Abasaga 70% mu bahuguwe na CEC mu bijyanye n’amashanyarazi bazahita babona akazi

Yanditswe na Sekamana Mathias
Kuya 21 Kamena 2019 saa 11:28
Yasuwe :
0 0

Century Engineering Contractors LTD (CEC) ni ikigo cyashinzwe mu mwaka wa 2014 kigamije ahanini guteza imbere ubwubatsi butandukanye , ariko cyane cyane ikwirakwiza ry’amashanyarazi mu gihugu, ndetse no muri Afurika muri rusange.

Nyuma yo gukora ako kazi, yaje kubona ikibazo gihari mu Rwanda, kijyanye n’ubushobozi bw’abana b’abanyarwanda bava mu mashuri ariko bagera ku isoko ry’umurimo ugasanga bahuzagurika kuko batabasha guhuza ibyo bakuye mu masomo bize n’ibikorwa nyirizina bikorwa ku murimo.

Ni muri urwo rwego, Century Engineering Contractors yafashe iya mbere mu kongerera ubumenyi ngiro abana b’abanyarwanda bakirangiza kwiga ariko badafite ubunararibonye, ikabahugura, bityo bakazaba bashoboye guhangana n’abandi banyamahanga bakunze gufatwa nk’aho aribo bonyine bashoboye aka kazi ko kubaka iminara no gukwirakwiza amashanyarazi.

Ku bufatanye n’Ikigo cy’Igihugu Gishinzwe Ubumenyingiro (WDA), ikigo Century Engineering Contractors muri Werurwe uyu mwaka cyatangije amahugurwa y’amezi ane, ku banyeshuri bagera kuri 70 bize ibijyanye n’amashanyarazi.

Bafashijwe guhanga no gushushanya iminara, ubwubatsi nyir’izina bahugurwa mu byerekeye kubaka iminara y’amashanyarazi uhereye mu kuyihanga, ugacukura, ukayishinga, ukayizamura ndetse ukanayihuza ngo ikwirakwize amashanyarazi aho akenewe.

Aya mahugurwa mu bayitabiriye harimo abakobwa n’abategarugori bagera kuri 27, agamije kubategura kugira ubumenyi bukenewe kugira ngo bajye ku isoko ry’umurimo.

Ubwo twabasuraga kuwa Kabiri tariki 19 Kamena 2019, aho bigiraga ibijyanye no gushyira mu bikorwa ibyo bize, bagaragaje ko bishimiye aya mahugurwa, bavuga ko bashoboye guhuza ibyo babonye mu ishuri n’ibikorwa ndetse bakabona ibikoresho bikenerwa n’amaso yabo kuko bari babizi mu mpapuro.

Kariniwabo Spéciose, umwe mu bategarugori bahuguwe, wize ibijyanye n’amashanyarazi muri IPRC Kigali, avuga ko ibyo yize mu ishuri byari bike nubwo byamufashe imyaka ugereranyije n’aya mahugurwa yatumye abasha kumenya neza uko bikorwa atari ukubibwirwa mu magambo.

Aaron HAKIZIMANA na we wahuguwe n’iki kigo, yatubwiye ko usibye kubona amahirwe yo gukoresha amaboko ye ibyo yize mu ishuri, yasanze hari n’ibikoresho byifashishwa cyane muri aka kazi yabonye bwa mbere aje muri aya mahugurwa, ku buryo yizeye ko bizamubera impamba aho azajya hose gushaka imirimo.

Nyuma yo gusura abo banyeshuri, twifuje no kuganira n’abayobozi b’iki kigo, twerekeza aho bakorera i Kagugu, tuganira n’umuyobozi mukuru wa EPC Africa ari nacyo CEC ishamikiyeho , Ferdy TURASENGA, yavuze ko bateguye aya mahugurwa mu rwego rwo gukuraho imbogamizi yo kutagira ubunararibonye ku banyeshuri barangiza mu mashuri y’ubumenyingiro.

Ubuyobozi bw’ikigo ayobora, bwiyemeje ko ko iyi gahunda izajya iba buri mwaka, aho bazajya bahugura abanyeshuri bakirangiza kwiga mu mashuri y’imyuga n’ubumenyingiro, cyangwa se abacikirije amasomo ariko bari mu kazi bakeneye kongera ubumenyi n’ubushobozi bwabo.

