Abarwariye mu bitaro by’i Kigali batishoboye bagiye kujya bagemurirwa gatatu ku munsi

Yanditswe na Cyprien Niyomwungeri
Kuya 13 Kamena 2018 saa 02:15
Yasuwe :
0 0

Buri munsi abarwayi 1000 batagira ababitaho mu bitaro bitandatu bya Leta biri mu Mujyi wa Kigali, bazajya babona ubufasha bwo kugemurirwa gatatu ku munsi kandi buri wese ahabwe ifunguro rigendanye n’uburwayi bwe.

Umuryango Solid’Africa ku nkunga ya Imbuto Foundation ifatanyije n’Umuryango w’Umwami Mohammed VI wa Maroc ugamije iterambere rirambye, ugiye kubaka igikoni kigezweho kizajya gitegura amafunguro agemurirwa abarwayi batagira kivurira.

Iki gikoni cya mbere mu Rwanda ‘MS Gemura Kitchen’, kizubakwa mu Murenge wa Rusororo, Akarere ka Gasabo, Umujyi wa Kigali, amafunguro yacyo agemurirwe abarwayi batishoboye bo mu bitaro bya CHUK, Kibagabaga, Kanombe, Muhima, Masaka na Kacyiru ku buntu.

Mu muhango wo gushyira ibuye ry’ifatizo ahazubakwa iki gikoni wabaye kuri uyu wa Gatatu, Umuyobozi Mukuru wa Imbuto Foundation, Umutoni Sandrine, yasobanuye ko bafitanye ubufatanye n’Umuryango Solid’Africa, ufasha abarwayi batishoboye mu bitaro bya Leta, akaba ari wo uzakoreramo ibikorwa byawo.

Yavuze ko ubufasha buzatangwa ari imwe mu ntego Umuryango Imbuto Foundation ufite yo gufasha abatishoboye kugera ku ntego zabo z’ubuzima bwiza.

Yagize ati “Mu Imbuto Foundation twemera ko tugomba gutanga umusanzu wacu mu iterambere ry’ubuzima, uburezi n’uburumbuke bw’abaturage, gufatanya na Solid’Africa n’Umuryango w’Umwami Mohammed VI wa Maroc ugamije iterambere rirambye, biraduha icyizere ko dutanze ubufasha abatagira kivurira bakeneye kugira ngo barusheho kugira ubuzima bwiza.”

Ubusanzwe Umuryango Solid’Africa ugemurira abarwayi 400 ku munsi. Iki gikoni kizatuma bagera ku barwayi 1000 mu bitaro bya Leta by’i Kigali inshuro eshatu ku munsi.

Umuyobozi w’Umuryango Solid’Africa, Isabelle Kamaliza, avuga ko ari inkunga ikomeye kuko hari benshi batishoboye bajya mu bitaro ntibabone ababitaho bitewe n’impamvu zirimo n’uko barwariye kure y’aho bakomoka, bigatuma batinda gukira kuko nta mafunguro akenewe babona.

Kamaliza avuga ko iki gikoni kizatuma abarwayi batishoboye babona amafunguro ajyanye n’indwara barwaye.

Yagize ati “Ubu twagaburiraga abarwayi 400 rimwe ku munsi kandi ugasanga tudashobora kwita ku ndyo bategetswe, niba urwaye diabète, niba urwaye umutima [...] Dutekera ahantu hamwe ntabwo dushobora kuvuga ko buri muntu tureba indwara afite”.

Akomeza agira ati “Ibyo iki gikoni icyo kizazana, abanywa isupu yonyine bazayibona, abanywa umutobe [...] tuzashobora noneho kwibanda ku ndwara ufite no kuguha ibiryo bikugenewe bigatuma ukira n’ingoga ugasubira mu mirimo”.

Umuryango Solid’Africa washinzwe mu 2011 n’urubyiruko rwagiye gusura ibitaro rusanga hariyo abantu benshi batagira ababitaho, nta cyizere bafite, bagowe n’ibibazo by’imiti itari kuri Mitiweli n’ibindi.

Watangiye ugemurira abantu 20 ubu ugemurira abantu 400 rimwe ku munsi bitewe n’inkunga abanyamuryango batanga.

Umuryango Solid’Africa kandi ufasha abarwayi mu kubagurira imiti itishyurwa n’ubwisungane mu kwivuza ‘Mutuelle de Sante’, isuku, gufasha abarwayi kubona amazi meza, kubaha amatike yo gutaha bamaze gukira ndetse hari na gahunda yo gushyiraho utuzu tw’aho abana bakinira.

Igikoni kizabafasha kwagura ibikorwa byabo kizubakwa mu mezi atandatu gusa, bivuze ko mu mpera z’uyu mwaka kizafungurwa, umwaka utaha kigatangira gukora.

Uyu mushinga uzakorwa mu byiciro bibiri, icya mbere ni ukubaka no gushyira ibikoresho mu gikoni bizatwara ibihumbi birenga 300 by’amadolari.

Igice cya kabiri ni ukubaka restaurant kuko iki gikoni gifite n’ubushobozi bwo guteka ibiryo byashyirwa muri resitora n’ahandi. Bizafasha Solid’Africa kubona ubushobozi bwo kugemurira abarwayi n’ahandi mu gihugu no hanze yacyo.

Abantu batandukanye bashyira ibuye ry’ifatizo ahari kubakwa iki gikoni cyitiriwe Mike Stenbock. Izina cyahawe ni MS Gemura Kitchen
Oleg Stenbock, Umubyeyi wa nyakwigendera Mike Stenbock wari umwe mu bagize Solid’Africa akaba yaranashyigikiye iyubakwa ry’iki gikoni, ashyira ibuye ry’ifatizo aho kiri kubakwa
Uwashinze Solid'Africa, Isabelle Kamaliza, yavuze ko iki gikoni ari inkunga ikomeye kuko hari benshi batishoboye bajya mu bitaro ntibabone ababitaho bitewe n’impamvu zirimo n’uko barwariye kure y’aho bakomoka, bigatuma batinda gukira kuko nta mafunguro akenewe babona
Umuyobozi Mukuru wungirije wa Imbuto Foundation, Rita Zirimwabagabo, ashyira ibuye ry’ifatizo ahagiye kuhakwa MS Gemura Kitchen
Abari bitabiriye iki gikorwa bafashe ifoto y’urwibutso

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza