Abasaga 1500 basoje amasomo muri Kaminuza ya Kigali basabwe kuba imbarutso y’iterambere

Yanditswe na Evariste Nsengimana
Kuya 6 Nyakanga 2018 saa 06:52
Yasuwe :
0 0

Abanyeshuri 1524 basoje amasomo mu byiciro bitandukanye muri Kaminuza ya Kigali (UoK), basabwe gukoresha ubumenyi bahaherewe mu bikorwa bigamije iterambere ry’u Rwanda n’abanyarwanda no gusigasira umuco warwo.

Ubwo butumwa babuhawe kuri uyu wa Gatanu tariki ya 6 Nyakanga 2018, ubwo UoK yatanganga impamyabumenyi ku nshuro ya Kane.

Muri abo banyeshuri harimo 150 bahawe impamyabumenyi z’icyiciro cya gatatu mu masomo arimo ay’ibaruramari, icungamutungo, gucunga imishinga, gucunga abakozi, ikoranabuhanga; 780 barangije kaminuza bagahabwa amasomo yihariye mu burezi; 30 barangije icyiciro cya kabiri mu mategeko; 98 barangije icya kabiri mu masomo ajyanye n’ikoranabuhanga n’itumanaho na 466 barangije icya kabiri mu bijyanye n’ubukungu.

Umunyamabanga wa Leta ushinzwe amashuri abanza n’ayisumbuye muri Minisiteri y’Uburezi, Dr. Munyakazi Isaac, yashimiye abo banyeshuri ku ntambwe bateye n’ababibafashijemo barimo ubuyobozi bwa Kaminuza, ababyeyi n’abandi, abasaba gukoresha ubumenyi bahakuye kugira ngo igihugu kirusheho gutera imbere.

Ati “Mfite icyizere ko ubumenyi mwakuye hano mu myaka ishize buzabafasha kugira uruhare mu iterambere ry’igihugu cyacu n’akarere giherereyemo muri rusange.”

Minisitiri Munyakazi yakomeje asaba Kaminuza ya Kigali gukomeza kujya imbere mu guteza imbere ireme ry’uburezi no kwigisha abanyeshuri amasomo abafasha guhangana ku isoko ry’umurimo, avuga ko Minisiteri akorera izakomeza kuyiba hafi.

Munyakazi yakomeje abibutsa ko ntaho baragera, bagomba gukomeza kongera ubumenyi babifashijwemo n’ababyeyi.

Ati “Birashoboka ko bakomeza, imiryango irafunguye hano mu Rwanda cyangwa hanze kandi bazakomeza gukenera amaboko yanyu (ababyeyi) kugira ngo muzabageze kure hashoboka. Batangiye kugenda ariko ntabwo twavuga ko bageze iyo bagomba kujya, igihugu kiracyakeneye ko biyongera ubumenyi, bakora byinshi birenze kuko ubumenyi turi guha abana bacu nibwo bwonyine dutezeho iterambere ry’iki gihugu.”

Umuyobozi Mukuru w’Inama y’Abashinze Kaminuza ya Kigali, Prof. Nshuti Manasseh, yasabye abahawe impamyabumenyi kutazaba injiji zize no kwita ku muryango.

Ati “Muhawe impamyabumenyi, ni icyemezo cy’uko mufite ubumenyi ariko igikomeye cyane ni ukwerekana ko mubukoresheje mu guteza imbere igihugu cyanyu, ubuzima bwanyu, ababyeyi n’abavandimwe banyu. Ntimuzabyihererane ngo muvuge ngo ‘narize sinsubiye kwa Data, kwa Mama’. Witeze imbere uteza imbere n’abawe.”

Yunzemo ati “Murangije urugendo rwo kwiga, mutangiye urundi rwo gushakisha ubuzima, bamwe murangije icyiciro cya gatatu, abandi icya kabiri mukeneye icya gatatu ni urugendo. Kwiga ntibirangira, ndabasaba ko mutazaba injiji zize. Uyu munsi mumaze kubona impamyabumenyi mukagenda mukaba injiji mugasubira inyuma. Ntabwo aribyo, sibyo u Rwanda rushaka.”

Umwe mu barangije icyiciro cya gatatu cya Kaminuza, wanahize abandi witwa Joel Kasigwa, yavuze bitari byoroshye ariko yishimira ko ateye intambwe ikomeye mu buzima, anashimira ababigizemo uruhare.

Kaminuza ya Kigali yatangiye mu 2013 ifite abanyeshuri 970, ubu ifite abanyeshuri bagera ku bihumbi birindwi, imaze guha impamyabumenyi abasaga 2370.

Umunyamabanga wa Leta ushinzwe amashuri abanza n’ayisumbuye muri Minisiteri y’Uburezi, Dr. Munyakazi Isaac, aha impanuro abanyeshuri
Umunyamabanga wa Leta ushinzwe amashuri abanza n’ayisumbuye muri Minisiteri y’Uburezi, Dr. Munyakazi Isaac, wahoze ari umwarimu muri iyi Kaminuza yari yitabiriye uyu muhango
Umuyobozi mukuru w’Inama y’Abashinze Kaminuza ya Kigali, Prof. Nshuti Manasseh ashimira umwe mu banyeshuri bitwaye neza
Umuyobozi Mukuru w’Inama y’Abashinze Kaminuza ya Kigali, Prof. Nshuti Manasseh, yasabye abahawe impamyabumenyi kutazaba injiji zize

Amafoto: Muhizi Serge


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza