Abarimu na Minisiteri y’Uburezi ntibemeranya ku gituma ireme ry’uburezi ridindira

Yanditswe na Kanamugire Emmanuel
Kuya 6 Ukwakira 2016 saa 01:55
Yasuwe :
0 0

Bimwe mu byo abarimu batunze urutoki ko bidindiza ireme ry’uburezi birimo kwimura abanyeshuri bose, ibi ariko Mineduc ivuga ko atari ikibazo ahubwo ngo umwarimu akwiye guterwa ipfunwe n’uko abanyeshuri yigishije umwaka wose basibiye.

“Nta piganwa rikiba mu banyeshuri biga bazi ko bazimuka bigatuma birara, abafite uburezi mu nshingano barebe uko ibi bintu byasubirwamo; abanyeshuri basigaye bakubita abarimu,abarimu dusigaye twibombarika mu guhana abanyeshuri b’abakobwa kuko baduhimbira ibyaha”.

Ngibyo bimwe mu bituma ireme ry’uburezi ritagerwaho, abarimu bagejeje kuri Minisitiri w’Uburezi, Musafiri Papias Malimba, ku wa 5 Ukwakira, ubwo hizihizwaga umunsi mpuzamahanga w’umwarimu.

Umwe mu barimu yagize ati “Mineduc n’izindi nzego zishinzwe uburezi zazatekereza ku kintu cyo gusibira, ntabwo twifuza ko abana basibira, ariko nanone kuba umwana yicaye azi ngo azahera mu wa mbere kurinda agera mu wa gatandatu nta mbogamizi, nta guhatana mbonamo ikibazo[…]muri rusange mbona guhatana byarapfuye”.

“Abanyeshuri basigaye bakubita abarimu”

Havuzwe kandi n’ikibazo cy’imyitwarire idahwitse ya bamwe mu banyeshuri.
Mwarimu ati “Abanyeshuri basigaye bakubita abarimu, ntabwo umwana akibona cya gitsure cya mwarimu, abarimu benshi basigaye batinya ngo batiteranya n’abana ndetse n’ababyeyi babo. Muri ino minsi abana basigaye bambara uko bashaka”.

Yakomeje avuga ko abarimu b’igitsina gabo bafite ikibazo cy’uko iyo bahannye umunyeshuri babeshyerwa ko bamusabye ko baryamana.

‘Ntabwo navuga ko tugiye kubaka ishyaka mu bana dukoresheje uburezi bw’abakoroni b’ababiligi’

Minisitiri Musafiri yagize ati “Ntabwo twavuga ko tugiye gukemura ikibazo n’uburyo bwo kubaka ishyaka mu bana dukoresheje uburezi bw’abakoroni b’Ababiligi, aho umuntu avuga ngo ni batanu ‘bazimuka’. Oya ntabwo twakemura ikibazo dusubira muri ibyo.Umuntu yakwemeranya nawe ko mu bana bacu ishyaka rigenda rihinduka.”

Avuga ku bituma ishyaka ryo guhatana rigabanuka mu banyeshuri Minisitiri Musafiri yagize ati “Hari ibishingira ku iterambere, kandi mu by’ukuri hari iterambere udashobora gukumira.Ntabwo wabuza abana gukoresha ikoranabuhanga ahubwo icyo mugomba guhindura ni uburyo bw’imyigishirize.Nubwo twigishijwe mu bihe runaka, tugomba kuba abarimu bo mu bihe bya none”.

Minisitiri Musafiri yakomeje avuga ko ikibazo kijyanye n’imyitwarire idahwitse, kidahera mu mashuri ahubwo gihera mu miryango.

Ati “Wa mwana wambaye akajipo k’urukozasoni akaza akambaye avuye mu rugo, ababyeyi be ntibagire icyo bavuga, urumva wowe mwarimu ari wowe uzagira icyo uvuga akagutega amatwi? Reka da uzaba ucurangira abahetsi, ariko ibyo ngibyo nanone kubera ibibazo tumaze iminsi tubona tugerageza gushyiraho amabwiriza ku rwego rwa Minisiteri,nubwo atasubiza buri kintu cyose ariko hari iby’ibanze yakemura”.

Minisitiri Musafiri yavuze ko kumarana umwaana umwaka agasibira biteye ipfunwe

Yakomeje asaba abarimu b’abanyamwuga kudateshuka ku nshingano zabo zo gushyira igitsure ku bana, kabone nubwo bamwe babahimbira ibinyoma ngo bizafata ubusa.

‘Gusibiza abanyeshuri bikwiye gutera ipfunwe umwarimu’

Uwari Umunyamabanga wa Leta ushinzwe amashuri y’Imyuga n’ubumenyingiro, Rwamukwaya Olivier, yabwiye abarimu ko gusibiza abanyeshuri bikwiye kubatera ipfunwe.

Yagize ati “Kuba umaranye umwaka wose abana ubigisha, warize kwigisha uvuga ko ufite impamyabushobozi ibyemeza, warahawe amahugurwa, warahawe imfashanyigisho,warahawe ibyangombwa byose, kubasibiza bikwiriye kuba ipfunwe ku buryo igihe byabaye bikwiriye kuba nk’ibyago wagize”.

Mineduc ntihakana ko gusibiza byabaho,ariko nanone igihe bibaye ngo mwarimu akwiye kubifata nk’ibyago yagize.

Yakomeje agira ati“Amanota umwana yabonye mu kizamini si yo gusa akwiye gushingirwaho hafatwa icyemezo cyo kumwimura cyangwa kumusibiza, kubera ko kiriya kizamini yakoze asoza igihembwe cyangwa umwaka atari byo bigaragaza gusa ko umwana ashoboye cyangwa adashoboye, hashobora kuba hari impamvu zatumye umunsi w’ikizamini yarabonye amanota make kandi yari asanzwe yiga neza”.

Uyu muyobozi na we yavuze ku myitwarire y’abanyeshuri no ku bihano bahabwa n’abarimu, ashimangira ko umwarimu mwiza atari uwo abanyeshuri batinya, ahubwo ari inshuti y’abo yigisha.

Abarimu bababjije Minisitiri ibibazo bitandukanye

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza