Abaprotestanti bagiye kugaragaza aho bahagaze ku butinganyi no kuboneza urubyaro

Yanditswe na Twarabanye Venuste
Kuya 30 Ugushyingo 2019 saa 01:00
Yasuwe :
0 0

Umunyamabanga mukuru w’Inama y’Abaprotestanti mu Rwanda, Rugambage Samuel, yavuze ko ingingo zitandukanye zitavugwaho rumwe mu banyamadini zirimo kuboneza urubyaro, gukuramo inda n’ubutinganyi bagiye kugaragaza icyo babitekerezaho hagendewe ku bushakashatsi buri gukorwa mu matorero agize protestanti.

Mu mpera z’icyumweru gishize, ku itariki 21 Ugushyingo 2019 Imbuto Foundation n’Ikigo cy’igihugu gishinzwe ubuzima baganiriye n’abafatanyabikorwa batandukanye kuri Politiki y’igihugu y’ubuzima bw’imyororkere, ubuzima b’umubyeyi n’umwana ndetse n’ubw’ingimbi n’abangavu.

Ingingo yo kuboneza urubyaro, yatanzweho ibitekerezo bitandukanye ndetse hanagaragazwa imbogamizi zihari zirimo no kuba hari abigeze kuboneza urubyaro nyuma bakaza kubihagarika biganjemo ababitewe n’imyemerere.

Ubushakashatsi bwo muri 2014/15 bw’ikigo cy’ibarurisha mibare (NISR) ku mibereho y’abanyarwanda yerekana mu 2000 ababoneza urubyaro bari 4% baza kuzamuka bagera kuri 45% mu 2010.

Nyamara hagati ya 2010 na 2014/15 ntabwo uwo muvuduko wakomeje kuko hiyongereyeho 3% gusa biva kuri 45% bagera kuri 48%, bishobora gushimangira uruhare rw’ababihagaritse kubera imyemerere.

Inyigo yo mu 2018 yakozwe na Minisiteri y’ubuzima n’Ishuri ry’ubuvuzi rya Kaminuza y’u Rwanda ku nkunga y’Ishami ry’Umuryango w’Abibumbye ryita ku baturage (UNFPA) ku bibazo bibangamiye kuboneza urubyaro yerekana ko 77.6% by’abagore bahagaritse kuboneza urubyaro ari Abaprotestanti.

Daphrose Nyirasafali ushinzwe ubuzima bw’imyororkere muri UNFPA, avuga ko basanze abagore bo mu matorero agize Protestanti, badakomeza gahunda yo kuboneza urubyaro kurusha abagatolika.

Ati “77.6% by’abagore bahagaritse uburyo bwo kuboneza urubyaro ni abo muri Protestanti; Aba-Pentekositi, Aba-Baptiste n’Aba-Methodiste, kandi bafite igipimo kingana na 1.32% yo kudakomeza uburyo bwo kuboneza urubyaro kurusha abagore b’Abagatolika.”

Aba-Protestanti barimo amatorero agera kuri 20 atandukanyije imyumvire ku ngingo yo kuboneza urubyaro.

Umunyamabanga mukuru w’Inama y’Aba-Protestanti mu Rwanda, Rugambage Samuel, yabwiye IGIHE ko kugeza ubu batatangaza aho bahagaze badashingiye ku kumenya icyo buri torero mu bagize Abaprotestanti babitekerezaho.

Yavuze ko iyo ngingo n’izindi zirimo; ubutinganyi, gukuramo inda, gushyingira abamaze gutandukana byemewe n’amategeko bari kureba uko bazumvikanaho ubundi bakazabitangariza leta.

Ati “Mu nama yacu iheruka y’Inama Nshingwabikorwa, bagishyize ku murongo w’ibyigwa bashyiraho Komisiyo y’imyitwarire. Twahise tugabana ibikorwa tugenda tubibaha, hari icyo gukuramo inda, hari icyo ubutinganyi, hari iki cyo kuboneza imbyaro, uko itorero na leta byakorana, no gushyingira abamaze gutana [Divorce] n’umukristu uko yakwitwara muri Politiki kuko abakristu babashyira mu nzego za Politiki, ibyo byose twarabigabanyije tugenda tubibaha.”

Yavuze ko gahunda ihari ari uko byagera mu Ukuboza 2019 bamaze kugaragaza aho bahagaze kuri izo ngingo.

Avuga ko impamvu bahisemo kuzabitangaza bamaze gukora ubushakashatsi ari uko bagizwe n’amatorero menshi afite imyemerere itandukanye.

Ati “Yego twemera Kristo turi n’Aba-Protestant ariko hari bimwe ubona tujyaho impaka, niyo mpamvu twavuze ngo tugabane ingingo nituzazizana tuzigeho, tuzahita duhamagaza abavugizi b’amatorero kugira ngo tubagezeho ibyo twagezeho nk’inama y’Aba-Protestant. Ntabwo twese duhuje imyumvire kuri izo ngingo maze kukubwira [….]”.

Ku gutandukana mu myumvire avuga ko hagati mu matorero bamwe usanga bavuga ko ntaho Bibiliya ibivuga abandi bagashaka kubijyanisha n’igihe bavuga ko bikwiye gukorwa.

Ati “Nka biriya by’ubutinganyi tubuhurizaho ariko ibyo byo kuboneza urubyaro, hari bamwe bavuga ngo Bibiliya ntaho ibivuga, abandi tukavuga tuti natwe tugiye kuri Bibiliya n’aho Isi igeze, urubyaro rugomba kubonezwa.”

Ababoneza urubyaro bari kuri 48%, u Rwanda rufite intego yo kugera kuri 54.6% mu 2020 na 60% mu 2024 mu kuboneza urubyaro.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza