Ibitaro bya Muhima byahombejwe miliyoni zisaga 10 mu myaka ibiri ishize

Yanditswe na Ishimwe Israel
Kuya 26 Ukwakira 2016 saa 11:44
Yasuwe :
0 0

Urusobe rw’ibibazo birimo abarwayi bagana ibitaro badafite ubwishingizi mu kwivuza, bagahabwa imiti ntibishyure, biri mu byahombeje ibitaro bya Muhima miliyoni 10 n’ibihumbi 977 mu myaka ibiri ishize.

Umuyobozi w’Ibitaro bya Muhima, Dr Ndizeye Ntwali, yatangarije IGIHE ko kuva muri 2014, ibi bitaro byahuye n’igihombo cyatewe n’abantu bavuwe ariko ntibishyura.

Yagize ati “Umurwayi wese uje atugana aravurwa, agahabwa n’imiti bitewe n’indwara arwaye, abagore baje kubyara tubitaho nk’uko biri mu nshingano zacu. Ikibazo kivuka iyo bigeze mu gihe cyo kubishyuza cyane cyane.”

Imibare yatanzwe na Dr Ndizeye igaragaza ko mu mwaka wa 2014-2015, mu barwayi 153 barimo umwenda ibitaro barimo 144 batari bafite ubwishingizi bagombaga kwishyura miliyoni 10,489,666 z’amafaranga y’u Rwanda, bishyuye miliyoni 1,704,655, bishyurirwa n’abagiraneza miliyoni 3,286,086, bambura miliyoni 5,498,925.

Imibare yo mu mwaka wa 2015-2016 yo igaragaza ko mu barwayi 139, harimo 123 batari bafite ubwishingizi, bane bazanywe na Polisi hamwe n’inzego z’ibanze bose hamwe bagombaga kwishyura miliyoni 10,458,379, bishyuye miliyoni 1,442,500, abagiraneza babishyurira 3,213,215, ibitaro byamburwa 5,478,164.

‘Gutwita amezi icyenda ntiwibuke gushaka ubwisungane mu kwivuza ni ikibazo’

Dr Ndizeye Ntwali agaragaza ko hari abagira uburangare cyane nko ku babyeyi babyara batarafashe ubwisungane kandi ari ibintu baba bazi.

Yagize ati “Abaza tukababyaza badafite ubwisungane mu kwivuza, bagataha bakamara n’imyaka ibiri cyangwa itatu tukibabaraho umwenda, abantu bari bakwiye kubafata nka ba bihemu. Ushobora gutungurwa ugakora impanuka utarishyura ubwisungane mu kwivuza, ariko gutwita amezi icyenda uzi neza ko uzabyarira mu bitaro utarigeze ushaka ikarita ya mituweli ni ikibazo.”

Ikibazo cy’abambura ibitaro bya Muhima kizacyemuka gite?

Dr Ndizeye avuga ko iki kibazo gishobora gushakirwa umuti binyuze mu mikoranire n’inzego bireba ndetse n’uruhare rwa buri muturage.

Ati “Nkeka ko atari ikibazo cyo gukemura hagati y’ibitaro na Minisante cyangwa Akarere, ahubwo ni ikibazo kigomba gukemuka umuturage yigishijwe. Amafaranga twishyuza ntabwo ari ayo kugira ngo ibitaro bikire, ahubwo ni ukugira ngo serivisi wahawe n’undi uzaza nyuma yawe ayihabwe. Ni umusanzu wawe ufasha mu gutuma akazi kagenda neza. Iyo uvuwe ntiwishyure uba uhemukiye wa wundi uza kwivuza nyuma yawe.”

Uyu muyobozi yakomeje avuga ko Leta yashyizeho uburyo bwo gufasha abaturage batishoboye ibishyurira ubwisungane mu kwivuza.

Ibitaro bya Muhima biteganya kujyana mu nkiko ababyambuye?

Dr Ndizeye avuga ko gukurikirana abambuye ibitaro bigoye ariko bazareba icyo amategeko ateganya.

Ati “Amategeko icyo ateganya ni uko tugomba kujya mu Bunzi. Ubwo rero nibaza ukuntu nahera muri Rusizi njya mu Bunzi nkongera nkagaruka nkajya Rubavu nkajya mu Bunzi, amafaranga byonyine byantwara? Kwivuza mu Rwanda ntabwo bihenze icyo dusaba ni uko abantu bakomeza kwigishwa bakagira ubwisungane mu kwivuza.”

Uyu muyobozi yakomeje asaba inzego zibifite mu nshingano ndetse n’itangazamakuru, kurushaho kubafasha gushishikariza abaturage akamaro ko kugira ubwisungane mu kwivuza, kuko abona ari wo muti urambye wo kurwanya ubuhemu bwa bamwe mu barwayi bambura ibitaro bya Muhima.

Ibitaro bya Muhima ni ibitaro by’Akarere ka Nyarugenge, bikaba byakira abarwayi baturutse mu bice bitandukanye by’igihugu, biganjemo abagore baje kubyara.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244