Abasenateri basabye ko ubwiyongere bw’abaturage bufatwa nk’ikibazo gikomereye u Rwanda

Yanditswe na Evariste Nsengimana
Kuya 21 Gashyantare 2018 saa 03:20
Yasuwe :
0 0

Abasenateri bagize Komisiyo y’Imibereho Myiza, Uburenganzira bwa Muntu n’Ibibazo by’Abaturage, basabye ko leta ifata ubwiyongere bw’abaturage nk’ikibazo gikomeye, ikanakaza ingamba zo kubukumira no kongera ingamba zo kongerera ubushobozi umunyarwanda.

Imibare itangazwa n’Ikigo cy’Igihugu cy’Ibarurishamibare, NISR, igaragaza ko ubu, u Rwanda rutuwe n’abaturage bagera kuri 12,089,721.

Kuri uyu wa 21 Gashyantare 2018, ubwo iyi Komisiyo yagiranaga inama na NISR, Umuyobozi wayo, Yusuf Murangwa yayitangarije ko ibipimo bigaragaza ko leta nikomeza gushyiraho uburyo buhamye bwo kuboneza urubyaro, abaturage bazikuba inshuro ebyiri mu 2050, mu gihe zitashyirwaho bakwikuba inshuro eshatu.

Ati “Nubwo byakorwa mu 2050, abaturage b’u Rwanda bazikuba kabiri. Ni ukuvuga ngo tutabikoze bakwikuba gatatu[..] ariko wenda kwikuba kabiri si cyo kibazo. Bikubye kabiri ariko bagatanga umusaruro, bafite ubuzima bwiza, batanga umusaruro nta kibazo cyaba gihari. Ariko bikubye kabiri cyangwa gatatu, nta bushobozi byaba ikibazo.”

Murangwa yakomeje avuga ko hakenewe ingamba zihamye zituma umunyarwanda kuri ubu winjiza umusaruro usaga amadolari 736 ku mwaka, azaba yinjiza nibura ibihumbi 12555 n’ubukungu bw’igihugu bwiyongera ku 10%. Muri izo ngamba yavuzemo ibijyanye no kwigisha abanyarwanda, gutanga serivisi inoze n’izindi zigamije kwihutisha ubukungu n’iterambere by’igihugu n’ibindi.

Nyuma yo gusobanurirwa uko ubwiyongere bw’abaturage buzaba buhagaze mu 2050, Senateri Mukankusi Peline, yavuze ko ubwiyongere bw’abaturage ari ikibazo, asaba ko hashyirwaho itegeko abana umuturage asabwa kubyara bagabanywa bakagera kuri 2,3.

Ati “Nibajije imvugo twakoresha kugira ngo ubu buryo twavuze bushoboke. Nitutagendera kuri 2,3 by’abana bavuka ku mugore umwe w’umunyarwandakazi, mu 2050 abaturage bashobora kwikuba n’inshuro zirenga eshatu. Bishobotse, byagombye kuba itegeko, nibura tukakageraho.”

Senateri Mukankusi yakomeje avuga ko abantu bakwiye gufata iki kibazo nk’igiteye ubwoba, atanga urugero ku bana basigaye babyara bataragera ku myaka 18, abanyarwanda benshi bari mu cyiciro cya mbere cy’ubudehe, abasigaye bafatirwa babuze ubushobozi bwo kwishyura ibitaro n’ibindi, avuga ko bigaragaza ubushobozi buke bwabo.

Imibare y’Ikigo cy’Ibarurishamibare ya 2014/15, yagaragaje ko 7% by’abana b’abakobwa mu Rwanda babyaye bataragera ku myaka 18 mu gihe mu 2010 bari kuri 6%. Mu 2016 kandi, Minisiteri y’Uburinganire n’Iterambere ry’Umuryango, yatangaje ko abana barenga ibihumbi 17 bari hagati y’imyaka 16 na 19 barenga 17000 batewe inda zitateguwe.

Senateri Ntawukuriryayo Jean Damascène yavuze ko kuboneza urubyaro hifashishijwe uburyo bwa kamere budatanga igisubizo gihamye ku kuganya ubwiyongere bw’abaturage.

Ati “Ntabwo uburyo bwa kamere butanga igisubizo[..] ese turacunga abaturage b’u Rwanda gute kugira ngo tubabyaze umusaruro ejo n’ejobundi, bazabe inkingi y’umusaruro ariko bareke kuba ababera umuzigo leta?”

Mu nama zatanzwe kugira ngo iki kibazo gikumirwe, hagarutswe ku gushishikariza abanyarwanda kuboneza urubyaro no kunoza serivisi bahabwa.

Usibye uburyo bwa kamere, kuboneza urubyaro bishobora gukorwa hifashishijwe agakingirizo, kwifungisha by’igihe kigufi cyangwa kirekire ku mugore, kwifungisha ku mugabo, ibinini, urushinge n’udupira. Mu buryo bwa kamere harimo kubara amatariki y’uburumbuke bw’umugore, konsa igihe kirekire n’urunigi.

Mu bijyanye na serivisi zo kuboneza urubyaro, abanyarwandakazi 72% bari hagati y’imyaka 15 na 45 nibo babisaba, 19% ntibabikorerwa, 74% barabikorerwa bakanabyishimira na ho 66%, bishimira uburyo butari ubwa gakondo.

Raporo ya gatanu y’Ikigo cy’Igihugu cy’Ibarurishamibare ku miturire n’ubuzima (RDHS 5) iragaragaza ko ingamba Guverinoma yafashe zo kuboneza urubyaro zagabanyije cyane uburumbuke bw’abagore mu Rwanda.

Muri iyo raporo ikorwa buri myaka itanu, ubushakashatsi bwakorewe ku bagore 13,497, igaragaza ko mu mwaka wa 2005 umugore umwe mu Rwanda yari afite ubushobozi bwo kubyara abana 6.1, mu gihe mu mwaka wa 2014/2015 afite abana 4,2.

Iyi raporo yerekana ko mu 2005 abashakanye bakoreshaga bumwe mu buryo bwo kuboneza urubyaro bugezweho bari 10% n’aho mu 2015 bakaba ari 48%. Ni mu gihe abakoresheje bumwe mu buryo kamere bari 7% mu mwaka wa 2005, ubu bakaba ari 6%.

Senateri Ntawukuriryayo Jean Damascène yavuze ko kuboneza urubyaro hifashishijwe uburyo bwa kamere budatanga igisubizo gihamye ku kuganya ubwiyongere bw’abaturage
Senateri Mukankusi Peline, yavuze ko ubwiyongere bw’abaturage ari ikibazo, asaba ko hashyirwaho itegeko abana umuturage asabwa kubyara bagabanywa bakagera kuri 2,3
Umuyobozi w'Ikigo cy'Igihugu cy'Ibarurishamibare, Yusuf Murangwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza