Kwamamaza

Abasenateri bagaragaje uburyo u Rwanda rutatera imbere hatitawe ku bushakashatsi

Yanditswe kuya 11-10-2016 saa 19:36' na Ntakirutimana Deus


Imishinga itandukanye irimo kubyaza mazutu ibimera, gukora ubuhinzi bwa kijyambere rimwe na rimwe ntibitanga umusaruro, mu gihe hari abagaragaza ko umuti urambye kuri iki kibazo ushobora kuva mu bumenyi n’ikoranabuhanga bya muntu, ariko usanga bikibura ubushakashatsi bukwiye.

Ikibazo cy’ubushakashatsi n’akamaro bwagira mu iterambere ry’ubukungu bw’igihugu n’imibereho myiza ya muntu cyagarutsweho ubwo abayobozi ba Komisiyo y’Igihugu ishinzwe Ubumenyi n’Ikoranabuhanga (National Commission of Science and Technology- NCST) baganiraga n’Abasenateri bagize Komisiyo y’Imibereho Myiza y’Abaturage, Uburenganzira bwa Muntu n’Ibibazo by’Abaturage.

Iyi Komisiyo yatangiye guhagurukira ibyo bibazo ku buryo hakorwa ubushakashatsi ku bibazo by’ibanze bihari ngo bikemuke.

Mu bibazo byagaragajwe birimo umubare munini w’abanyeshuri boherezwa hanze y’u Rwanda kujya kwiga, ubushakashatsi bukaba bugomba kureba ibyo bagiye kwiga n’akamaro bizagirira igihugu, ndetse niba binakenewe.

Senateri Ntawukuriryayo Jean Damascène yavuze ko ibyo na byo bigomba kugendera kuri bwa bushakashatsi bigakoranwa ubushishozi, kuko hari abanyeshuri 400 bigeze kujya kwiga mu gihugu cyo muri Aziya, bajya kubasura bagasanga bigira mu mashuri adashamaje.

Yagize ati “ Ntabwo dushobora kuzatera imbere tudashyize imbaraga mu bushakashatsi.”

Ntawukuriryayo kandi asanga abanyeshuri barangiza amashuri y’Ubumenyi n’Ikoranabuhanga bagombye kujya bahabwa ingingo runaka bakazikoraho ubushakashatsi mbere yo kurangiza kaminuza.

Yavuze ko mu gihe ubushakashatsi butari bwashyirwa imbere, igihugu kizagira abize amashuri menshi, ndetse benshi ariko bafite byinshi babuze, ku buryo batateza igihugu imbere.

Senateri Nkusi Laurent yavuze ko mu bikwiye kwitabwaho atari ireme ry’uburezi gusa, ahubwo n’iry’ubushakashatsi na ryo ari ngombwa.

Yakomoje ku mushinga wo gukora amavuta y’imodoka mu bimera utaragezweho, byose bisanishwa n’ubushakashatsi.

Senateri Mukankusi Peline yagaragaje amakosa ajya akorwa nayo ashobora kugira ingaruka ku gihugu, abaza uko icyo kibazo gikurikiranwa.

Yabajije icyo NCST iteganya gukora ku kibazo cy’abantu badakomeza amasomo amwe, urugero nk’uwize Ibinyabuzima n’Ubutabire(Bio-Chimie) mu cyiciro cya kabiri cya Kaminuza(Bachelors), yajya mu cya gatatu(Masters) ugasanga akomeje mu mategeko.

Mukankusi yavuze ko usanga ibyo akora abishingira kuri bwa bumenyi yavanye muri kaminuza ariko adafite ubundi bw’ibanze nkenerwa.

Umuyobozi Mukuru wa NCST, Dr. Ignace Gatare yavuze ko guteza imbere ubushakashatsi ari urugendo rurerure, ariko hari aho u Rwanda rumaze kugera ku ntera ishimishije.

Ati “ Iyo urebye neza guteza imbere ubushakashatsi ni urugendo rurerure. Mu Rwanda iryo reme riracyiyubaka, ibigo by’amashuri makuru biragenda bizamuka n’abikorera baragenda bashora imari mu bushakashatsi ndetse n’ibigo bya leta biri mu cyerekezo cyerekana ko hari ubushake n’imbaraga biri gushyirwamo.”

Dr Gatare yavuze ko hakenewe gushora amafaranga ahagije mu bushakashatsi, gusa ngo nubwo inzira ikiri ndende hari ingamba zifatika zashyizweho.

Ahereye ku ishyirwaho ry’iyi Komisiyo ndetse n’ibindi bikorwa yavuze ko byerekana ko iyi gahunda ishyigikiwe kandi ishyizwemo imbaraga.

Ubwiyongere bw’abantu bafite ubumenyi bwifuzwa mu by’ikoranabuhanga butuma bagira uruhare mu gukemura imbogamizi zikigaragara mu iterambere ry’igihugu.

U Rwanda rukaba rwaratangiye gutegura ibijyanye no gushinga ikigega kizashyigikira ubushakashatsi no guhanga udushya, hazabaho Inama Nkuru y’Ubumenyi n’Ikoranabuhanga no guhanga udushya izajya igenzura ibikorwa bya komisiyo, NCST nyuma igatanga imirongo ngenderwaho y’ukuntu byahuzwa n’izindi ngamba za guverinoma.

Senateri Ntawukuriryayo Jean Damascène yavuze ko ubushakashatsi bugomba gukoranwa ubushishozi
Senateri Ntawukuriryayo Jean Damascène(iburyo) na mugenzi we Nkusi Laurent
Umuyobozi Mukuru wa NCST, Dr. Ignace Gatare (iburyo) n'Umuyobozi Mukuru ushinzwe Gusesengura Ibikenewe mu Bumenyi n’Ubumenyingiro muri Siyansi n’Ikoranabuhanga, Kalisa Felly
Senateri Mukankusi Peline yagaragaje ko amakosa akorwa mu bushakashatsi ashobora kugira ingaruka ku gihugu

Amafoto: Mahoro Luqman


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 9 Ukuboza 2016
Copyright © 2009 -2014 - IGIHE Ltd - All Rights Reserved