Abarenga 12% bagororewe mu bigo ngororamuco bafashwe barasubiye mu buzererezi

Yanditswe na Prudence Kwizera
Kuya 4 Ugushyingo 2019 saa 07:21
Yasuwe :
0 0

Ubuyobozi bw’Ikigo cy’Igihugu gishinzwe Igororamuco mu Rwanda butangaza ko 12.8% by’abagororerwa mu bigo ngororamuco hirya no hino mu gihugu bafashwe barasubiye mu buzererezi.

Byatangajwe n’Umuyobozi Mukuru wungirije w’Ikigo cy’Igihugu gishinzwe Igororamuco, ACP Gumira Rwampungu Gilbert, ubwo bari bamaze gusura Ikigo Ngororamuco cya Nyamagabe ku wa 31 Ukwakira 2019.

ACP Gumira ari kumwe n’abandi bayobozi basuye icyo kigo mu rwego rwo kwizihiza Umunsi Mpuzamahanga w’Ubuzima bwo mu mutwe.

Yavuze ko urubyiruko rumaze kugororerwa mu bigo ngororamuco bya Leta birimo Iwawa na Gitagata rurenga ibihumbi 26 kandi rwasubijwe mu buzima busanzwe.

Ati “Iwawa ubwaho hamaze kuva abarengaho gato ibihumbi 22, i Gitagata mbere hagororerwaga abana bari hagati y’imyaka 10 na 18 abamaze kuhava bagera mu bihumbi bine.”

Yasobanuye ko mu Kigo Ngororamucu cya Nyamagabe ntabarasubizwa mu buzima busanzwe kuko cyatangiye muri Kamena 2019 bityo bakaba bakigororwa.

ACP Gumira yavuze ko imibare bafite ibereka ko hari abamara kuva mu bigo ngororamuco bagera hanze mu buzima busanzwe bagasubira mu buzererezi no gufata ibiyobyabwenge.

Ati “Abamaze kugaruka mu buzererezi kandi bari barasubiye mu buzima busanzwe, ubu abo twabashije kubona mu bigo binyurwamo by’igihe gito no mu bigo ngororamuco bagera nko kuri 12.8%. Bivuga rero ko hari abarenga 80% bashobora kuba baragarutse mu buzima busanzwe nta kibazo bafite.”

Imanirahari Alexis wo mu Karere ka Nyamagabe wagororewe mu Kigo cya Iwawa yatanze ubuhamya avuga ko yari yarabaye imbata y’urumogi ariko nyuma yo kugororwa yabaye umuntu muzima kandi asigaye akora ibikorwa by’iterambere.

Ati “Ubu mba mu nzu nikodeshereza nkacyuramo na moto (ni Umumotari) nkanabona ibyo kurya; nta muntu n’mwe dufitanye ikibazo. Ndashaka kugira aho nzatuza abanjye nanjye nkaba umugabo; nshaka n’uruhushya rwo gutwara imodoka kuko ariyo mpano nabonye mfite izampahira.”

Kuri ubu mu Kigo ngororamuco cya Iwawa mu Karere ka Rutsiro hari kugororerwa urubyiruko rugera ku 4500; i Gitagata mu Bugesera hariyo abarenga 700 naho i Gatare mu Karere ka Nyamagabe hari 1 437.

Bamwe mu rubyiruko bari kugororerwa mu Kigo Ngororamuco cya Nyamagabe
Umuyobozi Mukuru wungirije w’Ikigo cy’Igihugu gishinzwe Igororamuco, ACP Gumira Rwampungu Gilbert, aganira n'itangazamakuru

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza