Abarokokeye Ndiza bemeza ko urushyi rwakubiswe Mbonyumutwa atari yo ntandaro yo gutoteza Abatutsi

Yanditswe na Akimana Jean de Dieu
Kuya 19 Mata 2018 saa 07:50
Yasuwe :
0 0

Mu Ugushyingo 1959, Mbonyumutwa Dominique wari Sushefu wa Ndiza yakubiswe n’abasore i Bukomero ahazwi nko mu Byimana nyuma y’aho Abatutsi bari batuye muri ako gace batangira gutotezwa, bamwe baricwa abandi baratwikirwa.

Umusaza Karekezi Pascal ni umwe mu basore batatu bakubise Mbonyumutwa. Umwaka ushize mu kiganiro yagiranye na IGIHE, yavuze ko Mbonyumutwa bamukubise kuko yagendaga ashishikariza abantu gukuraho umwami bagashyigikira Repubulika bahohotera abaturage.

Ababara inkuru bavuga ko urushyi Karekezi na bagenzi be bakubise Mbonyumutwa rwumvikanye mu Ndiza aho yayoboraga aribyo byarakaje Abahutu.

Mu muhango wo Kwibuka Abatutsi bari batuye muri Ndiza ndetse no gushyingura mu Rwibutso rwa Kiyumba imibiri 15 y’abishwe muri Jenoside yakorewe Abatutsi, hasobanuwe ko gukubitwa kwa Mbonyumutwa waje kuba Perezida w’u Rwanda byagizwe urwitwazo rwo gutoteza Abatutsi.

Mu buhamya bwatanzwe na Kabega Jean Marie uzwi nka ‘‘Kazungu’’, yagarutse ku rwango rwagiriwe Abatutsi bari batuye muri iki gice cy’imisozi ya Ndiza ahahoze ari muri Komini ya Nyabikenke, aha hanavuka bamwe mu bari mu butegetsi cyane cyane muri Repubulika ya mbere.

Yagize ati ‘‘Twarahizwe cyane kandi iyi Ndiza mubona niho hatangirijwe igeragezwa rya Jenoside mu 1959 nyuma y’ikubitwa rya Mbonyumutwa mu Byimana, ariko mbona abenshi bibeshya kuko ntabwo urushyi rwakumvikana no muri kilometero ariko abavandimwe batwikiwe inzu abandi barameneshwa barahunga. Nzabonimana wari Minisitiri na Kamali Isaac ndetse na Bagosora Théoneste washatse umugore uturuka muri iki gice nibo babaye intandaro y’iyicwa, itotezwa ndetse n’ihezwa mu bice byose by’ubuzima, tuzira ko turi Abatutsi.’’

Yavuze ko ababashije kurokoka Jenoside yakorewe Abatutsi mu 1994 ari uko hari abaturage batari bagacengewe n’inyigisho mbi bahabwaga, bagahishwa kugeza barokotse.

Perezida wa Ibuka mu Karere ka Muhanga, Rudasingwa Jean Bosco, yavuze ko urushyi rwakubiswe Mbonyumutwa atari yo ntandaro y’itotezwa ry’Abatutsi, ahubwo ngo byari biteguye ko bagomba kwicwa no gushyirwa ku nkeke n’abari abategetsi bakagombye kubarinda.

Depite Mujawamariya Berthe wavuze mu izina ry’abashyinguye imibiri y’ababo, yanenze abagize uruhare mu kwica Abatutsi bakaba baterekana aho babajugunye.

Ati “Ndagaya abishe abacu. Ntibaremera kutwereka aho babashyize. Ubu tumaze kwiyubaka nta bwoba dufite kuko kugeza ubu nta mijugujugu y’imihoro ikitwirukankaho bityo dukomeze dutwaze gitwari.”

Mujawamariya yavuze ko amateka mabi ya Jenoside yakorewe Abatutsi adakwiye kwibagirana kugira ngo azafashe abazavuka nyuma kubaka igihugu bazi aho cyavuye.

Ati “Aya ni amateka yacu tutagomba kwibagirwa ndetse tukayaraga abana bacu n’abazabakomokaho bakabimenya n’igihe cyose twebwe tuzaba turangije urugendo bakajya bayifashisha banga ikibi, bahora bifuza gukora ikiza.”

Guverineri w’Intara y’Amajyepfo, Mureshyankwano Marie Rose, yagaragaje ko ubutegetsi bubi bworeka igihugu ariko ubwiza bukagiteza imbere, avuga ko ubuyobozi u Rwanda rufite ntacyo butakoze ngo bufashe abaturage kandi buzakomeza.

Uyu muhango wo kwibuka ku nshuro ya 24 Jenoside yakorewe Abatutsi witabiriwe n’abantu batandukanye barimo abadepite ndetse n’abasenateri.

Urwibutso rwa Kiyumba rushyinguyemo imibiri y’Abatutsi bazize Jenoside mu 1994 basaga 730 bari batuye mu gice cya Ndiza.

Depite Mujawamariya Berthe yanenze abagize uruhare mu kwica Abatutsi bakaba baterekana aho babajugunye
Perezida wa Ibuka mu Karere ka Muhanga, Rudasingwa Jean Bosco, yavuze ko urushyi rwakubiswe Mbonyumutwa atari yo ntandaro y’itotezwa ry’Abatutsi
Kabega Jean Marie yavuze ku rwango rwagiriwe Abatutsi bari batuye mu gice cy’imisozi ya Ndiza ahahoze ari muri Komini ya Nyabikenke
Imibiri 15 y’abishwe muri Jenoside yakorewe Abatutsi yashyinguwe mu Rwibutso rwa Kiyumba

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza