Abarimu basabye gushyirirwaho gahunda ya ‘One Laptop per Teacher’

Yanditswe na Ishimwe Israel
Kuya 5 Ukwakira 2016 saa 12:40
Yasuwe : XX
0

Abarezi basaga 4000 baturutse mu Karere ka Gasabo bateraniye ku Gisozi mu Mujyi wa Kigali mu birori byo kwizihiza Umunsi Mpuzamahanga w’Umwarimu, basabye abayobozi kubatekerezaho na bo bakabagenera Laptop nk’uko byakozwe mu mushinga wa One Laptop per Child.

Ibirori byo kwizihiza Umunsi Mpuzamahanga wa Mwarimu byabaye kuri uyu wa Gatatu, tariki ya 5 Ukwakira 2016, bikaba byakorewe mu Mirenge itandukanye, ku rwego rw’Igihugu bibera ku Gisozi mu Karere ka Gasabo.

Mwarimu Munyaneza Diogène wavuze mu izina rya bagenzi be yashimiye Leta y’u Rwanda yateje imbere uburezi ndetse na mwarimu akagira agaciro anasaba ko nabo batekerezwaho muri gahunda zituma badasigara mu ikoranabuhanga.

Yagize ati "Nk’uko hatekerejwe gahunda ya One Laptop per Child, twifuza ko hanatekerezwa kuri gahunda ya One Laptop per Teacher".

Yakomeje agaragaza n’ibindi byifuzo birimo icyo kongera amacumbi y’abarimu, kuzamurwa mu ntera ngo biragorana cyane cyane ku bigisha mu mashuri abanza.

Umuyobozi w’Akarere ka Gasabo, Rwamurangwa Steven yagaragaje kimwe mu bibazo bibereye inzitizi ireme ry’uburezi muri aka Karere ko giterwa n’ubucucike bw’abanyeshuri.

Yagize ati "Turacyafite ibibazo by’ubucucike bw’abanyeshuri mu mashuri ya Leta ndetse n’ayo itera inkunga. Ibi bituma rya reme ry’uburezi twifuza ritagerwaho uko bikwiye.

Minisitiri w’Uburezi Musafiri, yashimiye abarimu uruhare n’ubwitange bwabo mu burezi,abasaba ibintu by’ingenzi agira ati "Natwe abarimu turasabwa kuba umusemburo w’Amajyambere duteza imbere aho ishuri riherereye, kuba inyangamugayo no kwiyubaha n’ibindi.

Minisitiri Musafiri yakomeje asaba abarimu kwita ku kibazo cy’abana bata ishuri bituma abarangiza ishuri ku gihe bajya munsi ya 50% kandi nibura bagomba kuba 98%.

Yakomeje abibutsa ko kimwe n’abandi bakozi ba Leta,abarimu na bo bagiye kujya bakorera ku mihigo ndetse ko n’amabwiriza y’iyo mihigo yaraye asohotse.

Umunsi Mpuzamahanga wa Mwarimu watangiye kwizihizwa mu 1966.

Insanganyamatsiko y’uyu mwaka iragira iti "Guha agaciro abarimu, guteza imbere umwuga wabo."

Abarimu bitabiriye ibirori byo kwizihiza umunsi mpuzamahanga wa Mwarimu ku rwego rw'igihugu
Abarimu bagaragaje ibyifuzo bafite birimo guhabwa mudasobwa, kubakirwa amacumbi n'ibindi
Abarimu bahawe umwanya wo kubaza Minisitiri ibibazo
Minisitiri w'Uburezi yavuze ko abarimu bagiye kujya bakorera ku mihigo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza