Kwamamaza

Abarimu barenga 100 ba Kaminuza y’u Rwanda bamaze amezi 11 badahembwa

Yanditswe kuya 11-09-2016 saa 08:39' na Ezechiel Mbananabo& Emmanuel Kanamugire


Abarimu barenga 100 bigisha mu Ishuri ry’iyakure rya Kaminuza y’u Rwanda ( School of Open and Distance Learning) , ariko bakorera ku masezerano y’igihe gito baratangaza ko kuva mu Ugushyingo umwaka ushize amezi abaye 11 badahembwa.

Aba barimu bazwi ku izina rya Tutors mu rurimi rw’icyongereza, bakorera mu bigo bigera ku icumi bikorana na gahunda y’iyakure ya Kaminuza y’u Rwanda, birimo bine byitwa Regional Centers n’ibindi bitandatu byitwa provincial Centers.

Bamwe muri bo babwiye IGIHE ko batangiye gukorera ku masezerano y’akazi bagiranye na Kaminuza y’u Rwanda mu Ugushyingo 2015, ariko n’ubu bakaba batarahembwa na rimwe, aho bavuga ko ayo masezerano atigeze yubahirizwa.

Aba barimu ntibifuje ko imyirondoro yabo igaragazwa ku mpamvu z’umutekano wabo gusa bagize bati“Amasezerano barayishe,amatike atujyana aho dukorera ni ikibazo kidukomereye, nta bisobanuro gusa akazi turagakora nk’uko bisanzwe icyo dushaka ni uko uburenganzira bwacu bwubahirizwa.”

Hari umwe wagize ati “Reba gukora umwaka wose tudahembwa kuva mu Ugushyingo kugera muri Kanama! Aho bigeze ni ugukurikirana uburenganzira bwacu kugira ngo duhembwe.”

Ubusanzwe muri iyi gahunda y’iyakure abarimu bahemberwa amasaha bakoze, aho bakora mu mpera z’icyumweru (weekend).
Uwakoze amasaha 20 asabwa gukora mu kwezi ahembwa ibihumbi 100 kuko buri saha ibarirwa ibihumbi bitanu.

Hari abayobora ibigo bitandukanye batubwiye ko habarurwa abarimu 140 bose hamwe kuko kuri buri kimwe haba hariho 14.

Icyakora Iyamuremye Daniel, umuyobozi w’agateganyo wa gahunda y’iyakure muri Kaminuza y’u Rwanda we yagaragaje ko bose hamwe bagera ku 120.

Iyamuremye yemeje amakuru yo kudahembwa kw’aba barimu, ariko avuga ko ikibazo kiri gukurikiranwa.

Yagize ati “Ni byo koko bamaze amezi 11 batabona amafaranga. Njye nkora raporo y’uburyo bakoze ngaragaza ayo buri umwe agomba guhembwa bitewe n’amasaha bakoze ubundi nkayigeza ku bankuriye ariko ubwo nibo bamenya impamvu amafaranga ataboneka.”

Uyu muyobozi yakomeje agira ati “Ndabyumva barababaje,ni ikibazo ariko ibyo tubabwira ni uko Leta itambura bazahembwa. Iyo mbasobanurira uko ikibazo giteye mbasaba kwihangana, ndetse buri gihe iyo turi mu nama n’abankuriye mpora nibutsa.”

Ku murongo wa telefoni kuri uyu wa Kane, Pudence Rubingisa, Umuyobozi wa Kaminuza y’u Rwanda wungirije ushinzwe imari n’ubutegetsi, nawe yemeye koko ko aba barimu batinze guhembwa ariko ko ku wa Mbere w’iki cyumweru batangiye kubona amafaranga.

Yagize ati “ Ni byo habayemo gutinda ariko ku wa Mbere barayabahaye. Ni abarimu bitwa ba tutors, ndetse ushatse wazaza nkakwereka igihe byakorewe.”

Abajijwe icyatumye batinda guhembwa, yirinze kugira icyo abivugaho,avuga ko gusa habayemo ikibazo atasobanuye neza icyo ari cyo.

Pudence Rubingisa, Umuyobozi wa Kaminuza y’u Rwanda wungirije ushinzwe imari n’ubutegetsi

Aba barimu bamwigaramye

Babiri muri aba barimu bamaganiye kure ibivugwa n’uyu muyobozi ko batangiye kwishyurwa ku wa Mbere w’iki cyumweru, kuko kugeza n’ubu ngo nta mafaranga barabona.

Umwe ati “ Oya ntayo rwose! Njyewe nakozemo guhera 2009 kandi igihe cyose mpembwe mpita mbona ubutumwa bugufi iyo amafaranga ageze kuri konti yanjye.

Undi ati“ Ibyo yakubwiye ntabwo ari ukuri yakubeshye, kandi byabaye nabikubwira sinabiguhisha.”

Aba barimu barimo abafite uburambe muri aka kazi kuva porogaramu y’Iyakure yatangira mu 2001, kikaba ari na cyo cyizere bagenderaho bagakomeza gukora.

Bafitanye na Kaminuza amasezerano y’umwaka n’igice azarangira tariki 31 Ukuboza 2016. Ubundi bo icyo bakora ni ugufasha abantu biga uburezi basanzwe bafite akazi.

Mu bigo icumi bakoreramo, ibyitwa Regional Centers umuntu yakwita iby’akarere harimo icya Kigali, Rwamagana, Butare na Nyundo mu Karere ka Rubavu.

Ibiri munsi y’ibi (provincial Centers) birimo Kabgayi, Rubengera, Busogo, Nyamagabe, Rusizi na Byumba nk’uko Iyamuremye Daniel, umuyobozi w’agateganyo wa gahunda y’iyakure muri Kaminuza y’u Rwanda yabitangarije IGIHE.

Abiyandikishije kwiga muri gahunda y’iya kure mu mwaka wa 2013/2014 bari 2209 mu wa Mbere n’uwa Kabiri, mu gihe mu 2015/2016 bari 1620 mu wa Mbere n’uwa Kabiri. Biga imyaka itatu kugira ngo babone impamyabumenyi.


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 3 Ukuboza 2016
Copyright © 2009 -2014 - IGIHE Ltd - All Rights Reserved