Kwamamaza

Abarenga 320 babujijwe gukora ibizamini bibemerera kwitwa abaforomo n’ababyaza

Yanditswe kuya 2-08-2016 saa 20:50' na Ezechiel Mbananabo


Abantu bagera kuri 326 babujijwe gukora ibizamini byabemereraga kubona icyangombwa kibahesha kuba abaforomo n’ababyaza b’umwuga mu gihugu kubera kutuzuza ibisabwa nk’uko Inama y’Igihugu y’abafaromo n’ababyaza (NCNM) yabitangaje.

Ibyo bizamini byatangiye kuri uyu wa Mbere tariki ya 1 Kanama, biteganyijwe ko bizarangira tariki ya 4 Kanama.

Iyi nama ivuga ko abenshi mu bangiwe gukora ibizamimini bari bariyandikishije badafite ubumenyi mu masomo ya siyansi, by’umwihariko nk’isomo ry’ibinyabuzima (Biology) n’ubutabire(Chemistry),kandi ari yo y’ingenzi cyane ku muntu uwo ari we wese kugira ngo abashe gukora umwuga w’ubuforomo n’ububyaza.

Icyemezo cyo kubabuza gukora ibizamini kije gikurikira impungenge zagaragajwe n’Inama y’Igihugu y’abaforomo n’ababyaza ku mashuri amwe n’amwe, cyane ayo mu bihugu bihana imbibi n’u Rwanda yemera kwandika abanyeshuri atabanje kureba amasomo bize.

Uwayezu Agnes, umuyobozi wa NCNM, yavuze ko ibintu nk’ibyo bikomeje gukwira mu Banyarwanda bahitamo kwambuka umupaka bakajya kwiga ubuforomo mu mashuri yo mu bihugu bituranyi.

Yagize ati "Nk’urugero,umuntu wize ibaruramari ajya kwiga ubuforomo hanze y’igihugu kandi bakamwemerera,akazagaruka ashaka icyangombwa kimwemerera gukora. Ibyo ni ibintu turi guhangana na byo.”

Uwayezu yatangarije The New Times ko kwangira bamwe gukora ibizamini bikurikije amategeko agenga umwuga w’ubuforomo n’ububyaza mu gihugu, akavuga ko ingamba zose zafashwe ari izo kurinda ubuzima bw’abaturage.

Bamwe mu bangiwe gukora ibizamini bari basanzwe bakora, ndetse bigeze no kwandikira Minisitiri w’Intebe bamusaba kubakorera ubuvugizi kuri icyo kibazo.

Uwayezu ati “Ntabwo twagendera ku gitutu ngo ni ukubera ko abantu bandikiye Minisitiri w’Intebe. Dufite amategeko tugomba gukurikiza kandi intego nyamukuru ni iyo kurinda ubuzima bw’abarwayi.”

Uwayezu yakomeje avuga ko Inama y’Igihugu y’Abaforomo n’Ababyaza yashyizweho mu 2009 igamije kugenzura umwuga w’ubuforomo n’ububyaza, n’ubwo watangiye mbere.

Ati “ Ndatekereza ko uko ari ko abantu bamwe binjiye mu mwuga nta byagombwa bafite, ariko igihe kirageze kuri bo ngo babibone,kandi bagomba kuzuza ibisabwa mbere yo gukora ikizamini.”

Uyu muyobozi yavuze ko abakoresha barimo ibitaro bya Leta n’ibyigenga, ibigo nderabuzima, farumasi n’ayandi mavuriro bakwiye gutanga amakuru ajyanye n’abakozi babo badafite icyangombwa kibemerera gukora umwuga, ndetse ko bagomba no kugenzura abiyandikisha bose niba bujuje ibisabwa mbere yo kubafata.

Yashimangiye ko ari ikibazo gikomeye kireba abakozi, amashuri bizemo, ibigo bishinzwe uburezi n’urwego rw’ubuzima rwose kimwe n’abashyiraho amabwiriza.

Ati “Dukeneye gushyira hamwe kugira ngo tugere ku gisubizo kirambye mu rwego rwo kwirinda amakosa nk’ayo mu gihe kizaza.”

Sophie Furaha ni umuforomo warangije amashuri mu 2013. Yize ubuforomo mu ishuri rikuru ‘Institut Supérieur Technique et Social de Goma’ muri Repubulika Iharanira Demokarasi ya Congo. Yavuze ko yize Imibare, Ubugenge n’ubumenyi bw’Isi mu mashuri yisumbuye.

Yatangaje ko kuva icyo gihe yakoraga ubuforomo ku kigo nderabuzima kiri mu Karere ka Nyanza.

Ati "Mbere umuntu yigaga amasomo yose ubundi akaba yakurikirana ubuforomo mu rwego rwa Koleji. Icyemezo cyo kutubuza gukora nk’abaforomo kiratunguranye; cyari kuba cyiza iyo babitumenyesha mbere y’uko gifatwa.”

Dieudonné Irizabimbuto, ushinzwe kwakira inyandiko z’ubusabe mu biro bya Minisitiri w’Intebe, mu Cyumweru gishize yabwiye The New Times ko hari abaforomo bagejeje inyandiko kuri Minisitiri w’Intebe bamusaba kubafasha.

Aba baforomo ngo bavuga ko impamyabumenyi zabo zemewe na Guverinoma ndetse ko n’Inama Nkuru y’Amashuri Makuru na za Kaminuza nta kibazo izifiteho, ariko ngo urwego rwigenga NCNM rushinzwe kurengera umwuga ruvuga ko batujuje ibisabwa bibemerera gukora ubuforomo mu gihe batize amasomo ya siyansi nk’amasomo y’ibinyabuzima n’ubutabire.

Minisiteri zirebwa n’iki kibazo harimo n’iy’uburezi ndetse n’ubuzima ngo ziri gushakira umuti icyo kibazo.

Hagati aho, imibare itangwa na NCNM, igaragaza ko abagera 1000 ari bo bemerewe gukora ibizamini bituma babona ibyangombwa bibemerera gukora.

NCNM itanga ibizamini inshuro ebyiri mu mwaka. Icya mbere cyari cyakozwe muri Gashyantare uyu mwaka. Imibare ya vuba yerekana ko mu gihugu habarurwa abaforomo n’ababyaza 10 639.

Abantu bagera kuri 326 bangiwe gukora ibizamini bibahesha kwitwa abaforomo n'ababyaza b'umwuga

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 26 September 2016
Copyright © 2009 -2014 - IGIHE Ltd - All Rights Reserved