Abasaga 700 barangije muri UNIK basabwe kubyaza umusaruro ubumenyi bahawe (Amafoto)

Yanditswe na Hakizimana Jean Paul
Kuya 11 Ukwakira 2018 saa 09:20
Yasuwe :
0 0

Abanyeshuri 727 basoje amasomo y’icyiciro cya kabiri muri Kaminuza ya Kibungo (UNIK) basabwe gukoresha neza ku isoko ry’umurimo ubumenyi bahawe no kubwifashisha mu guteza imbere imiryango yabo n’igihugu muri rusange.

Kuri uyu wa Kane nibwo UNIK yatanze impamyabumenyi ku nshuro ya cyenda, ku barangije amasomo barimo abagore 366 n’abagabo 361, barangije mu mashami atatu ariyo uburezi, imari n’icungamutungo n’abize ubuhinzi n’iterambere ry’icyaro.

Umuyobozi wa Kaminuza ya UNIK, Prof. Karuranga Gahima Egide yasabye abanyeshuri barangije amasomo kwigaragaza ku isoko ry’umurimo, kuko ubumenyi bahawe bubibashoboza.

Ati “Mugende mutubere intumwa nziza, muhangane n’abandi ku isoko ry’umurimo haba mu Rwanda cyangwa n’ahandi, kuko ubumenyi twabahaye bubemerera no guhangana ku isoko mpuzamahanga. Ikindi mwibuke kutubera abafatanyabikorwa beza aho muzajya hose.”

Murinzi Joseph wavuze mu izina rya bagenzi be barangije amasomo, yashimiye abarimu n’abayobozi b’iyi kaminuza, abizeza ko batazabakoza isoni ku isoko ry’umurimo.

Murekatete Dative warangije amasomo mu icungamuungo, avuga ko ubumenyi yahawe agiye kubukoresha mu gufatanya n’abandi kwihangira umurimo aho gukorera abandi.

Ati "Nza kwiga hano ntibyari byoroshye ariko ndashima Imana inshoboje kwiga nkarangira, ndizera ko ubumenyi nkuye hano ngiye kubukoresha nihangira umurimo ku buryo nanjye ntanga akazi aho kujya kugasaba abandi."

"Ngiye gushyira hamwe na bagenzi bange dukore umushinga uzatanga akazi aho dukomoka."

Umunyamabanga Nshingwabikorwa w’Intara y’Iburasirazuba, Habimana Kizito, yabwiye abarangije ko bakwiye gukoresha neza ubumenyi bahawe bakabubyaza umusaruro kuko ari cyo leta ibategerejeho.

Ati “Ubumenyi bufite ireme mukuye muri iyi kaminuza buzabafashe mu byo mugiye kujyamo byose, buzabafashe kandi no mu guteza imbere imiryango yanyu ndetse n’igihugu.”

“Icyo imiryango yanyu n’abanyarwanda babitezeho ni ubujyanama no kuba intumwa nziza zabo, mugende mufashe abandi guhindura imyumvire ya bamwe na bamwe kugira ngo twubake igihugu cyiza, mufashe n’urubyiruko kwibumbira mu makoperative.”

Yabasabye kandi kwirinda kurangwa n’ubusinzi no kuba umutwaro kuri polisi ahubwo bakaba indashyikirwa muri bagenzi babo bagiye gusanga ku isoko ry’umururimo.

UNIK ihrerereye mu Karere ka Ngoma mu Ntara y’Iburasirazuba ikanagira ishami mu Karere ka Rulindo.

Yatangiye mu 2003, ikaba imaze gushyira ku isoko ry’umurimo abanyeshuri 8834.

Ubuyobozi bw’iyi kaminuza buteganya gutangiza icyiciro cya gatatu cya Kaminuza mu gihe cya vuba.

Ababyeyi inshuti n'abavandimwe bari babukereye
Abarimu bigisha muri UNIK mu mutambagiro wabimburiye gutanga impamyabumenyi kuri uyu wa Kane
Umunyeshuri wahize abandi, Bintunimana Cyprien, yahembwe mudasobwa n'ibindi bikoresho bitandukanye
Ibyishimo byari byuzuye abanyeshuri basoje amasomo kuri uyu wa Kane
Murinzi Joseph wavuze mu izina rya bagenzi be, yashimiye abarimu n'abayobozi ba UNIK
Musenyeri Kambanda Antoine uyobora diyosezi ya Kibungo akaba n'Umuyobozi w'ikirenga wa UNIK, niwe watanze ku mugaragaro izi mpamyabumenyi
Nkusi Juvenal uyobora inama y'ubutegetsi ya UNIK ari kumwe na Musenyeri Kambanda na Musare Faustin uyobora ihuriro ryashinze iyi Kaminuza
Prof. Karuranga Gahima Egide uyobora Kaminuza ya Kibungo UNIK yashimiye abarangije amasomo ku bwitange bagaragaje
Sina Gérard ni umwe mu bitabiriye ibi birori
(Uhereye ibumoso) Umunyamabanga nshingwabikorwa w'intara y'Iburasirazuba Habimana Kizito ari kumwe n'umuyobozi w'inama y'ubutegetsi ya Kaminuza ya UNIK Nkusi Juvenal, Musenyeri Kambanda na Musare Faustin
Umuyobozi w'inama y'ubutegetsi ya UNIK, Nkusi Juvenal atangiza ku mugaragaro igikorwa cyo guha impamyabumenyi abanyeshuri barangije muri UNIK

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza