Kwamamaza

Abari mu cyiciro 1 n’icya 2 cy’ubudehe bazajya bahabwa imiti ya malariya ku buntu

Yanditswe kuya 12-11-2016 saa 09:36' na Emma-Marie Umurerwa


Mu mwaka wa 2014, nibwo byagaragaye ko indwara ya maraliya yiyongereye cyane mu Rwanda, kuri ubu guverinoma ikaba yafashe icyemezo cy’uko abaturage bari mu cyiciro cya mbere n’icya kabiri by’ubudehe bazajya bapimwa bagasanga bayirwaye bagahabwa imiti ku buntu.

Inama y’Abaminisitiri yateranye tariki ya 11 Ugushyingo 2016, yemeje ko umuturage uri mu cyiciro cya mbere n’uri mu cya kabiri cy’Ubudehe, mu gihe bamusuzumye bagasanga arwaye malariya, ku rwego rw’Umujyanama w’Ubuzima cyangwa ku rwego rw’Ikigo Nderabuzima, azajya ahabwa umuti wa malariya ku buntu.

Uyu mwanzuro ufashwe nyuma y’aho abaturage bo hirya no hino mu gihugu bakomeje kwibasirwa n’icyorezo cya Malariya, bamwe bakavuga ko badafite ubushobozi bwo kwivuza.

Abarwaye maraliya bagiye biyongera uko bwije n’uko bucyeye

Imibare yatangajwe na Minisante tariki ya 16 Nzeri 2015 yagaragazaga abarwaye malariya bikubye kabiri uhereye mu 2010. Mu mwaka wa 2010 abantu ibihumbi 700 barwaye Malaria, muri 2013 bagera ku bihumbi 900 na ho abasaga Miliyoni n’igice bayirwaye mu mwaka wa 2014 ihitana abagera kuri 500.

Minisitiri w’Ubuzima yabajijwe impamvu z’ubwiyongere bwa malaria mu gihugu

Mu nama y’Umushyikirano yateranye tariki ya16 Ukuboza 2015, umwe mu bari bayikurikiye yabajije impamvu malariya iri kwiyongera, maze uwari Minisitiri w’Ubuzima, Dr. Agnes Binagwaho agaruka kuri zimwe mu mpamvu zaba ziri gutera ukwiyongera kwayo kandi ko hari ingamba zihari mu rwego rwo kuyihashya.

Yagize ati “Nibyo koko malariya yariyongereye mu gihugu ariko si no mu Rwanda gusa kubw’impamvu zinyuranye, ihindagurika ry’ibihe no kwihagararaho kw’imibu ku miti yagenewe kwica udukoko.”

Inama y’Abaminisitiri yateranye tariki ya 16 Ukuboza 2015, yagejejweho ikibazo cy’ubwiyongere bw’indwara ya malariya mu turere twinshi tw’Igihugu, isaba ko ingamba zo kuyirwanya zihutishwa ku buryo bwose bushoboka.

Imibare yashyizwe ahagaragara na Minisante tariki ya 22 Mutarama 2016, yagaragazaga ko umubare w’abarwayi ba malariya wikubye hafi inshuro enye mu myaka itatu ishize aho mu mwaka wa 2012 barengaga gato ibihumbi 500, mu gihe mu 2015 bageze hafi kuri miliyoni ebyiri.

Icyo gihe mu kiganiro uwari Minisitiri w’Ubuzima, Agnes Binagwaho yagiranye n’abanyamakuru, yagaragaje ko ubwo bwiyongere bukabije butaturutse ku kwirara kwa Minisante, ahubwo byatewe n’ubwiyongere bukabije bw’ubushyuhe.

Minisiteri y’Ubuzima yafashe ingamba zo guha abaturage umuti wica imibu ufite ubukana, iki gikorwa kikaba cyaratangiriye mu turere twa Nyagatare, Gisagara na Bugesera, Nyanza na Kirehe ahagaragara Malariya nyinshi, hamwe no guha ubushobozi abajyanama b’ubuzima bwo kuvura abakuze Malariya dore ko bari basanzwe bayivura abana gusa.

Mu ngamba leta isanzwe ikoresha mu guhashya iki cyorezo harimo gukingira abagore batwite n’abana bari munsi y’imyaka itanu, gutanga inzitiramibu zikoranye umuti hamwe no gutera umuti wica imibu mu ngo z’abaturage.

Muri uyu mwaka w’Ingengo y’Imari, Guverinoma y’u Rwanda yagennye amafaranga angana na miliyari 2.4 yo kurwanya malariya n’izindi ndwara.

Ukwiyongera kwa Malaria mu myaka ibiri ishize si ikibazo mu Rwanda gusa kuko ishami ry’Umuryango w’Abibumbye ryita ku buzima, OMS, rivuga ko iki kibazo cyugarije ibihugu byo muri Afurika y’Iburasirazuba n’Amajyepfo.

Izindi nkuru wasoma: Mu myaka ine ishize, abarwara Malaria bikubye kabiri

Hafi miliyoni ebyiri barwaye malaria mu 2015

Ni iki cyihishe inyuma y’ubwiyongere bukabije bwa Malariya?

Umushyikirano: Minisitiri w’Ubuzima yabajijwe impamvu z’ubwiyongere bwa malaria mu gihugu

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved