Abarangije Masters mu Bwongereza basabwe gukoresha ubumenyi bahashye mu guteza imbere u Rwanda

Yanditswe na Evariste Nsengimana
Kuya 20 Gashyantare 2019 saa 07:10
Yasuwe :
0 0

Umuyobozi w’ Inama Nkuru y’Amashuri Makuru na Kaminuza, Dr Emmanuel Muvunyi, yasabye abanyarwanda umunani barangije kwiga icyiciro cya Gatatu cya Kaminuza mu Bwongereza, kwifashisha ubumenyi bahakuye bagatanga ibisubizo ku bibazo u Rwanda ruhura nabyo.

Dr Muvunyi wari uhagarariye Minisitiri w’Uburezi, yabibasabye ku mugoroba wo kuri uyu wa Kabiri ubwo Ambasaderi w’u Bwongereza mu Rwanda, Jo Lomas, yakiraga abavuye kwiga mu Bwongereza muri gahunda izwi nka Chevening Scholarships.

Muri iyo gahunda u Bwongereza buha buruse abanyeshuri b’abahanga bo mu bihugu 144 birimo n’u Rwanda, zo kwiga muri Kaminuza zabwo. Abo banyarwanda barangije amasomo arimo ay’itumanaho, amategeko, umutungo kamere, ubucuruzi, ishoramari n’ibindi, bize mu gihe cy’umwaka n’amezi atatu.

Dr. Muvunyi yashimye uruhare rw’u Bwongereza mu guteza imbere uburezi bw’u Rwanda by’umwihariko muri gahunda yo gufasha abanyarwanda kwiga icyiciro cya gatatu cya Kaminuza.

Ati “Nishimiye gukomeza kubona urubyiruko rwinshi rwiga muri iyi gahunda igamije guteza imbere igihugu. U Rwanda rukeneye imbaraga zo kuruteza imbere.”

Dr. Muvunyi yavuze ko barangije mu mashami akenewe ku isoko ry’umurimo mu Rwanda.

Ati “Ni amahirwe akomeye mubonye kandi twizeye ko ubumenyi mubonye mwakuye mu Bwongereza muzabwifashisha mu guteza imbere iki gihugu.”

Ambasaderi Jo Lomas yavuze ko igihugu cye giheruka gushora amapawundi asaga miliyoni 3,7 mu gufasha abanyafurika kwiga mu Bwongereza.

Yashimiye Banki ya Kigali ku ruhare igira muri iyi gahunda, aho guhera mu myaka itatu ishize yagiye iyitera inkunga nibura ikarihira abanyeshuri abari hagati ya babiri na batatu.

Yakomeje abwira abasoje amasomo ati “Mugomba kwerekana itandukaniro, mukigaragaza nk’abayobozi beza b’ahazaza mu mashami atandukanye mugiye gukoramo. Icyo twabasaba ni ugutekereza uko ubumenyi muhakuye bwagira uruhare mu iterambere ry’u Rwanda.”

Muhimpundu Marie Ange urangije mu ishami ry’ikoranabuhanga n’itumanaho yavuze ko ubumenyi burimo ubwo mu ishuri n’imibanire bahakuye bazabwifasha mu kwiteza imbere no guteza imbere igihugu.

Gasatura Daniel urangije kwiga icungamutungo n’amategeko we yagize ati “Nasanze ubumenyi nakuye mu Bwongereza burimo kumfasha cyane mu kazi kanjye ka buri munsi bitewe n’ubushakashatsi nakoze, bitandukanye n’uko nari meze ntarajyayo.”

Gahunda ya Chevening Scholarships imaze imyaka isaga 35 itangijwe ariko mu Rwanda yatangijwe mu myaka 21 ishize, aho imaze gufasha abanyarwanda basaga 97 kwiga muri Kaminuza zo mu Bwongereza.

Abarangije amasomo mu ifoto y'urwibutso
Ambasaderi Jo Lomas ashyikiriza ishimwe umwe mu barangije

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza