Abarokokeye kuri Stade Kamarampaka bababajwe n’uko uwari Perefe wa Cyangugu yagizwe umwere

Yanditswe na Akimana Erneste
Kuya 14 Mata 2018 saa 09:33
Yasuwe :
0 0

Abarokokeye kuri Stade Kamarampaka baracyavuga ko bababajwe n’uko uwari Perefe wa Perefegitura ya Cyangugu, Bagambiki Emmanuel, yagize uruhare rukomeye mu kubicisha ariko akaba yarabaye umwere.

Bagambiki yafatiwe muri Togo mu 1998, bigeze mu 2004 agirwa umwere n’Urukiko rwa Arusha (ICTR) , ruvuga ko nta bimenyetso simusiga byerekana ko yakoze ibyaha bya Jenoside.

Kuri uyu wa Gatanu ubwo hasozwaga icyumweru cy’icyunamo, abarokokeye kuri Stade Kamarampaka bagaragaje uburyo umugambi wo kubica washyizwe mu bikorwa kandi na Bagambiki akabigiramo uruhare.

Kayihura Théoneste, umwe mu baharokokeye, yavuze ko mu 1990 yafashwe yitwa icyitso cy’Inkotanyi, bamwe mu bo baregwaga hamwe na we batangira kwicwa.

Yagize ati “Bamfashe mu byitso by’Inkotanyi hamwe na bagenzi banjye badushyira muri gereza batangira kutwicisha inzara, ubwo dutangira kurisha ibyatsi ndetse bakajya baduh igaikoma muri botini abandi batangira kubaha uburozi barapfa.”

Kayihura yavuze ko muri Mata 1994 ibyabaye yari ugusoza umugambi w’igihe kirekire wo kurimbura Abatutsi ari nabwo bicaga abahungiye kuri Stade bamaze kubasezeranya ko bagiye kubarinda.

Yavuze ko uwari Perefe wa Cyangugu, Bagambiki Emmanuel, Lt. Imanishimwe Samuel, Bandetse Edouard ndetse na Yussuf Munyakazi ari bo babategekaga kujya muri stade babizeza ubufasha.

Kayihura yakomje avuga ko nyuma yo guhungira kuri stade ari bwo Interahamwe zatangiye kuza gufatamo bake bakajya kwicwa, ngo hari n’abo zaryaga imitima.

Bamaze kubona nta gisigaye, bafashe umwanzuro wo kuva muri Stade bahungira muri Congo, Interahamwe zirabatangira.

Yagize ati “Twabonye nta gisigaye twiremamo amatsinda umunani; itsinda rya mbere rimaze kugera hafi y’umupaka dusanga Interahamwe zadutangatanze zitangira gutemugura. Tugarutse dusanga n’inyuma abasirikare batangiye kuturasa nuko dufata amabuye abari basigaye dusubira muri stade.”

Kayihura yanavuze ku mpunzi z’abarundi zari ziri i Nyarushishi zafatanyije n’Interahamwe kwica, ati “Baje kutubwira ko tugomba kujya mu nkambi ya Nyarushishi tukarindwa n’Abafaransa ariko kwari ukubeshya, nuko dushyirwa mu modoka, ako kanya bahise bakuramo bamwe babicira ahitwa mu Rutovu, bicwa n’Interahamwe ndetse n’impunzi z’abarundi arinazo zabigishaga kwica.”

Nubwo baciye muri iyo nzira y’umusaraba, abarokotse bo muri Rusizi bavuga ko bashimira cyane Padiri Oscar kuko ari we wabahaga ibyo kurya ndetse akanabasomera misa.

Umuyobozi wa Ibuka mu Karere ka Rusizi, Ndagijimana Laurent, yavuze ko babazwa n’uko Perefe Bagambiki Emmanuel yagizwe umwere kandi ari we wazanaga urutonde rw’abicwa.

Yagize ati “Tubabazwa n’uko Bagambiki yagizwe umwere kandi ariwe wazanaga impapuro zanditseho Abatutsi bo kwicwa, none akaba yidegembya i Burayi.”

Visi Perezida w’Inteko Ishinga Amategeko, Umutwe w’abadepite Mukama Abbas, yashimiye abarokotse batanze imbabazi bakaziha abahemukiye ariko anasaba abazi ahajugunywe imibiri y’Abatutsi kuherekana igashyingurwa mu cyubahiro.

Kuri stade yahoze ari Kamarampaka hari hahungiye Abatutsi bagera ku bihumbi bitanu.

Bakoze urugendo rwo kwibuka Jenoside yakorewe Abatutsi
Bamwe mu baturage bitabiriye umuhango wo gusoza icyumweru cyo kwibuka
Visi Perezida w’Inteko Ishinga Amategeko, Umutwe w’abadepite Mukama Abbas
Urwibutso rwa Kamembe rushyinguyemo abaguye kuri Stade ya Kamarampaka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza