Kwamamaza

Abanyeshuri binjiye muri Tumba College basabwe kwirinda ubuhezanguni

Yanditswe kuya 25-09-2016 saa 10:21' na Tombola Felicie


Abanyeshuri bagera kuri 300 batojwe nk’Intagamburuzwa mu ishuri rikuru ry’Ikoranabuhanga (Tumba College of Technology), basabwe guhanga imirimo bagaca ukubiri n’ubushomeri kuko akenshi ari bwo butuma habaho ubuhezanguni.

Kuva tariki ya 19 kugeza tariki ya 23 Nzeri uyu mwaka, abanyeshuri bashya muri iri shuri ndetse n’abasanzwe bahiga bari mu cyumweru cyo kwinjiza intore mu zindi cyari gifite insangamatsiko igira iti” Gukoresha amahirwe dufite twihangira imirimo.”

Asoza icyo cyumweru cy’impanuro ku bagiye gutangira ubuzima bwa Kaminuza, Abakunzi Anne, Umuyobozi wungirije ushinzwe imirimo rusange mu Kigo cy’Igihugu gishinzwe guteza imbere imyuga n’Ubumenyingiro WDA, yasabye abanyeshuri ba Tumba College guhanga imirimo bakarwanya ubushomeri mu rubyiruko kuko mu bushomeri ari ho amabi menshi aturuka.

Ati” Ndabasaba guhanga imirimo, mukagira ibyo mukora kuko urubyiruko rudafite icyo rukora ruvamo abahezanguni ndetse rukiga n’amabi menshi.Ibi bintu ntabwo ari ikinamico, ntabwo ari ibirori,ahubwo ni ubu buryo bw’igitaramo ni uburyo aba kera bakoreshaga kugira ngo babashe gufata ingamba z’ibyo bagomba gukora kandi bakabigeraho, birasaba ko buri wese yereka mugenzi we ati aha uratannye, aha ukoze nabi kugira ngo imihigo mwiyemeje muzabashe kuyigeraho.”

Abakunzi yanashishikarije abo banyeshuri kumenya urugamba igihugu kirimo rwo guhangana n’abasebya u Rwanda, bityo ikoranabuhanga biga bakarushaho kuribyaza umusaruro.

Ati”Mugomba kwinjira mu ikoranabuhanga mukarikoresha mu gusubiza abashaka gutwika igihugu bakoresheje amagambo, mubasubize mugaragaze ukuri.
Twabaye intangarugero mu bintu bibi by’amateka igihugu twaciyemo ariko kandi tugomba kuba intangarugero mu bintu byiza binyuze mu byo mwahize kuzakora.”

Umuyobozi wa Tumba College of Technology, Eng.Gatabazi Pascal na we yasabye abanyeshuri batangiye kaminuza ndetse n’abashya kugira icyo bazi gukora cyahindura ubuzima bwabo n’ubw’igihugu.

Ati”Iyi minsi yose twamaze ni ukugira ngo dutegure urubyiruko ruzihangira imirimo, rugahindura igihugu,mugomba gukora mukagaragaza ibikorwa kuko intore igomba kuvuga ibigwi byayo kuko ni byo biyitera ishema,iby’abandi ntabwo aba ari ibyawe.”

Niyigena Tharcisse wavuze mu izina ry’abandi banyeshuri, yatangaje ko nyuma yo kumva indangagaciro zikwiriye umunyeshuri wa kaminuza, bahize kuzagera ku bikorwa binyuranye harimo ibyo kwihangira imirimo no kurwanya iterabwoba.

Ati” Nyuma yo gutozwa twasanze nk’urubyiruko ari twe tugomba gufata iya mbere mu kubaka igihugu, twiyemeje rero gufata iya mbere mu kurwanya iterabwoba n’ubuhezanguni ndetse no kunyomoza abasebya u Rwanda.”

Ubusanzwe Ishuri rikuru rya Tumba College ryigamo abanyeshuri basaga 500 ariko abagera kuri 300 barimo abashya n’abandi bahasanzwe, ni bo bitabiriye ibikorwa byo kwinjiza intore mu zindi.

Baserutse babyina bagaragaza ubutore bwabo
Kubyina ni umwe mu mico iranga intore mu muco Nyarwanda
Abayobozi mu nzego zinyuranye bari bitabiriye iki gikorwa
Abakunzi Anne yasabye aba banyeshuri kwihangira imirimo no kwirinda ubuhezanguni
Eng. Gatabazi yibukije ko Intore ivuga ibigwi byayo gusa itavuga iby'abandi

[email protected]


Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 11 Ugushyingo 2016
Copyright © 2009 -2014 - IGIHE Ltd - All Rights Reserved