Yakomeje avuga ko uyu mwaka batangiranye n’abanyeshuri 70 gusa, kubera ubushobozi buke bari bafite mu bijyanye n’ahantu hujuje ibisabwa ngo amahugurwa agende neza, ariko ko bifuza ko ku bufatanye na Minisiteri y’Ibikorwaremezo, Sosiyete y’Igihugu Ishinzwe Ingufu (REG) na WDA bagera kuri byinshi.

Bihaye intego ko buri mwaka bazajya basohora nibura abanyeshuri 150 bahuguwe neza mu bijyanye no gukwirakwiza amashanyarazi.

Mu banyeshuri barangije aya mahugurwa, Turasenga yavuze ko nibura ku kigereranyo cya 70% bazahabwa akazi mu mishanga yo gukwirakwiza amashanyarazi hirya no hino mu gihugu.

Yagize ati “Twashatse guha abarangije mu mashuri y’ubumenyigiro amahugurwa abafasha kugira ubumenyi bw’uko bikorwa mu kazi kuko tuzi ko ubunararibonye bugonga benshi ku isoko. Turateganya kujya duhugura abantu buri mwaka kandi tukongera umubare w’abo duhugura”.

CEC yifuzaga guhugura umubare munini ariko baza kugira imbogamizi zo kubona aho gukorera habasha kwakira abanyeshuri baruta aba, ari nayo mpamvu bafite muri gahunda kubaka ikigo cyujuje ibisabwa kizajya gitangirwamo ayo mahugurwa.

Turasenga yemeza ko abanyarwanda n’ibigo by’abanyarwanda byinshi bifite ubushobozi bwo gukora imirimo myinshi igihugu kigikoreshamo amafaranga menshi kizana abanyamahanga.

Asaba ababishoboye guhugura abo bashoboye naho abatanga imirimo akabasaba kugirira abanyarwanda icyizere aho bishoboka hose no kudasuzugura amasosiyete kuko ari ay’abanyarwanda.

CEC yatangiye mu 2014. Niyo yabaye sosiyete ya mbere ikora ibijyanye n’amashanyarazi mu Rwanda yubatse iminara ifite ubushobozi buri hejuru bwa kilovolte 220 ihuriweho n’u Rwanda na Repubulika Iharanira Demokarasi ya Congo.

CEC ifite gahunda yo gukomeza guhugura no guha akazi abana b’u Rwanda, uhereye kuri aba basoza amahugurwa bazatangira akazi muri Kanama uyu mwaka, kuko yizeye ubushobozi bwabo bwo gukora neza iyi mirimo ijyanye n’amashanyarazi.

Uretse guhabwa akazi kuri aba bahuguwe, bazahabwa n’impamyabushobozi z’uko bahuguwe ku iyubakwa ry’iminara y’amashanyarazi, imiyoboro n’ikwirakwiza ryayo. Izi mpamyabushobozi zizakomeza kubafasha kubona imirimo mu buzima bwabo bwa buri munsi.

Wifuza andi makuru kuri CEC wasura urubuga www.epcafrica.com

Abanyeshuri bahawe amahugurwa abamenyereza imirimo ijyanye n'amashanyarazi
Abanyeshuri barangije mu mashuri atandukanye y'ubumenyingiro bahawe ubumenyi bw'uko ibyo bize bikorwa mu kazi
Abanyeshuri bahabwa umwanya bagasobanuza bakanasobanurirana
Abanyeshuri bahuguwe na CEC ku masite atandukanye
Abahuguwe na CEC bamenye neza gushyira mu ngiro ibyo bize
Abenshi mu bahuguwe bari munsi y'imyaka 25
Ferdy Turasenga asobanura uko bubaka iminara y'amashanyarazi
Hari ibikoresho batabashije kubona ubwo bigaga mu mashuri asanzwe, babibonye bari guhugurwa na CEC
Kaniwabo Speciose yemeza ko bahagaze neza ku isoko ry'umurimo nyuma yo guhugurwa
Turasenga yemeza ko abanyarwanda n’ibigo by’abanyarwanda byinshi bifite ubushobozi bwo gukora imirimo myinshi igihugu kigikoreshamo amafaranga menshi kizana abanyamahanga.
Benshi muri aba banyeshuri bagiye gusoza amahugurwa bazahita bahabwa akazi muri CEC
Icyicaro gikuru cya EPC Africa ari nacyo kigo CEC ishamikiyeho

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza