Abarimu barasaba ko akazi kabo kataba gatanyamiryango

Yanditswe na Kanamugire Emmanuel
Kuya 9 Ugushyingo 2016 saa 02:44
Yasuwe :
0 0

Mu bakora umwuga w’uburezi mu Rwanda hari abavuga ko wahindutse gatanyamiryango cyangwa umusemburo w’ubushomeri kuri bamwe mu bawukoraga, nyuma yo kurushinga.

Kuri ubu abakora uyu mwuga by’umwihariko bavugako iyo bashakanye n’abo bakora akazi kamwe ariko bakorera mu Turere dutandukanye bibabera ihurizo rikomeye ngo kuko bisaba ko umwe muri bo areka akazi, cyangwa se bakaba ukubiri.

Umwarimu wigisha ku kigo cy’amashuri abanza mu Karere ka Gasabo yagize ati “Nashatse umugore w’umwarimukazi mu Karere ka Huye mu mwaka wa 2012, kuva twashakana tuba ukubiri.”

Akomeza avuga umugore we atari kureka akazi ngo amusange i Kigali babashe kubaho, kuri ubu akaba amusura rimwe mu kwezi.

Ati “Kuba ukubiri n’umugore ni ikibazo gikomeye cyane, nifuza ko Leta yazasubizaho uburyo bwa ‘Mutation’ umwarimu yashaka mu kandi karere akajya ahabwayo akazi mu gihe hari imyanya.”

Uwahoze ari umwarimukazi wo mu Karere ka Gakenke yatangarije IGIHE ko yabaye umushomeri nyuma yo gushaka umugabo.

Yagize ati “Nashatse umugabo wo mu Karere ka Rulindo biba ngombwa ko ndeka akazi nsanga umugabo aho akorera. Imyaka ishize ari itandatu nabuze aho nigisha. Mineduc idufashe irebe uburyo akazi k’ubwarimu katahinduka gatanyamiryango, cyangwa inzira y’ubushomeri.”

Gatera Emmanuel, umwarimu mu Rwunge rw’Amashuri rwa Gatunga mu Karere ka Gasabo yagize ati “Ese niba muri Gasabo hari imyanya 50 kuki badashobora kuvuga bati ‘reka turebe niba hari ‘mutation’ 20 ziturutse mu kandi karere? […]usanga bibangamiye imibareho ya mwarimu.”

Icyifuzo cy’abarimu batandukanye ni uko hasubirizwaho uburyo bwa ‘mutation’ bwahozeho mu myaka ya kera, dore ko batanga n’ingero z’aho ubu buryo bugikoreshwa mu nzego zimwe na zimwe.

Umunyamabanga wa Leta ushinzwe amashuri abanza n’ayisumbuye muri Minisiteri y’Uburezi, Issac Munyakazi, yatangarije IGIHE ko mbere yo kwaka ‘mutation’ umwarimu aba agomba kumenya ko aho agiye hari umwanya.

Yagize ati “Umwarimu uba ushaka guhindura akazi kubera impamvu zumvikana arayihabwa[…]ariko kandi aba agomba kubanza kumenya niba aho agiye hari umwanya koko, ikibazo gikunze kubaho ni uko nta myanya iba iri aho ashaka kujya. Iyo umwanya uhari numva nta mpamvu yatuma atawuhabwa kandi si ngombwa ko yongera gukora ibizamini.”

Munyakazi yakomeje avuga ko hagize umwarimu wimwa umwanya kandi abizi neza ko aho yifuza kujya gukorera uhari yabimenyesha Minisiteri y’Uburezi ikabikurikirana.

Abarimu bari bateragniye mu Karere ka Gasabo ubwo hizihizwaga Umunsi Mpuzamahanga wa Mwarimu

emma@igihe.rw


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza