Abarimu 118 bagiye guhabwa ibihano birimo kwirukanwa, amashuri 108 yo ashobora guhagarikwa

Yanditswe na Mathias Hitimana
Kuya 25 Ukwakira 2018 saa 12:38
Yasuwe :
0 0

Minisiteri y’Uburezi yatangaje ko igiye gufatira ibihano bikomeye birimo no kwirukana abarimu batubahiriza inshingano zabo, ndetse n’amashuri amwe ashobora kubuzwa gutangira igihembwe cya mbere cy’umwaka utaha.

Mu kiganiro n’itangazamakuru kuri uyu wa Kane, Minisitiri w’Uburezi, Dr Mutimura Eugène, yatangaje ko mu igenzura ryakozwe hari abarimu n’amashuri byagaragaweho amakosa adashobora kwihanganirwa, kuko adindiza ireme ry’uburezi.

Mu isuzuma ryakorewe mu mashuri 899 hari ahasanzwe abarimu basiba akazi, abatigisha amasaha yuzuye, abagize uruhare mu kwibwa kwa mudasobwa ku mashuri n’ibindi.

Dr Mutimura yagize ati “Abarimu bagomba guhanwa mu buryo butandukanye ni 118, amashuri atazafungura igihembwe kiza mu kwezi kwa mbere k’umwaka utaha ni 108.”

Yasobanuye ko ayo mashuri aramenyeshwa ibyo abura agomba gushaka uko yuzuza, atabikora ntazemererwe gutangira igihembwe cya mbere cy’umwaka utaha.

Mu gihe ishuri rifunzwe, Dr Mutimura yashimangiye ko nta ngaruka zizagera ku banyeshuri kuko bazoherezwa mu bindi bigo.

Yanavuze ko hari amashuri 31 agomba gukorerwa ubugenzuzi mu mikoreshereze y’umutungo wayo, aho atagaragaza aho ibikoresho byinshi yahawe byarengeye azahanwa.

Uretse guhana, Dr Mutimura yanavuze ko hari n’amashuri 17 minisiteri igiye gukorera ubuvugizi, akanafashwa kuzuza ibyo abura.

Yanatangije uburyo bwo kujya isohora ibipimo mu myigishirize, amashuri azakomeza kugaragara ko ahora inyuma akazafatirwa ibihano.

Umunyamabanga wa Leta muri Minisiteri y’Uburezi ushinzwe amashuri abanza n’ayisumbuye, Isaac Munyakazi, yashimangiye ko ubugenzuzi buzakomeza kandi abadindiza uburezi bakabiryozwa.

Ati “Ntabwo uburezi twabuzahura dukomeje kureberera ibikorwa nabi ntihagire igikorwa.”

Minisiteri y’Uburezi yavuze ko iza gutangaza ku rubuga rwayo umubare n’icyemezo cyagiye gifatirwa abarimu n’amashuri.

Minisitiri w’Uburezi, Dr Mutimura Eugène, yatangaje ko mu igenzura ryakozwe hari abarimu n’amashuri byagaragaweho amakosa adashobora kwihanganirwa, kuko adindiza ireme ry’uburezi
Abayobozi n'abahagarariye ibitangazamakuru bitandukanye, mu kiganiro kuri uyu wa Kane
Umuyobozi Mukuru w'Ikigo cy'Igihugu gishinzwe guteza imbere amasomo y'ubumenyingiro (WDA), Gasana Jérôme
Umuyobozi w'Ikigo cy'Igihugu Gishinzwe Uburezi, REB, Dr Ndayambaje Irénée
Umunyamabanga wa Leta Ushinzwe amashuri abanza n'ayisumbuye, Dr Munyakazi Isaac hamwe na Minisitiri Dr Mutimura, mu kiganiro n'abanyamakuru kuri uyu wa Kane

Amafoto: Niyonzima Moise

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza