Kwamamaza

Abanyeshuri basaga ibihumbi 20 biga imyuga batangiye ibizamini bisoza ayisumbuye

Yanditswe kuya 22-09-2016 saa 08:47' na Tombola Felicie


Abanyeshuri 23,942 hirya no hino mu gihugu bari gusoza umwaka wa gatandatu mu mashuri y’imyuga n’ubumenyingiro (Technical Secondary School), batangiye ibizamini bya Leta bagaragaza ko hari icyo bashoboye gukora nk’abantu barangije amashuri yisumbuye.

Mu muhango wo gutangiza ku mugaragaro ikorwa ry’ibyo bizamini wabereye muri IPRC-Kigali, kuri uyu wa 21 Nzeri 2016, Umunyamabanga wa Leta ushinzwe amashuri abanza n’ayisumbuye muri Minisiteri y’Uburezi, Olivier Rwamukwaya, yatangaje ko ibi bizamini bikozwe ku nshuro ya gatandatu kandi bitanga icyizere mu kwihangira imirimo kuko byagiye bigaragara ko abarangije muri aya mashuri y’ubumenyingiro babona akazi bakirangiza kaba ako kwikorera cyangwa gukorera abandi.

Ati”Twatangije ku mugaragaro ibizamini ngiro ku nshuro ya gatandatu, abanyeshuri bariteguye kandi uko twabibonye bagiye basobanura neza ibyo babasha gukora. Aya masomo atanga icyizere kuko ubushakashatsi bwakozwe bwerekanye ko abarangije muri aya mashuri y’imyuga n’ubumenyigiro badatinda kubona akazi kaba ako bakorera abandi cyangwa ako bikorera ku giti cyabo .”

Abajijwe niba ibikoresho byo kwigiraho mu mashuri y’imyuga n’ubumenyingiro byaba bihagije, Rwamukwaya yatangaje ko atakwemeza ko bihagije ariko ko leta ikora ibishoboka byose kugira ngo ibikoresho byiyongere kandi n’ibihari bitajyanye n’igihe bibashe gusimbuzwa ibishya.

Abanyeshuri batangiye gukora ibizamini bya Leta, bemeza ko ubumenyi bafite buzabasha kububyaza umusaruro kuko ngo icyo umuntu azi gukora kirigaragaza.

Niyomugabo Aloys usoje amasomo y’umwaka wa gatandatu mu bijyanye no gukanika imodoka, mu ishuri ry’imyuga rya Kicukiro ( Kicukiro Technical Secondary School), yatangaje ko adafite ubwoba bwo kuba yajya ku isoko ry’umurimo kuko azi neza gukora ibyo yize.

Ati” Njyewe nta bwoba mfite bwo kuba nshobora kubura akazi, ibyo gukanika ndabizi neza kandi akarusho ni uko hari uburyo twize bwo gukanika ku buryo imodoka idasohora ibyuka bihumanya ikirere, ubwo buryo nzabukoresha kandi nzi ko ababukoresha atari benshi hanze aha ku isoko."

Sikubwabo Sarah umunyeshuri wiga iby’ubwubatsi mu Ishuri ry’imyuga rya Kicukiro ( Kicukiro Technical Secondary School), yatangaje ko ibyo yize ari iby’ibanze byamufasha kutaburara cyangwa ngo abwirirwe.

Ati” Nzi ibyo kubaka, nubwo ntarabiminuzamo hari icyo byamarira, ibyo nize mu myaka itatu byamfasha kubona ikimbeshaho, gusa numva nshaka gukomeza kwiga ibyo kugenzura imyubakire (construction survey) kuko ari ibintu bigezweho.”

Mu banyeshuri 23,942 batangiye ibizamini by’ubumenyingiro, abahungu ni 13,286 bangana na 53.3% naho abakobwa ni 10,656 bangana na 46.7%.

Abanyeshuri bose bazakora ibi bizamini baturuka mu mashami 23 atandukanye nk’ubwubatsi, ubukanishi, imirimo rusange n’ayandi.

Umwaka ushize abari bakoze ibizamini nk’ibi bari 22,516. Mu gihugu hose ibizamini ngiro bizakorerwa kuri site 113.

Uyu mukobwa wize ubwubatsi avuga ko ubumenyi afite bwamusha kwibeshaho
Abanyeshuri bose bari mu bizamini baturuka mu mashami 23 atandukanye
Abanyeshuri bavuga ko biteguye kubyaza umusaruro ibyo bize
Abanyeshuri basobanurira Rwamukwaya ibyo bagiye gukora
Abarangiza mu mashuri y'ubumenyi ngiro babasha kwikorera cyangwa bagakorera abandi
Abanyeshuri basobanura ibyo bakoze

[email protected]


Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 26 September 2016
Copyright © 2009 -2014 - IGIHE Ltd - All Rights Reserved