Abasaga 7000 barangije muri Kaminuza y’u Rwanda bahawe impamyabumenyi (Amafoto)

Yanditswe na Ferdinand Maniraguha
Kuya 2 Ugushyingo 2018 saa 12:18
Yasuwe :
0 0

Abize amasomo ajyanye n’inderabarezi nibo benshi mu banyeshuri basaga 7000 bahawe impamyabumenyi zisoza ibyiciro bitandukanye muri Kaminuza y’u Rwanda.

Kuri uyu wa Gatanu tariki 2 Ugushyingo, Kaminuza y’u Rwanda yashyize ku isoko ry’umurimo abakozi 7050.

Ni birori byabereye kuri Stade ya Huye mu Karere ka Huye, mu rwego rwo kwizihiza imyaka 55 Kaminuza ya mbere ibayeho mu Rwanda.

Mu banyeshuri barangije, abo mu cyiciro cya gatatu cya Kaminuza ni 509, naho umwe ni we uhabwa impamyabumenyi ihanitse (PhD).

Mu cyiciro cya kabiri cya Kaminuza hasoje abanyeshuri 6540. Muri bo abagore ni 2594 mu gihe abagabo ari 4456.

Mu bahabwa impamyabumenyi, abiga ibijyanye n’uburezi nibo benshi kuko ari 1887 (26.7%), abize iby’ubukungu ni 1697 (24.1%), abize iby’ubuvuzi ni 1221 (17.3%), abize iby’ikoranabuhanga ni 1145 (16.2%), iby’ubuhinzi n’ubuvuzi bw’amatungo ni 635 (9%) naho abize iby’ubugeni n’imibanire ni 465 (6.6 %)

Mu gitondo cyo kuri uyu wa Gatanu urujya n’uruza rw’abantu n’ibinyabiziga nirwo rwigaragazaga mu muhanda uva i Kigali ujya i Huye.

Ubusanzwe kuva i Kigali ugerayo byatwaraga amasaha agera kuri atatau ariko uyu munsi byashoboraga gutwara amasaha ane.

Abacuruzi nabo bagaragazaga ko bacuruje cyane. Umwe mu bakozi bo kwa Hajj i Nyanza yabwiye IGIHE ko babonye abakiliya badasanzwe mu gitondo cyo kuri uyu wa Gatanu.

Yavuze ko inka babaze mu gitondo byageze saa tatu za mu gitondo yashize, mu gihe mu minsi isanzwe bashoboraga kuyicuruza umunsi wose.

Umuhango wo gutanga impamyabumenyi ku barangije muri Kaminuza y’u Rwanda wayobowe na Minisitiri w’Intebe, Dr Ngirente Edouard.

Yashimye ko ishyirwa mu bikorwa ry’ingamba Guverinoma y’u Rwanda yafashe ngo zikemure ibibazo bya Kaminuza rimaze gutanga umusaruro ushimishije. Atanga urugero ku buryo bushya bwo kunganira umutungo wa Kaminuza y’u Rwanda bwemejwe n’Inama y’Abaminisitiri yo ku wa 14/02/2018.

Yibukije ko umubare munini w’abanyeshuri ugiye kuza kwigira mu mujyi wa Huye ari amahirwe yo kurushaho guteza imbere uyu mujyi.

Yashishikarije abikorera kwitegura neza kwakira uyu mubare munini banoza serivisi bazaba bakeneye.

Yanashimiye abayobozi, abarimu n’abakozi ba Kaminuza y’u Rwanda kubera uruhare rwabo rugaragara mu gufasha Kaminuza kugera ku nshingano zayo, yongera no kubizeza ko Guverinoma y’u Rwanda, mu bushobozi bwayo, izakomeza kubashyigikira.

Abasaga 7000 bahawe impamyabumenyi mu byiciro bitandukanye muri Kaminuza y'u Rwanda
Abanyeshuri ba Kaminuza y'u Rwanda basoje amasomo basasga ibihumbi birindwi
Abanyeshuri n'imiryango yabo bari babukereye muri Stade ya Huye
Guverineri w'Intara y'Amajyepfo, CG Gasana Emmanuel mu bitabiriye uyu muhango
Itorero rya Kaminuza y'u Rwanda ryasusurukije abitabiriye ibirori
Minisitiri ushinzwe imirimo y'inama y'abaminisitiri, Kayisire Marie Solange nawe yitabiriye uyu muhango wabereye i Huye
Minisitiri w'Intebe yashimiye abayobozi, abarimu n’abakozi ba Kaminuza y’u Rwanda kubera uruhare rwabo mu gufasha Kaminuza kugera ku nshingano zayo
Minisitiri w'Uburezi, Dr Mutimura Eugene atanga impanuro ku basoje amasomo muri UR
Minisitiri w'Ubuzima, Dr Diane Gashumba yitabiriye uyu muhango
Abanyeshuri bahize abandi mu bahawe impamyabumenyi
Abanyeshuri bishimira ko barangije amasomo yabo muri UR
Abayobozi ba UR n'abayobozi bakuru muri Guverinoma mu karasisi i Huye
Abarimu n'abakozi ba UR binjira ahabereye ibirori muri Stade ya Huye
Hakozwe akarasisi mbere y'umuhango wo gutanga impamyabumenyi
Bamwe mu banyeshuri bahize abandi muri UR
Minisitiri w'imari n'igenamigambi, Dr Uzziel Ndagijimana
Minisitiri w'intebe Dr Edouard Ngirente mu muhango wo gutanga impamyabumenyi ku barangije muri UR
Minisitiri w'Intebe n'abayozi ba UR ubwo binjiraga ahabereye ibirori
Dr Ntabomvura Venant wanditswe bwa mbere Kaminuza Nkuru y'u Rwanda igitangira mu 1963, n'uyu munsi yari ahari

Amafoto: Niyonzima Moise


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza