezida wa Repubulika asaba ko risubirwamo rigakorerwa ubugororangingo kugira ngo rihuzwe n’Itegeko Nshinga rya Repubulika y’u Rwanda ryo mu 2003 nk’uko ryavuguruwe mu 2015.

Uretse iyo mpamvu ariko, Umunyamabanga wa Leta muri Minisiteri y’Ubutabera Ushinzwe ibyerekeye Itegeko Nshinga n’andi mategeko, Uwizeyimana Evode yasobanuriye abasenateri ko hari na zimwe mu nshingano zigomba gukurwa mu bubasha bwa Polisi y’u Rwanda.

Ati “CID (Urwego rw’ubugenzacyaha) izavanwaho mu mushinga dufite, igasimburwa na RIB (Rwanda Investigation Bureau), iyo ikazaba ikorera muri Minisiteri y’Ubutabera.”

Uwizeyimana akomeza asobanura ko n’ubwo izo nshingano zava mu bubasha bwa Polisi, bitazayambura izindi zirimo no kurinda ibimenyetso by’ahabereye icyaha, dore ko umupolisi uzajya uhagera mbere azajya akora inyandiko mvugo izajya ishingirwaho na RIB mu iperereza ryayo. Muri iyo nyandiko mvugo, umupolisi anafite uburenganzira bwo kubaza abaturage bari ahabereye icyaha.

Ati “Icyo gihe umupolisi uzabikora afite amakuru atanga na we, kimwe n’uko na we abaza abaturage bari hafi aho, ati ‘ibintu byabereye aha ko mwabibonye byagenze bite?’ Iyo nyandiko mvugo yanaherwaho na RIB, ndetse yanabona ibimenyetso bituzuye igashakiraho ibindi, ariko byagera mu kuvuga ngo iyi ni dosiye ikwiye gushyikirizwa ubugenzacyaha ikazajya mu rukiko, ibyo ni akazi ka RIB.”

Mu rwego rwo gusesengura aya mategeko neza, Umunyamabanga wa Leta Muri Ministeri y’Ubutabera yasabye Abasenateri ko uwo mushinga w’Itegeko wemerejwe ishingiro, wazasuzumirwa hamwe n’uw’itegeko rishyiraho RIB wenda gushyikirizwa Inteko Ishinga Amategeko.

Kuwa 4 Ukwakira uyu mwaka, ni bwo Perezida wa Repubulika Paul Kagame yavuguruye Guverinoma, aho mu mpinduka yakoze harimo no kwimurira Minisiteri y’Umutekano muri Minisiteri y’Ubutabera.

Abasenateri biga ku mushinga w'itegeko rishya rigena ububasha, inshingano, imitunganyirize n’imikorere bya Polisi y’u Rwanda

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 3 Ukuboza 2016
Copyright © 2009 -2014 - IGIHE Ltd - All Rights Reserved