00:00:00 IGIHE NETWORK KN KINYARWANDA EN ENGLISH FR FRANCAIS

Abapolisi barindwi bakurikiranyweho gutanga ‘permis’ binyuranyije n’amategeko (Video)

Yanditswe na Thamimu Hakizimana
Kuya 3 Ugushyingo 2021 saa 05:38
Yasuwe :
0 0

Polisi y’u Rwanda yataye muri yombi abantu 12 barimo Abapolisi barindwi n’abasivile batanu bakurikiranyweho uburiganya mu gutanga no guhabwa impushya zo gutwara ibinyabiziga.

Abafashwe beretswe itangazamakuru ku gicamunsi cyo kuri uyu wa Gatatu, tariki 3 Ugushyingo 2021 mu Mujyi wa Kigali.

Ibyaha abapolisi bakurikiranweho cyo kwihesha ikintu cy’undi hakoreshejwe uburiganya cyakorewe mu Murenge wa Gahanga mu Karere ka Kicukiro mu mpera z’ukwezi gushize ubwo hakorwaga ibizamini bya burundu byo gutwara ibinyabiziga.

Abatangabuhamya babwiye itangazamakuru ko abarimu bigisha muri Auto-Ecole babwiye bamwe mu banyeshuri bigishaga ko batazibona batagize icyo baha abapolisi, umwe agatanga ibihumbi 300 by’amafaranga y’u Rwanda.

Abapolisi bo bahakana ibyo bashinjwa bakavuga ko nta n’ikimenyetso bafatanywe. Ubuyobozi bwa Polisi bwo buvuga ko ayo ari amatakirangoyi.

Umupolisi witwa Twagirashema Augustin wafashwe ashinjwa kwakira ruswa kugira ngo ahe umuturage uruhushya rwo gutwara ikinyabiziga atakoze ibizamini, yahakanye ibyo aregwa.

Yagize ati “Ibi birantunguye nanjye kuba ndi aha kuko sindamenya ikingenza n’impamvu ndi hano. Nari mu bizamini ngiye kubona mbona baranzanye hano ariko sinzi icyo bankurikiranyeho kuko sindabwirwa n’icyo ndegwa cyangwa ngo nshyikirizwe ubucamanza.”

Umwarimu wigisha imodoka muri Auto Ecole yavuze ko yasobanuye uko yafashwe.

Ati “Abapolisi bamfashe bakeka ko nakoresheje umunyeshuri kugira ngo abashe kuba yakorana n’umupolisi kugira ngo abone uruhushya rutwara imodoka, bahita banzana.”

Umutangabuhamya watswe ruswa kugira ngo ahabwe uruhushya rutwara imodoka, yavuze ko yatanze ibihumbi 400 Frw kugira ngo ayihabwe.

Ati “Nanjye ikizamini kijya kuba nabwiwe n’uwanyigishaga ko bitoroshye kuba nabona permis mu gihe ntavuganye n’umupolisi noneho biza kurangira nanjye ngize icyo ntanga.”

Yongeyeho ko mbere yo gukora ikizamini yatanze ibihumbi 300 Frw, yongera gutanga ibihumbi 100 Frw nyuma yo kubisoza.

Umuvugizi wa Polisi y’u Rwanda, CP John Bosco Kabera, we yavuze ko aba bantu bose bakurikiranyweho kwihesha icyintu cy’undi no kurya akatagabuye.

Yagize ati “Barakekwaho ruswa no kurya akatagabuye bagatanga ibyo batemerewe mu buryo bunyuranyije n’amategeko. Bafashwe ubwo bakoreshaga ibizamini byo gutanga impushya biza kugaragara ko hari impushya batanze zitakorewe n’abiyandikishije.”

Yongeyeho ko aba baturage bahawe impushya bari bageze ahantu hatandukanye hakorerwa ibizamini nko mu Ntara y’Amajyepfo, iy’Iburengerazuba ndetse n’iy’Amajyaruguru ariko ntibakoreshwa ibizamini kandi birangira banditswe ko batsinze.

CP Kabera yavuze nyuma y’abafashwe hakurikiraho inzira zigenwa n’amategeko kugira ngo abakekwa bakurikiranwe, ibyaha nibibahama bahanwe.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .